ކ. ގުރައިދޫ ދާއިރާގެ މެމްބަރު އިބްރާހިމް ރިޒާ އަވަހާރަވުމުން ބައި އިލެކްޝަނަށް ހުޅުވާލާފައިވާ ގުރައިދޫ ދާއިރާއަށް ޕީޕީއެމްގެ އިސް ބޭފުޅުންގެ ޓީމެއް ވަޑައިގެންފި އެވެ.
މަޖިލީހުގައި ޕީޕީއެމްގެ މެމްބަރެއްގެ ގޮތުގައި ރިޒާ ތަމްސީލްކުރެއްވި އެ ދާއިރާއަކީ އަބަދުވެސް އެ ޕާޓީގެ ތާއީދު ބޮޑު ދާއިރާއެކެވެ.
ގުރައިދު ދާއިރާއަށް ވަޑައިގަތް ޓީމުގައި ހިމެނިވަޑައިގަންނަވާ ޕީއެންސީގެ ނައިބު ރައީސް އަދި މަޑުއްވަރީ ދާއިރާގެ މެމްބަރު އާދަމް ޝަރީފު "މިހާރު" އަށް ވިދާޅުވީ ގުރައިދޫ އާއި ގުޅި އަދި މާފުއްޓަށް ވަޑައިގަތީ އެ ދާއިރާގެ މެމްބަރުކަން ފާއިތުވި 14 އަހަރު ފުރުއްވަމުން ގެންދެވި ރިޒާ އަވަހާރަވުމުން އެ ހިތާމައިގައި ކޯލިޝަންގެ ލީޑަރުގެ ކުރީގެ ރައީސް އަބްދުﷲ ޔާމީންގެ ފަރާތްޕުޅުން ބައިވެރިވުމަށް ކަމަށެވެ.
އެ ދަތުރުގައި އާދަމް ޝަރީފުގެ އިތުރުން ޕީއެންސީގެ ރައީސް އަބްދުއްރަހީމް އަބްދުﷲ ބައިވެރިވެވަޑައިގެންނެވި އެވެ.
މެލޭޝިއާގައި ޕީޕީއެމްގެ އިސް މެމްބަރު ރިޒާ އަވާހަރަވީ ކެންސަރުގައި ކުއްލިއަކަށް ހާލު ސީރިއަސްވެގެން މިދިޔަ މަހުގެ 22 ވަނަ ދުވަހުގެ ރެ އެވެ.
އެއާއެކު، ގުރައިދޫ ދާއިރާގެ ބައި-އިލެކްޝަންގައި ވާދަކުރުމުގައި ހަދާނެ ގޮތަކާ މެދު ވެސް އެ ރަށްރަށުގައި ތިބި ސްޓިއަރިން ކޮމިޓީގެ މެމްބަރުންނާ މަޝްވަރާކޮށްފައިވާ ކަމަށާއި އެ މީހުންގެ ވިސްނުން ހުރި ގޮތް މިއަދު ރަސްމީކޮށް އަންގާނެ ކަމަށް އާދަމް ޝަރީފު ވިދާޅުވި އެވެ.
"ޕާޓީގެ ޓިކެޓުގައި ވާދަކުރާނީ ޕްރައިމަރީ އަކުން ނޫނީ ޕާޓީގެ މީހުން ވާހަކަދައްކާފައި ނިންމާނީތޯ. ދާއިރާގެ ރައްޔިތުންގެ ވިސްނުން ހުރިގޮތް އެންގީމަ ގޮތެއް ކަނޑައަޅާނެ،" އޭނާ ވިދާޅުވި އެވެ.
ކޯލިޝަންގެ ތަރުޖަމާނު ހީނާ ވަލީދު ވިދާޅުވި ގޮތުގައި ޕީޕީއެމަށް ބޮޑު ތާއީދެއް އޮންނަ ގުރައިދޫ ދާއިރާގެ ބައި-އިލެކްޝަނާ ގުޅޭގޮތުން މިރޭ ބައްދަލުވުމެއް ބާއްވާނެ އެވެ. އެއަށްފަހު، އެ ޕާޓީގެ ނިންމުން ހާމަކުރާނެ ކަމަށް ހީނާ ވިދާޅުވި އެވެ.
އިލެކްޝަންސް ކޮމިޝަން (އީސީ) އިން ވަނީ އަންނަ މަހުގެ 15 ގައި ގުރައިދޫ ދާއިރާގެ ބައި-އިލެކްޝަން ބާއްވަން ނިންމައިފަ އެވެ. އެ ދާއިރާއަށް ކުރިމަތިލުމަށް މި މަހުގެ 13 ވަނަ ދުވަހާ ހަމައަށް ވަނީ ފުރުސަތު ދީފަ އެވެ.