12 އޮކްޓޯބަރ 2023 - 09:11
ރައްޔިތުންގެ މަޖިލިހުގެ ރައީސްގެ މަގާމުން މުހައްމަދު ނަޝީދު ދުރުކުރަން މަޖިލީހުގެ އަޣުލަބިއްޔަތު އޮންނަ އެމްޑީޕީން ހުށަހަޅާފައިވާ އިތުބާރު ނެތް ކަމުގެ ގަރާރުގެ ނޯޓިސް، އެ މަނިކުފާނަށާއި މަޖިލީހުގެ މެމްބަރުންނަށް މިއަދު ފޮނުވައިފި އެވެ.
މަޖިލީހުގެ އިދާރާ އިން ބުނީ އެމްޑީޕީގެ 49 މެންބަރުން ސޮއިކުރައްވައި މަޖިލީހަށް ވައްދާފައިވާ ގަރާރުގެ ނޯޓިސް، މަޖިލީހުގެ ގަވާއިދުގައި ބުނާ ގޮތަށް މިއަދު ހެނދުނު ނަޝީދަށާއި މެމްބަރުންނަށް ފޮނުވާފައިވާ ކަމަށެވެ.
ގަރާރު ބަލައިގަނެ، ނޯޓިސް ފޮނުވާފައި ވަނީ އެ ގަރާރު ކުރިއަށް ގެންދެވޭނެ ކަމާ މެދު ނަޝީދު ސުވާލު އުފައްދަވާފައިވާ ވަނިކޮށެވެ.
އެއީ، ދައުރެއްގެ ތެރޭގައި އެއް ގަރާރެއް ދެ ފަހަރަށް ހުށަހެޅި ދާނެ ކަމާ މެދު އެ މަނިކުފާނު އުފައްދަވާފައިވާ ސުވާލެކެވެ. އެ ސުވާލު އުފެދުނީ މަޖިލީހުގެ ރައީސްކަމުން ނަޝީދު ވަކިކުރަން އެމްޑީޕީގެ ޕާލަމެންޓްރީ ގްރޫޕުން މީގެ ކުރިން ހުށަހެޅި މައްސަލައާ ގުޅިގެންނެވެ.
އެކި ސަބަބުތަކާ ހުރެ އެ މައްސަލަ ކުރިއަށް ނުގެންދެވި ހުއްޓިފައި ވަނިކޮށް، މިދިޔަ ރިޔާސީ އިންތިހާބުގެ ދެ ވަނަ ބުރުގެ ކުރިން އެމްޑީޕީން އެ ގަރާރު އަނބުރާ ގެންދިޔަ އެވެ. އެ ނޯޓިސްގެ މުއްދަތު ހަމަވާ ތާރީހުން ފެށިގެން 14 ދުވަހުގެ މުއްދަތެއް ދިނުމަށް ފަހު އެންމެ އަވަހަށް އަންނަ ރަސްމީ ބަންދު ނޫން ދުވަހަކު ބާއްވާ ޖަލްސާ އަށް އެ ގަރާރު ހުށަހަޅަންޖެހެ އެވެ.
އެއާ އެކު 14 ދުވަހުގެ މުއްދަތު ހަމަވެ، މި މަހުގެ 29 ގައި ޖަލްސާއެއް ބާއްވައި، އެ ގަރާރު އެޖެންޑާ ކުރަން ޖެހެ އެވެ. އޭގެ ކުރިން، މަޖިލީހުގެ އާންމު ކޮމިޓީން އެ ގަރާރުގެ ބަހުސްގެ ވަގުތާއި ދިފާއުގައި ނަޝީދަށް ވާހަކަ ދެއްކެވުމުގެ ވަގުތު ކަނޑައަޅަން ޖެހޭނެ އެވެ.
މަޖިލީހުގެ އިތުރު އެއްވެސް މަސައްކަތެއް ކުރެވޭނީ އެ ގަރާރާ މެދު ގޮތެއް ނިންމުމަށް ފަހު ކަމަށް ގަވާއިދުގައި ވެ އެވެ. މަޖިލީހުގެ ރައީސް މަގާމުން ވަކިކުރެވެނީ އެ ޖަލްސާއަށް ހާޒިރުވެ، ވޯޓުގައި ބައިވެރިވެވަޑައިގަންނަވާ މެމްބަރުންގެ އަޣުލަބިއްޔަތެވެ.
އެމްޑީޕީން ހުށަހެޅި ގަރާރުގައި ބުނެފައި ވަނީ ރައްޔިތުންނަށް ބޭނުންތެރި އެތައް ބިލްތަކެއްގެ މަސައްކަތާއި ސަރުކާރުގެ އިދާރާތަކާއި ދައުލަތުގެ މުއައްސަސާތަކަށް ފާރަވެރިވެ ޖަވާބުދާރީ ކުރުމުގެ ގޮތުން މުހިންމު މަސައްކަތްތަކެއް މަޖިލީހުގައި ނިންމުމަށް ތަރުތީބު ކޮށްފައި ވަނިކޮށް، ނަޝީދު މައްސަލަތައް އެޖެންޑާ ކުރައްވަނީ އަމިއްލަ މަސްލަހަތު އިސް ކުރައްވައި ވަކި ފަރާތަކަށް ބުރަވެ ހުރެ މަޖިލީހުގެ ގަވައިދާ ހިލާފަށް ކަމަށެވެ.
ރިޔާސަތުގައި އިންނަވައިގެން ނަޝީދު ތަކުރާރުކޮށް މަޖިލީހުގެ ގަވައިދާ ހިލާފަށް ޖަލްސާތައް ކުރިޔަށް ގެންދަވާތީ އާއި މުޅި މަޖިލީހުގެ ނިޒާމު ހިފެހެއްޓެވުމުގެ ބަދަލުގައި ނިޒާމު ގެއްލުވާލަން މަސައްކަތް ކުރާ ފަރާތްތަކަށް އެ މަނިކުފާނު ވާގިވެރިވާ ކަމަށް ވެސް އެ ގަރާރުގައި ވެ އެވެ.
ނަމަވެސް، ނަޝީދު ވަކިކުރަން އެމްޑީޕީން އުޅެނީ އިންތިހާބީ ރައީސް ޑރ. މުހައްމަދު މުއިއްޒު ހުވާކުރެއްވުމުގެ ކަންކަމަށް ހުރަސް އެޅުމުގެ އިތުރުން މި ސަރުކާރުން ހިންގާފައިވާ ކޮރަޕްޝަންތައް ފޮރުވަން ކަމަށް އެ މަނިކުފާނަށް ތާއީދުކުރައްވާ ޑިމޮކްރެޓްސްގެ މެމްބަރުން ދަނީ ތުހުމަތު ކުރައްވަމުންނެވެ.
Copyright © 2024 Mihaaru · Terms and Conditions · Privacy Policy
ކޮމެންޓްތައް
LaamuonlineDOTcom
13 October 2023
އަޅުގަނޑުމީ ނަޝީދުނަމަ މިހާރު އިސްތިއުފާދީފަ ގެޔަށްކަނޑާލަފާނަން! ނަޝީދުމިހާރުތިޔަކުރަނީ ބަސްނުވިކޭއޮޑީގެ ދިރުނބާކޮޅަށްއެރުން ކަހަލަކަމެއް، އެކަންނުކުރަން މުސްކުޅިންބުނެފައޮވޭ! އިރެއްގައި ތާއީދުއޮތަކަށް މިހާރު އެއްވެސް ތާއީދެއްސަޕޯޓެއްނެތްކަން އަންނިއަށް ގެޑުވާންއެބެޖެހޭ! މިހެންވީވެސް އަންނިއަށް އުޅެންނޭންގުނީމަ، ގެއްލިއްޖެ ލޯތްބެއް، އިތުބާރެއް، ސަޕޯޓެއް އަނބުރާނުލިބޭނެ، ކޮންމެވެސް އެހެންކަމަކާއުޅުން ބުއްދުވެރިގޮތަކީ
މިރިނުވެ
13 October 2023
ކަންމަތީ ކުދިންނާއެކު ފުޓްބޯޅަ ކުޅެންދާއިރު ބޯޅަ އަދި ގޯލް ތަޅުދަނޑި އޮންނަ ސޮރު އުޅޭ ގޮތަށް މަޖްލިހުގަ އުޅޭ ސޮރެއް. ހިތް ހަމަ ނުޖެހުނީ މެޗް ނިމުނީ. އެ ފަށައިގެން 5 މިނެޓް ވިޔަސް. ކުޅޭ ގަޑި ކުޅެން ގެންދެވޭނެ ބަޔެއް ކަންޑަ އަޅާނީ އެސޮރު.
ބީ ޑިމޮކްރެޓިކް
12 October 2023
ޑިމޮކްރެޓްސް ކިޔާފަ ތިއޮތީ ޕާޓީއެއް ހެދިފަ. %7 ތާއީދު ވެސް ލިބިއްޖެ. ދެން %7 އާ ގުޅޭ ކަންކަންކުރޭ. ޕާލަމެންޓްގެ ޗެއަރގާ ބަގުޑިނުލާ އަންނަ އިންތިޚާބުން ކާމިޔާބުކުރޭ. އެމްޑީޕީ ހިނގާގޮތާ ނޫޅެ ތިޔަ ހެދި ޕާޓީއާގެން އުޅެބަލަ. އެއްކަލަ ނުފެންނަ 39 ހާސް ތިލަވޭތޯ އުޅުނިއްޔާ ކީއްތަ؟
އަންނިފޭން
12 October 2023
ދެން ރިޔާސަތު ބަލަހައްޓަން ތިބޭ މީހުންގެ ތެރެއިން ފަހަރަކު މީހަކު ޖަލްސާ އޮންނަ ދުވަހު ބަލިވާނީ.. މުއިއްޒްއަށް ހުވާކުރެވެންދެން.. މުއިއްޒް ހުވާކުރާތަނުން އެމްޑީޕީ މެމްބަރުންތައް ވިއްސިވިހާލި ވެގެންދާނެ..
ބޮޑުވަޒީރު
12 October 2023
މަބުނީ... އެއްކަލަ ބޮޑު ވަޒީރުގެ ޚަބަރެއް ނުވެޔޭ އިޒްރޭލާ ދެކޮޅަކަށް. އެހެން ކަމެއް ނަމައީ ހީވާނީ ފުއްމައިގެން ޚަބަރަށް ނޭރިގެން އުޅޭހެން.
ޖެރާޑް
12 October 2023
ބޮޑުވަޒީރު އެކަނިތަ.. ކޮބާއޯ ވަދުވެގެން ވެއްޓުނު ރޔާމީން..
ކަތްދައްތަ
12 October 2023
ދެ ރެނދު ކިޔާ ފޮތެއް ލިޔާނެ ކަމަށް ހީކުރަން.
ލުކާސް
12 October 2023
ގޮޑިން ބާލާނަން.....ބާލާނަން
ކާތިބު
12 October 2023
ދެން އެންމެ އަވަހަށް އަޑު އިވޭނީ މަޖިލިސްގެ ނައިބު ރައީސް އީވާ ޢަބްﷲ އިސްތިއުފާ ދެއްވި ޚަބަރު. އެއާއެކު އަނެއްކާވެސް މަޖިލިސް ގަވާއިދުގެ މާއްދާ އެއްގައި ހިފާ ދަމާނެ ފުރުޞަތު ނަޝީދު ހޯދާނެ. ކާކުހޭ ދެން އަހަރެންގެ މައްސަލަ އޮންނަ ދުވަހަކު ރިޔާސަތު ބަލަހައްޓާނީ؟ މިހިރަ މިހިރަ ކަންކަމަކީ މަޖިލިސްގެ އަމީން އާއްމުގެ އެއްބާރުލުން ލިބެންޖެހޭ ކަންކަން. ހަނދާން އެބަހުރިތޯ ހުރިހާ ވަޒީރުން އެއްފަހަރާ އިސްތިއުފާ ދިން ހަނދާން. އެވެސް ނަޝީދުގެ އެޕިސޯޑެއް.
ކަނބިލި
12 October 2023
ނަޝީދަށް ވެސް ބޭނުންވެގެން އުޅުނު އިއްޒަތާއި ޝަރަފާއި ފައިސާ ލިބިއްޖެ. ކޮންމެ ކަމަކަށް ވެސް ނިމުމެއްވޭ. ނަޝީދުވެސް ދެން ރަނގަޅުވާނީ ޒުވާނުންނަށް ފުރުސަތު ދީފައި ރީތިކޮށް ދިޔައިމާ. ރައްޔިތުންގެ ތާއީދު މިހާރު ވެއްޓިއްޖެ 7% އަށް ސުމަކަށް ނުވެއްޓެނީސް ރީތިކޮށް ދުރުވުން ރަނގަޅީ
ބަރުބާދު
12 October 2023
ތީހަމައެކަނި ގަރާރެއްނޫން، ވަރައްފުރިހަމަޔައް ބަޔަކުވާނެ ބޭގަރާރެއް.