ވެމްކޯއަށް ނުދައްކާ ހުރި ބިލްތައް ސްޓެލްކޯގެ ބިލަކު ނުހިމަނާނެ

ވެމްކޯ ބިލާއި ސްޓެލްކޯގެ ބިލު އެއްކޮށްލާއިރު ކުރިން ވެމްކޯއަށް ނުދައްކާ ހުރި ބިލްތައް ސްޓެލްކޯގެ ބިލުގައި ނުހިމަނާނެ ކަމަށް ވެމްކޯއިން ބުނެފި އެވެ.

ވެމްކޯއިން ގެތަކުން ކުނި ނެގުމުގެ ފީ އަންނަ ހޮނިހިރު ދުވަހުން ފެށިގެން ސްޓެލްކޯގެ ކަރަންޓު ބިލުގައި ހިމަނަން އެކުންފުނިން ވަނީ ނިންމައިފަ އެވެ.

ވެމްކޯ އަށް ބިލް ނުދައްކާ މައްސަލަ ބޮޑުވެ އެކަމަށް ހައްލެއް ހޯދަން ކަރަންޓި ބިލާއި ވެމްކޯގެ ބިލް އެއްކޮށްލަން ނިންމިޔަސް ވެމްކޯގެ މީޑިއާ އޮފިޝަލް "މިހާރު" އަށް ވިދާޅުވީ މިހާތަނަށް ވެމްކޯގައި ރަޖިސްޓްރީކޮށް ބިލް ނުދައްކާހުރި ނަމަ "އަވަސްޕޭ" މެދުވެރިކޮށް އެ ފައިސާ ދެއްކޭނެ ކަމަށެވެ.

"ވެމްކޯ ބިލް ނުދައްކާ ހުރި ނަމަ ކުރީގެ ބިލްތައް ސްޓެލްކޯ ބިލާ އެއް ނުކުރާނެ،" އޭނާ ވިދާޅުވި އެވެ.

ވެމްކޯ ބިލާއި ސްޓެލްކޯގެ ބިލު އެއްކޮށްލާތީ އެ ކުންފުނިން ވަނީ ގޭބިސީތަކުގެ މައުލޫމާތު އަޕްޑޭޓްކުރަން އިލްތިމާސްކޮށްފަ އެވެ. އާއްމު ގޭބިސީ ކަރަންޓް މީޓަރުތަކުގެ ތެރޭގައި ލިފްޓް ނުވަތަ މެއިންޓަނަންސް މީޓަރެއް ހުންނަ ނަމަ އެފަރާތްތަކުން "ޔޫޓިލިޓީ މީޓަރު އެކްސްކުލޫޝަން ފޯމް" ފުރިހަމަކޮށް، އެކޯޕަރޭޝަނަށް ހުށަހަޅަން ވަނީ އެދިފަ އެވެ.

މީގެ އިތުރުން، ކޮމާޝަލް ރެޒިޑެންޝަލް ކޮމްޕްލެކްސްތައް ބަލަހައްޓާ ފަރާތްތަކުން "ޕްރައިމަރީ މީޓަރު އައިޑެންޓިފިކޭޝަން އެންޑް ގްރޫޕިން ފޯމް" ފުރިހަމަކޮށް ހުށައެޅުމަށް ވެސް ވެމްކޯއިން އެދިފައިވެ އެވެ.

ވެމްކޯގެ ހިދުމަތް ހޯދާ މުއައްސަސާތަކާއި ވިޔަފާރިތަކުން "އިންފޮމޭޝަން އަޕްޑޭޓް ފޯމް" އަންނަ މަހުގެ ހަ ވަނަ ދުވަހުގެ ކުރިން ހުށަޅަން ވަނީ އެދިފަ އެވެ. އެތަނުން ބުނީ އެ މުއްދަތުގައި މައުލޫމާތު ހުށަނާޅައިފި ނަމަ ހިދުމަތް މެދުކެނޑޭނެ ކަމަަށެވެ.

ގޭބިސީތަކުން ބޭނުންނުކުރާ ކަރަންޓު މީޓަރުތަކުގައި ކުނި އުކާލުމުގެ ހިދުމަތުގެ ފީ ނުހިމަނާނެކަމަށް ވެސް އެ ކުންފުނިން ވަނީ ބުނެފަ އެވެ.

އަންނަ މަހުގެ ފުރަތަމަ ދުވަހުން ފެށިގެން، އެޕާޓްމަންޓްތަކަށް އަރައި ކުނި ނަގައި އަގެއްގެ ގޮތުގައި ކަނޑައަޅާފައި ވަނީ ދުވާލަކަށް 4.93ރ. އެވެ. އެހެންވެ ކަރަންޓު ބިލް އަންނައިރު، ބިލްގެ މުއްދަތަށްވާ ފައިސާ ހިމަނާނެ އެވެ.