މާލޭ މަގުމަތިން ބާރު ސްޕީޑުގައި ދުއްވި ސައިކަލުން ޖެހި މީހަކަށް އަނިޔާވި މައްސަލާގައި އެ ސައިކަލު ދުއްވި ޒުވާނާ ފުލުހުން މިއަދު ހައްޔަރުކޮށްފި އެވެ.
ފުލުހުން ބުނީ ސައިކަލު ދުއްވި 22 އަހަރުގެ މީހާ ހައްޔަރުކުރީ ކޯޓު އަމުރެއްގެ ދަށުން ކަމަށެވެ.
މިދިޔަ ބުދަ ދުވަހު ހިނގި އެ އެކްސިޑެންޓުގައި އަނިޔާވީ ގައުމީ ޔުނިވާސިޓީގެ ސީނިއާ ލެކްޗަރާ އަލީ ހަފީޒަށެވެ. އެ އެކްސިޑެންޓް ހިނގީ، ހަފީޒް ފަތިސްނަމާދުން ފައިބައިގެން މަޖީދީމަގުން ހިނގާފައި ދަނިކޮށް މަގުމަތިން ބާރު ސްޕީޑުގައި ދުއްވި ސައިކަލަކުން ޖެހި އެވެ.
ސައިކަލު ދުއްވި މީހާ ހައްޔަރުކުރީ އޭނާއާ މެދު އެއްވެސް ފިޔަވަޅެއް ނާޅައިގެން އާންމުންގެ ފާޑުކިޔުން ވެސް އިދާރާތަކަށް ވަރަށް ބޮޑަށް އަމާޒުވެފައި އޮއްވަ އެވެ.
ފުލުހުން ކުރިން ބުނި ގޮތުގައި، ސައިކަލް ދުއްވި މީހާއަކީ ލައިސަންސް އޮންނަ މީހެއް ނޫނެވެ. އެ އެކްސިޑެންޓަށް ފަހު އޭނާ ނުފިލާ ކަމަށާއި އޭނާއަށް ވެސް އަނިޔާވެގެން ފަރުވާދިނީ އެވެ.
ހަފީޒްގެ ބައެއް ގާތް މީހުން ބުނި ގޮތުގައި، އޭނާގެ ހާލު އަދިވެސް ވަރަށް ސީރިއަސް އެވެ. އޭނާއަށް ފަރުވާދެމުން އަންނަނީ އޭޑީކޭގެ އައިސީޔޫގަ އެވެ. އެކްސިޑެންޓްވި ދުވަހުން ފެށިގެން މިއަދާ ހަމައަށް ވެސް އޭނާގެ ހާލަތަށް ބަދަލެއް ނާދެ އެވެ.
އޭނާގެ ހާލު ދެރަކަމުން ކޮމާޝަލް ފްލައިޓެއްގައި ރާއްޖެއިން ބޭރަށް އިތުރު ފަރުވާއަށް ގެންދެވޭކަށް ނެތެވެ. އެހެންވެ، އާއިލާއިން މިހާރު މަސައްކަތް ކުރަމުން އަންނަނީ އެއާ އެންބިއުލެންސެއްގައި އޭނާ އިންޑިއާއަށް ގެންދިއުމަށް ކަމަށް އެނގިފައިވެ އެވެ.