ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ހިތަދޫ މެދު ދާއިރާގެ މެންބަރު އަހުމަދު ރަޝީދު (ޗެކްމާކް ރަޝީދު) އެމްޑީޕީން ވަކިވެވަޑައިގެންފައިވާތީ، މަޖިލިސް ތަމްސީލުކުރާ ޕާޓީތަކުގެ ނިސްބަތަށް ބަދަލު އަންނާނެ ކަމަށް ބުނެ، ދާއިމީ ކޮމިޓީތައް އެކުލަވާލުމުގެ މަސައްކަތް ކުރިއަށް ނުގެންގޮސް ދައުރުން ބޭރުން މިއަދު ބޭއްވި ޖަލްސާ ނިންމާލައިފި އެވެ.
މަޖިލީހުގެ ޖަލްސާތައް ގަވާއިދުން ނުބޭއްވި މަޖިލީހުގައި މަރުތަޅު އެޅި، އީދު ބަންދުގެ ކުރިން މަޖިލީހުގެ ދެވަނަ ދައުރު ނިންމައި ޗުއްޓީއަށް ދިޔައީ މުހިންމު މަސައްކަތްތަކެއް ނުނިންމަ އެވެ.
އެއާ އެކު، އެމްޑީޕީގެ ޕާލިމެންޓަރީ ގްރޫޕްގެ ލީޑަރު މުހައްމަދު އަސްލަމް ސޮއި ކުރައްވައި މަޖިލީހަށް ފޮނުވި ސިޓީއެއްގައި ވިދާޅުވީ މަޖިލީހުގެ ދައުރު ނިންމާލާފައި ވަނީ ކޮމިޓީތައް އެކުލެވިގެންވާ ގޮތާ ބެހޭ ގޮތުން ވަކި ގޮތެއް ނުނިންމާ ކަމަށެވެ.
އެހެންވެ ދާއިމީ ކޮމިޓީތައް އެކުލަވައިލުމާއި މަޖިލީހުގެ ގަވައިދު އިސްލާހު ކުރުމާއި މަޖިލީހުގެ ރައީސް އާއި ނައިބު ރައީސްގެ އިތުބާރު ނެތް މައްސަލަ ކުރިޔަށް ގެންދަން ދައުރުން ބޭރުން ޖަލްސާތައް ބާއްވައި ދޭން އެމްޑީޕީން އެދުނެވެ.
އެ ޕާޓީން އެދުނު ގޮތަށް މަޖިލީހުގެ ޖަލްސާއެއް މިއަދަށް ތާވަލުކޮށް އެޖެންޑާކޮށްފައި އޮތީ ދާއިމީ ކޮމިޓީތައް އެކުލަވާލުމުގެ މަސައްކަތް ކުރިއަށް ގެންދިއުމެވެ.
އެކަމަކު ޖަލްސާ ފެށުމާ އެކު، ރިޔާސަތުގައި އިންނެވި ވިލުފުށި ދާއިރާގެ މެމްބަރު ހަސަން އަފީފް ވަނީ، ނަޝީދާއި ޗެކްމާކް ރަޝީދު މިދިޔަ މަހުގެ 21 ވަނަ ދުވަހު އެމްޑީޕީން ވަކިވެވަޑައިގެންފައިވާ ކަން ފާހަގަކުރައްވައިފަ އެވެ.
އަދި އެ އާއެކު މަޖިލީހުގައި އެމްޑީޕީ ތަމްސީލުވާ ނިސްބަތަށް ބަދަލު އަންނާނެތީ، ދާއިމީ ކޮމިޓީތައް އެކުލަވާލަން މިހާރު ހުށަހަޅާފައިވާ ގޮތަށް ބަދަލު ގެންނަންޖެހޭ ކަމަށް އަފީފް ވިދާޅުވި އެވެ.
"...އެހެންވީމާ މިހާރު އައިސްފައިވާ މި ބަދަލާއެކު ރިޕޯޓު އަލުން މެމްބަރުންނާ ސާކިއުލޭޓު ކުރުމަށްފަހު، މި ޖަލްސާ އަނެއްކާ ކުރިއަށް ގެންދެވޭނެ،" މިއަދުގެ ހާއްސަ ޖަލްސާ ނިންމާލައްވަމުން އޭނާ ވިދާޅުވި އެވެ.
މަޖިލީހުގެ ޖަލްސާތައް ނުބޭއްވި މަސައްކަތްތައް ހުއްޓުނީ މަޖިލީހުގެ މެޖޯރިޓީ އޮންނަ އެމްޑީޕީން އިސްވެ މަޖިލީހުގެ ރައީސް ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲ ގެ އިތުބާރުނެތް ކަމުގެ މައްސަލަ ހުށަހެޅުމުންނެވެ. ނަޝީދާއި އީވާ މަޖިލީހުގެ ރިޔާސަތާ ހަވާލުވެވަޑައިގަންނަވަން އުޒުވެރިވެވަޑައިގެން، މަޖިލީހުގެ ތާރީހުގައި ރިޔާސަތާ ހަވާލުވާނެ ބޭފުޅަކު ނެތިގެން ވެސް ދެ ޖަލްސާއެއް ކެންސަލް ވެސް ކުރަންޖެހުނެވެ. އެކަމަކު އޭގެ ފަހުން، މިދިޔަ މަހުގެ 22 ވަނަ ދުވަހު އޮތް ދެވަނަ ދައުރުގެ ފަހުގެ ޖަލްސާގެ ރިޔާސަތާ ނަޝީދު ވަނީ "ރައްޔިތުންގެ މަސްލަހަތު އިސްކުރެއްވީ" ކަމަށް ވިދާޅުވެ، ހަވާލުވެވަޑައިގެންފަ އެވެ.
އެ ދުވަހު ވެސް ކޮމިޓީތައް އެކުލަވާލުމުގެ މައްސަލަ އެޖެންޑާކޮށް، ބަހުސް ކުރިއަށް ގެންދެވި އެވެ. އެކަމަކު ވޯޓަށް އަހައި އެ މައްސަލަ ނިންމުން އެ ޖަލްސާގައި ކުރިއަށް ނުގެންދަވާނެ ކަމަށް ނަޝީދު ވިދާޅުވި އެވެ.
ނަޝީދާއި ޗެކްމާކް ރަޝީދު އޭގެ ކުރީ ދުވަހު އެމްޑީޕީން ވަކިވެވަޑައިގެންނެވި ނަމަވެސް، އެ ދުވަހުގެ ޖަލްސާގައި ކުރިއަށް ދިޔަ ކޮމިޓީ އެކުލަވާލުމުގެ ބަހުސްގައި އެކަން އެއްވެސް ވަރަކަށް ފާހަގަކޮށްފައެއް ނުވެ އެވެ.
މަޖިލީހުގެ ދާއިމީ ކޮމިޓީތަކަށް ބަދަލު ގެންނަންޖެހުނީ ނަޝީދަށް ތާއީދުކުރައްވާ 13 މެމްބަރަކު އެމްޑީޕީން ވަކިވެވަޑައިގެންނެވުމާ ގުޅިގެންނެވެ.
