މީހަކު މަރާލަން އުޅުނު ކަމުގެ ތުހުމަތަށް ހޯދަމުން ދިޔަ އިބްރާހިމް އަބްދުﷲ (ގައްބަރޭ) އަމިއްލަ އަށް ފުލުސް އޮފީހަށް މިއަދު ހާޒިރުވުމުން ހައްޔަރުކޮށްފި އެވެ.
މީގެ ކުރިން ވެސް މާރާމާރީ އާއި ބޮޑެތި ކުށްތަކެއްގެ ގިނަ ރެކޯޑު އޮންނަ ގައްބަރޭ ހޯދަމުން އައީ ގްރޫޕު ހަދައި ތޫނު ހަތިޔާރު ބޭނުންކޮށްގެން މާރާމާރީ ހިންގައި މީހަކު މަރާލަން އުޅުނު ކަމުގެ ތުހުމަތަށެވެ. އެއީ ކޮން މައްސަލައެއްގައި ކަމެއް ފުލުހުން ނުބުންޏަސް "މިހާރު" އަށް އެނގިފައިވާ ގޮތުގައި ގައްބަރޭ ހޯދީ މާލޭގެ ކެފޭއެއްގެ ތެރޭގައި އިންނަވަނިކޮށް ރައްޔިތުންގެ މަޖިލީހުގެ މަތިވެރި ދާއިރާގެ އެމްޑީޕީ މެމްބަރު ހަސަން ޒަރީރަށް ހަމަލާދިން މައްސަލައިގަ އެވެ.
ގައްބަރޭ ހޯދަން އިއުލާނުކުރީ މި މަހުގެ 15 ގަ އެވެ.
ޒަރީރަށް ހަމަލާ ދިނީ އޭނާ ވިދާޅުވި ގޮތުގައި އޭނާ ކެފޭއެއްގައި އިންނަވަނިކޮށް ފަސް މީހަކު ކެފޭތެރެއަށް ވަދެ މަރުތޭލަކުންނެވެ. ޒަރީރު ވިދާޅުވި ގޮތުގައި އޭނާއަށް ހަމަލާދިން ސަބަބެއް އެނގިވަޑައެއް ނުގަންނަވަ އެވެ.