ޖުމްހޫރީ ވެރިކަމެއްގެ ފޮނިމީރުކަން ލިބޭނީ ސަރުކާރާއި އާންމުން ގުޅިގެން މަސައްކަތްކޮށްގެން ކަމަށް އިންތިހާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
މިއަދު ފާހަގަކުރާ ރާއްޖޭގެ 55 ވަނަ ޖުމްހޫރީ ދުވަހުގެ މުނާސަބަތުގައި މުއިއްޒު ފޮނުއްވި ވީޑިއޯ މެސެޖެއްގައި ވަނީ ދުވަހުގެ ތަހުނިޔާ އެންމެނަށް އަރިސްކުރައްވައިފަ އެވެ. އަންނަ ހުކުރު ދުވަހު އެމަނިކުފާނު ރާއްޖޭގެ ރައީސުލްޖުމްހޫރިއްޔާ ކަމުގެ ހުވާކުރައްވާނެ އެވެ.
އެ މެސެޖުގައި އިންތިހާބީ ރައީސް ވަނީ ރާއްޖޭގެ ޖުމްހޫރީ ވެރިކަން މިހާ ހިސާބަށް ގެނެސްދިނުމުގައި މަސައްކަތް ކުރެއްވި ހުރިހާ ރައީސުންނާއި ކެބިނެޓުގެ ވަޒީރުންނާއި ސިޔާސީ ޕާޓީތައް ހިމެނޭ ގޮތަށް ހުރިހާ ބޭފުޅުންނަށް ޝުކުރު އަދާކުރައްވައިފަ އެވެ.
"ޖުމްހޫރީ ވެރިކަމުގެ ފޮނިމީރުކަން ރައްޔިތުންނަށް ލިބިގެން ދާނީ، ރައްޔިތުންނާއި ސަރުކާރާ ގުޅިގެން، ގައުމު އިސްކޮށްގެން މަސައްކަތްތަކެއް ކުރެވިގެން،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި، މި ދަނޑިވަޅުގައި ގައުމަށް ހަމަޖެހުން ވަރަށް ބޮޑަށް ބޭނުންވެ އެވެ. ގައުމުގެ ކުރިއެރުމަށް އެންމެ އެކަތިގަނޑަކަށް ވާން މިހާރު ވަނީ ޖެހިފަ އެވެ. އެހެންވެ، އެގޮތުގައި އެންމެން ވެސް ކުރިއަށް ދިއުމަށް އެމަނިކުފާނު އިލްތިމާސްކުރެއްވި އެވެ.
ރާއްޖެ ޖުމްހޫރިއްޔަތަކަށް ބަދަލުވީ 1968 ވަނަ އަހަރުގަ އެވެ. މުއިއްޒަކީ އޭގެ ފަހުން ރާއްޖޭގެ ވެރިކަމަށް ވަޑައިގަންނަވާ އަށް ވަނަ ރައީސެވެ.