އެންމެ ބޮޑެތި މައްސަލަތައް ހައްލު ކުރަން ޖެހެނީ އިންޑިއާއާ އެކު: ޑރ. މުއިއްޒު

އެ މަނިކުފާނު ވެރިކަމާ ހަވާލުވެވަޑައިގަންނަވާއިރު، އެންމެ ބޮޑެތި މައްސަލަތައް ހައްލު ކުރަން ޖެހިފައި ވަނީ އިންޑިއާއާ އެކު ކަމަށާއި އެކަމަކު އެ ކަންކަން ހައްލު ކުރެވޭނެ ކަމުގެ ޔަގީންކަން އެބައޮތް ކަމަށް އިންތިހާބީ ރައީސް ޑރ. މުހައްމަދު މުއިއްޒު އިއްޔެ ވިދާޅުވެއްޖެ އެވެ.

މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގައި 54 ޕަސެންޓް ވޯޓުން ކުރިއަށް އޮތް ފަސް އަހަރަށް ރައީސްގެ މަގާމަށް ހޮވި މުއިއްޒު "މިހާރު" އަށް ދެއްވި ހާއްސަ އިންޓަވިއުއެއްގައި ވިދާޅުވީ، ހާރިޖީ ގުޅުމުގެ ތެރެއިން ހައްލު ކުރަންޖެހޭ ރާއްޖޭގެ ބޮޑެތި މައްސަލަތައް ގުޅިފައި ވަނީ އިންޑިއާއާ ކަމަށެވެ. އެއީ ދިވެހި ސަރުކާރާއި އިންޑިއާގެ ސަރުކާރާ ދެމެދު ކޮށްފައިވާ މުއާމަލާތުތަކަކާ ގުޅުން ހުރި މައްސަލަތައް ކަމަށް މުއިއްޒު ވިދާޅުވި އެވެ.

"އެ ކަންކަން އެންމެ ބޮޑީ. އެހެންވީމާ އެ ކަންކަމަށް އެންމެ ފުރަތަމަ އެޓެންޑް ވާން ޖެހެނީ. އެޓެންޑް ވާން ޖެހޭއިރު އެ ބޭފުޅުންގެ ގާތަށް އެންމެ ފުރަތަމަ ދާން ޖެހެނީ ނުވަތަ އެ ބޭފުޅުން އަޅުގަނޑުމެންގެ ގާތަށް ވަޑައިގަންނަވާނީ،" އިންތިހާބީ ރައީސް ވިދާޅުވި އެވެ.

އެ މަނިކުފާނު ވިދާޅުވި ގޮތުގައި ރާއްޖޭގައި ހުންނަވާ އިންޑިއާގެ ސަފީރުގެ ބައްދަލުވުމެއް އަދި ހަމަޖެހިފައި ނެތަސް ފޮރިން މިނިސްޓްރީ މެދުވެރިކޮށް އިންޑިއާ ސަރުކާރުން އެޕޮއިންޓްމަންޓަކަށް އެދިފައިވާ ކަމަށް އެނގިވަޑައިގެންފައިވާ ކަމަށެވެ.

"އަޅުގަނޑު ހަމަ ތައްޔާރަށް މި ހުރީ. އަޅުގަނޑު ބޭނުންވަނީ ވެސް އަޅުގަނޑުމެންގެ މައްސަލަތައް ހައްލު ކުރުމުގައި ޓްރާންސިޝަން މަރުހަލާގައި ވެސް ދެއްކެވެން ހުރި ވާހަކަތައް ދައްކަން. އެ ވާހަކަތައް ދައްކައިގެން ރަސްމީ މަސައްކަތް ފަށަންވާއިރަށް ވެސް އެ ބޭފުޅުންނަށް އެ ކަންކަމުގައި ކުރެވެން ހުރި ކަންތައްތަކަށް ތައްޔާރުވާން އަޅުގަނޑު ބޭނުން،" މުއިއްޒު ވިދާޅުވި އެވެ.

އެ މަނިކުފާނު ވިދާޅުވި ގޮތުގައި ޑިޕްލޮމެޓިކް އަދި ބިނާކުރުވަނިވި ގޮތަކަށް އިންޑިއާއާ އެކު ގިނަ ކަންކަން ހައްލު ކުރެވޭނެ އެވެ.

ރައީސްކަމުގެ މަގާމާ އަންނަ މަހުގެ 17 ގައި މުއިއްޒު ހަވާލުވެވަޑައިގަތުމުގެ ތައްޔާރީތައް ރައްޔިތުންގެ މަޖިލިހުގެ އިދާރާ އިން ފަށާފައިވާއިރު، އެ މަނިކުފާނުގެ ފުރަތަމަ ދަތުރުފުޅު ރާއްޖެ އިން ބޭރަށް ކުރައްވާނީ އިންޑިއާ އަށް ކަމަށް އެޑްވައިޒަރު އަދި ޑިޕްލޮމެޓިކް ދާއިރާގެ ތަޖުރިބާކާރު މުހައްމަދު ހުސައިން ޝަރީފް (މުންދު) ވިދާޅުވެފައި ވެ އެވެ.

އެ ކަމާ ގުޅޭ ގޮތުން ސުވާލު ދެންނެވުމުން މުއިއްޒު ވިދާޅުވީ، ހުރިހާ ރައީސުންގެ ފުރަތަމަ ދަތުރުފުޅު ކުރައްވާފައި ވަނީ އިންޑިއާ އަށް ކަމަށާއި އެއީ އެ ކަން އޮންނަން ޖެހޭ ގޮތް ކަމަށެވެ. ހާއްސަކޮށް މިހާރު ހުރި މައްސަލަތަކަށް ބަލާއިރު ވެސް އެންމެ ރަނގަޅު ގޮތަކީ އިންޑިއާ އަށް އެ މަނިކުފާނުގެ ފުރަތަމަ ދަތުރުފުޅު ހާއްސަ ކުރެއްވުން ކަމަށް މުއިއްޒު ވިދާޅުވި އެވެ. ނަމަވެސް އަދި ވަކި ގޮތަކަށް ކަނޑައަޅުއްވާފައި ނުވާ ކަމަށް އެ މުއިއްޒު ވިދާޅުވި އެވެ.

ރިޔާސީ އިންތިހާބުގެ ކެމްޕެއިންގައި މުއިއްޒާއި ޕީޕީއެމް/ޕީއެންސީން އެންމެ ބޮޑަށް ވަކާލާތުކުރީ ރާއްޖޭގައި ތިބޭ އިންޑިއާ ސިފައިން އަނބުރާ އިންޑިއާ އަށް ފޮނުވައިލުމަށެވެ. މުއިއްޒު އިންތިހާބު ކާމިޔާބު ކުރެއްވީ ވެސް އެ ވައުދާ އެކު އެވެ. އިންތިހާބުގެ ބޮޑު ކާމިޔާބު ފާހަގަކުރަން މިދިޔަ ހޯމަ ދުވަހުގެ ރޭ ބޭއްވި ބައްދަލުވުމުގައި ވެސް މުއިއްޒު ދެއްވި ޔަގީން ކަމަކީ އިންޑިއާ ސިފައިން ފޮނުވާލުމުގެ ކަންކަން ކުރައްވާނެ ކަމުގެ އެވެ.

އިންޑިއާ އެކު ހުރި މައްސަލަތަކުގެ ގޮތުގައި މުއިއްޒު އިއްޔެ ވެސް ފާހަގަކުރެއްވީ ރާއްޖޭގެ ދަރަނީގެ ބޮޑު ބައެއް އެ ގައުމަށް ބަރޯސާ ކުރުމާއި އިންޑިއާގެ ސިފައިން ތިބުމާއި ރާއްޖޭގެ މިނިވަންކަމާ މެދު އުފެދޭ ސުވާލެވެ. ވިދާޅުވީ، އެ ކަންކަމުގައި ހަމަހަމަ ސިޔާސަތުތަކެއް ގެންގުޅޭ ނަމަ ރާއްޖެ އަށް އެއްވެސް މައްސަލައެއް ނޯންނާނެ ކަމަށެވެ.

"ބޭރުގެ ސިފައިން ނުތިބެންޏާ އަޅުގަޑުމެންނަށް ނެތް އެއްވެސް މައްސަލައެއް. އަޅުގަނޑުމެންގެ ގައުމުގެ ކަންކަމުގެ ތެރެއަށް އަދި އަޅުގަނޑުމެންގެ ގައުމުގެ ފަރާތުން ދުނިޔޭގެ އެހެން ޕްލެޓްފޯމުތަކުގައި ދައްކަންޖެހޭ ވާހަކައިގައި އަޅުގަނޑުމެންގެ އަމިއްލަ ބަސް އިއްވުމުގެ މިނިވަންކަން އޮންނަންޏާ އަޅުގަނޑުމެންނަށް ނެތް އެއްވެސް ގައުމަކާ ދޭތެރޭގައި މައްސަލައެއް،" އެ މަނިކުފާނު ވިދާޅުވި އެވެ.

ޕީޕީއެމުން "އިންޑިއާ އައުޓް" ގޮވާފައިވާއިރު އަދި އިންޑިއާގެ މަޝްރޫއުތައް ހިންގާއިރު ހަމަހަމަ ސިޔާސަތުތަކެއް ގެންގުޅޭނީ ކޮން ގޮތަކަށް ތޯ އެހުމުން މުއިއްޒު ވިދާޅުވި ގޮތުގައި އެ މަޝްރޫއުތަކާ އެ މަނިކުފާނު ދެކޮޅެއް ނޫނެވެ. ހައްލު ކުރަން ޖެހެނީ މުއިއްޒު ވިދާޅުވި ގޮތުގައި މަޝްރޫއުތަކުގައި ހުރި މައްސަލަތަކެވެ.

"މިސާލަކަށް ހަނިމާދޫ އެއާޕޯޓް ހަދާއިރު އެ ތަނުގައި އިންޖިއަރުން ތިބޭނެ. އެކަމަކު އެއީ [އިންޑިއާ] ސިފައިންނަށް ވާކަށް ނުޖެހޭ. ސިފައިންނަށް ވުން މައްސަލައަކީ. އެހެންވީމާ އެކަން ހައްލު ކޮށްދޭން ދަންނަވަން ޖެހެނީ. އެކަން ހައްލު ވެސް ވާން ޖެހޭ. ސިވިލިއަންސް ތިބެން ޖެހޭނީ މަސައްކަތް ކުރަން. ޔުނިފޯމު ނޭޅިޔަސް މިލިޓަރީ ބޭފުޅުން ތިއްބެވުން މައްސަލައަކީ،" މުއިއްޒު ވިދާޅުވި އެވެ.

މުއިއްޒު ވިދާޅުވީ، އެ މަނިކުފާނު ވެރިކަމަށް އިންތިހާބު ކުރެއްވީ ރާއްޖޭގެ މިނިވަންކަން ޔަގީން ކޮށްދެއްވާނެ ކަމުގެ ވައުދާ އެކު ކަމަށް ވާތީ ދިވެހިންގެ ބަސް ވަނީ އިއްވާފައި ކަމަށެވެ. އެހެންވެ، ދިވެހިންގެ ނިންމުމަށް ހުރިހާ އެންމެން އިހުތިރާމް ކުރާނެ ކަމަށް ގަބޫލުފުޅު ކުރައްވާ ކަމަށް އެ މަނިކުފާނު ވިދާޅުވި އެވެ.

"ޕްރޯ މޯލްޑިވްސް" ގެ ސިޔާސަތު

ރައީސްކަމަށް މުއިއްޒު އިންތިހާބު ކުރުމާ އެކު، ބައިނަލްއަގްވާމީ ގިނަ މީޑިއާތަކުން މުއިއްޒު ސިފަ ކޮށްފައި ވަނީ ޗައިނާގެ ކޮޅަށް ބުރަވެ، މަސައްކަތްޕުޅު ކުރައްވާނެ ނުވަތަ "ޕްރޯ ޗައިނާ" ގެ ބޭފުޅެއްގެ ގޮތުގައި ކަމަށް ވާތީ އެއާ ގުޅޭ ގޮތުން ސުވާލު ދެންނެވުމުން މުއިއްޒު ވިދާޅުވީ "އަޅުގަނޑަކީ ޕްރޯ މޯލްޑިވްސް" ސިޔާސަތެއް ގެންގުޅުއްވާނެ ބޭފުޅެއް ކަމށެވެ.

ވިދާޅުވީ، ޗައިނާ އާއި އިންޑިއާ އާއި އެމެރިކާ އާއި މެދުއިރުމަތީގެ ގައުމުތަކާއި އަދި އަވަށްޓެރި އެހެން ގައުމުތަކާ ވެސް ގާތް ގުޅުން ބާއްވާނެ ކަމަށެވެ. ހަމައެކަނި މައްސަލައަކަށް ވާނީ ރާއްޖޭގެ މިނިވަންކަމާ ގުޅޭ ކަންކަން ކަމަށް މުއިއްޒު ވިދާޅުވި އެވެ. އޭގެ ތެރޭގައި ހިމެނެނީ ރާއްޖޭގައި ބޭރުގެ ސިފައިން ތިބުމާއި އެއް ގައުމަކަށް ދަރަނި ބަރޯސާކުރުން ފަދަ ކަންކަމެވެ.

"ގައުމު އިސްކުރާނީ. ދިވެހިރާއްޖެ އިސްކުރާނީ. ޕްރޯ ކިޔަންޏާ ޕްރޯ މޯލްޑިވްސް ޕޮލިސީ [ދަމަހައްޓަވާނީ]،" މުއިއްޒު ވިދާޅުވި އެވެ.