ނ. މަނަދޫގައި އިއްޔެ އަނިޔާވެރިކޮށް މަރާލާފައި އޮއްވާ ފެނުނު ނައީމާ މޫސާގެ ހަށިގަނޑު ވަޅުލައިފި އެވެ.
އެކަނި ދިރިއުޅެމުންދިޔަ ނައީމާ މަރާލާފައި އޮއްވާ ފެނުނީ އޭނާގެ ހަބަރެއް ނުވެގެން ފުލުހުން އެގޭގެ ދޮރު ވައްޓާލައިގެން ވަދެ ބެލިއިރު އެވެ. އޭނާގެ ހަށިގަނޑު ފެނުނުއިރު ހަށިގަނޑުގައި ބޮޑެތި ޒަހަމްތަކެއް ފެންނަން ހުއްޓެވެ.
ނައީމާގެ ހަށިގަނޑު މިއަދު ހަވީރު އެރަށުގައި ވަޅުލީ ޕޯސްޓްމޯޓަމް ނުހަދަ އެވެ.
އާންމުކޮށް މަރުގެ މައްސަލަތަކުގައި މީހުން ވަޅުލަނީ ޕޯސްޓްމޯޓަމް ހެދުމަށްފަހު ކަމަށްވިޔަސް، މި މައްސަލާގައި ޕޯސްޓްމޯޓަމް ނެހެދީ ހަށިގަނޑުން ބޭނުންވާ ސާމްޕަލްތައް ލިބިފައިވާތީ އާއި އިތުރަށް ޕޯސްޓްމޯޓަށް ހަދަންޖެހޭ ސަބަބެއް ނެތް ކަމަށް ފުލުހުންގެ ފޮރެންސިކް ޕެތޮލޮޖިސްޓް ނިންމުމުން ކަމަށް ފުލުހުން ބުންޏެވެ.
އެ މައްސަލަ ތަހުގީގު ކުރަން ފުލުހުންގެ ހާއްސަ ޓީމެއް މާލެއިން އެރަށަށް ގޮސް، މިހާރު ދަނީ ހަރަކާތްތެރިވަމުންނެވެ. އެ މައްސަލަ ނިމެންދެން، ކައުންސިލްގެ ހުއްދަ ނެތި އެރަށަށް އަރައި ފޭބުން ކައުންސިލުން ވަނީ މަނާކޮށްފަ އެވެ.