އިޒްރޭލުގެ ލާއިންސާނީ އަމަލުތަކާ ދެކޮޅަށް އަޑު އުފުލައި ފަލަސްތީނުގެ ރައްޔިތުންނާ އެކު ދިވެހިން ތިބި ކަން އަންގައިދޭން މިއަދު މުޅި ރާއްޖޭގައި ބޮޑު ހަރަކާތެއް ބާއްވައިފަ އެވެ.
އިންޓަނޭޝަނަލް އެއިޑް ކެމްޕޭން (އައިއޭސީ) އިން އިންތިޒާމު ކުރާ "ދިވެހިން ފަލަސްތީނާއެކު" ހަރަކާތުގެ ދަށުން މިއަދު ހަވީރު ވަނީ މާލޭ ރަސްފަންނު ސަރަހައްދުން ފެށިގެން މަޖީދީ މަގުގައި ސައިކަލު ބުރެއް ބާއްވައިފަ އެވެ. އެ ސައިކަލު ބުރުގައި ގިނަ އަދަދެއްގެ ބަޔަކު ބައިވެރިވި އެވެ.
ހެންވޭރު އާޓިފިޝަލް ބީޗު ސަރަހައްދަށް މި ސައިކަލު ބުރު ނިންމާލުމަށް ފަހު އެތަނުގައި ވެސް އިޒްރޭލާ ދެކޮޅަށް އަޑު އުފުލުމުގެ ހާއްސަ ހަރަކާތެއް ބޭއްވި އެވެ. އެ ހަރަކާތުގައި ފަލަސްތީނުގެ މައްސަލައިގެ ތާރީހާއި ގާޒާގެ މިއަދުގެ ހާލަތާއި އަގްސާގެ މާތް ކަމާއި މުހިންމު ކަން ފަދަ އެކި މައުލޫތަކަށް ބައެއް ބޭފުޅުން ވާހަކަދެއްކެވި އެވެ.
އާންމުން ވެސް ވަނީ އެމީހުންގެ ހިތުގެ ޝުއޫރުތައް ފާޅުކޮށްފަ އެވެ.
މާލޭގެ އިތުރުން މިއަދު ރާއްޖޭގެ ވަރަށް ގިނަ ރަށްރަށުގައި ވެސް ފަލަސްތީނުގެ ދިފާއުގައި ހިނގާލުންތައް ބާއްވައިފަ އެވެ.
އައިއޭސީ އާއި ދިވެހި މީޑިއާތަކުގެ އިސްނެގުމާ އެކު، ފަލަސްތީނުގެ މީހުންނަށް އެހީވުމަށް ފަންޑު ހޯދުމަށް މިއަދު ވަނީ ޓެލެތޯންއެއް ވެސް ފަށައިފަ އެވެ. މިއަދުން ފެށިގެން އަންނަ އަންގާރަ ދުވަހުގެ ނިޔަލަށް މި ޓެލެތޯން ކުރިއަށް ގެންދާނެ އެވެ.
ހުކުރު ނަމާދަށް ފަހު މިއަދު މާލޭގެ ހުރިހާ މިސްކިތްތަކެއްގެ ބޭރުގައި ފަންޑު ފޮށި ވެސް ވަނީ ބަހައްޓައިފަ އެވެ. އަދި އެ ފަންޑަށް އޮންލައިންކޮށް ފައިސާ ޖަމާކުރެވޭނެ އިންތިޒާމު ވެސް ވަނީ ހަމަޖައްސައިފަ އެވެ.
ފަލަސްތީނު ރައްޔިތުންގެ ހައްގުގައި ދިވެހިން އަޑު އުފުލަމުން އަންނައިރު، މިއަދު ދުނިޔޭގެ އެހެން ބައެއް ގައުމުތަކުގައި ވެސް އަންނަނީ މި ކަހަލަ ހަރަކާތްތައް ބާއްވަމުންނެވެ.
ހަމާސް އިން އިޒްރޭލަށް މިދިޔަ ހޮނިހިރު ދުވަހު ދިން ކުއްލި ހަމަލާތަކާ ގުޅިގެން އެ ސަރަހައްދުގެ ހާލަތު ވަނީ ވަރަށް ބޮޑަށް ނުރައްކާ ވެފަ އެވެ. ބަދަލުގައި އިޒުރޭލުން ވެސް ދަނީ ފަލަސްތީނަށް ބާރުގަދަ ހަމަލާތަކެއް ދެމުންނެވެ. އެ ހަމަލާތަކުގައި ގިނަ ބަޔަކު ދަނީ މަރުވަމުންނެވެ.