އަންނަ ހުކުރު ދުވަހު ރާއްޖޭގެ ރައީސުލްޖުމްހޫރިއްޔާ ކަމުގެ ހުވާކުރެއްވުމަށް ފަހު އެކުލަވާލައްވާ އެމަނިކުފާނުގެ ކެބިނެޓުގައި 22 މިނިސްޓަރުން ތިއްބަވާނެ ކަމަށާއި އެ ބޭފުޅުން ވާނީ ހިންގުމުގެ ހަރަދުތައް ބޮޑުނުކޮށް، ނަތީޖާ ނެރެދެއްވާނެ ބޭފުޅުންނަށް ކަމަށް އިންތިހާބީ ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
މިއަދު ފާހަގަކުރާ ރާއްޖޭގެ 55 ވަނަ ޖުމްހޫރީ ދުވަހުގެ މުނާސަބަތުގައި ދައުލަތުގެ މީޑިއާ ޕީއެސްއެމަށް ދެއްވި އިންޓަވިއުގައި މުއިއްޒު ވިދާޅުވީ އެމަނިކުފާނުގެ ކެބިނެޓް އެކުލަވާލައްވާނީ ރިޔާސީ އިންތިހާބުގެ ކެމްޕެއިންގައި ވައުދުވެވަޑައިގެންނެވި ގޮތަށް ކަމަށެވެ. އެ ވައުދުތައް ފުއްދަވައިދެއްވުމަށް އެމަނިކުފާނު ވެރިކަމަށް މި ވަޑައިގަންނަވަނީ ﷲގެ ވާގިފުޅާ އެކު އާންމުންނަށް ހިދުމަތް ކުރެއްވުމަށް ކަމަށް ވެސް ވިދާޅުވި އެވެ.
ކެމްޕެއިންގައި ވައުދުވެވަޑައިގެންނެވި ގޮތަށް ކެބިނެޓާއި ސަރުކާރުގެ ކުންފުނިތަކުގެ ވެރިންނަށާއި ސަރުކާރުގެ އިސް އެހެން މަގާމުތަކުގައި ވެސް ތިއްބަވާނީ އެމީހެއްގެ މައްޗަށް އެމަނިކުފާނަށް ފަހު ބަސް ބުނެވޭ އަދި އެހެން މީހެއްގެ ހުއްދަ ހޯދަން ނުޖެހޭ ފެންވަރުގެ ގާބިލު ބޭފުޅުން ކަމަށް މުއިއްޒު ވިދާޅުވި އެވެ.
"އަޅުގަނޑު ރައްޔިތުންނަށްޓަކައި ވީ ވައުދުތައް ރަނުން ރަނަށް ފުރިހަމަ ކޮމިޓްމެންޓާ އެކީގައި، ރެއާއި ދުވާލު ހޭލާ ހުރެގެން މަސައްކަތް ކުރަން ޖެހުނަސް ކުރެވޭ ވަރުގެ ބޭފުޅުންނޭ ލާނީ،" އިންތިހާބީ ރައީސް ވިދާޅުވި އެވެ.
މުއިއްޒު ވިދާޅުވި ގޮތުގައި، އެމަނިކުފާނުގެ ޓީމް ވާނީ ރައްޔިތުން ފަހުރުވެރިވާ ފަދަ ނަތީޖާ ނެރެދެވޭ، ތައުލީމީ އަދި ގާބިލު ޓީމަކަށެވެ.
"އެ ހުރިހާ ކަމެއް އެއްކޮށްލައިފައި އަދި އަޅުގަނޑު ދެންނެވިން ބޭނުމޭ އެންމެ އެކީގައި ކުރިއަށް ދާން. ގައުމަށް ހަމަޖެހުން އަންނަން ބޭނުމޭ. ބައިބައިވުމާއި ބަދަލުހިފުމާއި އަބަދު ދެކޮޅުވެރިކަމުގެ ރޫހުގެ ތެރޭގައި އަޅުގަނޑުމެން އަބަދު ކުރިއަށް ދާކަށް ބޭނުމެއް ނޫނޭ. ކުރިއަށް ދާން ބޭނުމީ އެކުވެރިކަމުގައި. ހަމަޖެހުން އަންނަން ބޭނުންވަނީ،" މުއިއްޒު ވިދާޅުވި އެވެ.
"އަޅުގަނޑު ބަލާފައި އޮންނާނީ އެ ހުރިހާ ކަމެއް ހާސިލުވާ ގޮތަށް ޓީމް އެކުލާވާލަން."
މުއިއްޒު ވިދާޅުވީ މިހާރު ސޯޝަލް މީޑިއާގައި އާންމުވެފައިވާ ކެބިނެޓް މިނިސްޓަރުންގެ ލިސްޓުގެ 90 ޕަސެންޓް ރަނގަޅު ކަމަށެވެ. ނަމަވެސް އަދިވެސް ކުދިކުދި ބަދަލުތައް އަންނާނެ ކަމަށް ވިދާޅުވި އެވެ.
އެމަނިކުފާނުގެ ވެރިކަމުގައި ވީހާ ވެސް ގިނަ އަންހެން ބޭފުޅުންނަށް ފުރުސަތު ދިނުމުގެ ގޮތުން، ސަރުކާރު ކުންފުނިތަކުގެ ވެރިންނަށް ހަ އަންހެން ބޭފުޅުން ނަގަން ނިންމައި މިހާރު ކޮންފަމޭޝަން ވެސް ދީފައިވާ ކަމަށް ވެސް ވިދާޅުވި އެވެ. މުއިއްޒު ވިދާޅުވި ގޮތުގައި، އެއީ ކުރީގެ ސަރުކާރުތަކާ އަޅާ ބަލާއިރު ވަރަށް ގިނަ އަދަދެކެވެ.
"އަޅުގަނޑު މިފަހަރު މި އެކުލަވާލާ ޓީމްގައި މިހާރު ވެސް އަޅުގަނޑު ކޮންފަމޭޝަން ދީފައި ވާނެ ހަ ބޭފުޅުންނަށް. ސަރުކާރުގެ 100 ޕަސެންޓް ހިއްސާވާ މުހިންމު ހަ ކުންފުންޏެއް މެނޭޖުކުރާނީ ކަމަށް ގާބިލު، ހިންގުންތެރިން އަންހެން ބޭފުޅުން،" މުއިއްޒު ވިދާޅުވި އެވެ.
މުއިއްޒު ވިދާޅުވި ގޮތުގައި، ކެބިނެޓާއި ސަރުކާރުގެ ކުންފުނިތައް އެއްކޮށްލާއިރު މިހާތަނަށް އެންމެ ގިނަ އަންހެން ބޭފުޅުން ހިމެނޭ ޓޮޕް ލެވެލް މެނޭޖުމަންޓް އޮންނާނީ މި ފެށޭ ސަރުކާރުގަ އެވެ.
ކެބިނެޓު އެކުލަވާލުމުގައި މުއިއްޒު އިސްކަން ދެއްވި ކަންކަން
• ދާއިރާއަކާ ގުޅޭ ނުވަތަ އެ ދާއިރާއަކުން ކިޔަވާ ވިދާޅުވެގެން ހުންނެވި ނުވަތަ އެ ދާއިރާއެއްގެ ތަޖުރިބާ ވީހާ ވެސް ރަނގަޅަށް ލިބިވަޑައިގެން ހުންނެވި ބޭފުޅަކު ނެގުން.
• މުއިއްޒު ހަވާލުކުރައްވާ އެއް ޕޯޓްފޯލިއޯއެއް ހިންގޭނެ ފަދަ އަދި އެ ދާއިރާއަކާ ވީހާ ވެސް ގާތް ގުޅުމެއް އޮތް، ވީހާ ވެސް ހިންގުންތެރި، މެނޭޖުމަންޓް ވައިސް އަދި ތަޖުރިބާގެ ގޮތުން ހިންގުންތެރި ބޭފުޅުން.
• ތައުލީމީ ރޮނގުން އެންމެ ދަށްވެގެން ފުރަތަމަ ޑިގްރީ ނެތް ބޭފުޅަކު ކެބިނެޓުގައި ނުހުންނާނެ.
• ޕީއެޗްޑީ ހޯލްޑަރުންގެ ގޮތުގައި ނުވަ ބޭފުޅުން ތިއްބަވާނެ.
• މާސްޓާސް ލެވެލްގެ އަށް ބޭފުޅުން ތިއްބަވާނެ.
"އެއިން ކޮންމެ ބޭފުޅަކީ އަޅުގަނޑަށް އެ ބޭފުޅަކާ މެދުގައި ފުރިހަމަ ޔަގީންކަން އޮތް ބޭފުޅުން. މި ދެންނެވީ ޑެލިވަރީ، ކޮމިޓްމެންޓް، ތެދުވެރިކަން. އަޅުގަނޑު ބޭނުން އަޅުގަނޑުގެ ސަރުކާރަކީ ސާފު ސަރުކާރަކަށް ހަދަން. ކޮރަޕްޝަނަށް ހަމަ ހަގީގަތުގައި ވެސް ސަރުކާރުން ނޫނެކޭ ބުނާނަން. ކެބިނެޓްގެ ބޭފުޅެއް ވިޔަސް، އެމްޑީއެއް ވިޔަސް ކޮރަޕްޝަނަށް ފުރުސަތެއް ނުދެއްވާނެ، އަޅުގަނޑަށް ޔަގީން،" މުއިއްޒު ވިދާޅުވި އެވެ.
އެމަނިކުފާނުގެ ޓީމްގައި ހިމެނޭ އެއްވެސް ބޭފުޅަކު ނަތީޖާ ނެރުމުގައި ފެއިލްވާ ނަމަ އެކަން ވެސް ބައްލަވާނެ ކަމަށާއި އާންމުންގެ ހިޔާލައި ފާޑުކިޔުމަށް ވެސް ޖާދަ ދެއްވާނެ ކަމަށް ވިދާޅުވި އެވެ.
މުއިއްޒު ވިދާޅުވީ މިނިސްޓްރީތައް އިތުރު ކުރެއްވީ އެއް މިނިސްޓްރީއެއްގެ މެންޑޭޓުގެ ދަށުން މާ ގިނަ ކަންކަން ކުރަން އުޅެގެން ނަތީޖާ ނުނެރެވޭ ކަން ތަޖުރިބާ ކުރެވިފައި ވާތީ ކަމަށެވެ. އޭނާގެ ކެބިނެޓުގައި 2-3 މިނިސްޓްރީއެއް އިތުރުވިޔަސް، ހިންގުމުގެ ހަރަދު ބޮޑުނުވާނެ ކަމުގެ ޔަގީންކަން ދެއްވި އެވެ.
"އަޅުގަނޑުމެން މިހާރު މިނިސްޓްރީތައް ވަކިކޮށްފައި އޮތީމަ، މިނިސްޓްރީތަކުގެ އަދަދު އިތުރު ވާނެ. އެއީ ފޯކަސްޑް މަސައްކަތްތަކެއް ކުރަން ވެގެން، ނަތީޖާ ނެރޭ ސީރިއަސް މަސައްކަތްތަކެއް ކުރަން ބޭނުންވާތީ. އެ މަސައްކަތް ކުރުމަށް ވަކިކޮށް ހަދާއިރުގައި ވެސް އަމިއްލަ އިމާރާތެއް ކުއްޔަށް ނަގައިގެން ރިކަރަންޓް ހަރަދު ބޮޑެއް ނުވާނެ،" މުއިއްޒު ވިދާޅުވި އެވެ.
ސަރުކާރުގެ ސިޔާސީ މަގާމުތައް ވެސް 700 އަށް ވުރެ އިތުރު ނުކުރައްވާނެ ކަމުގެ ޔަގީން މުއިއްޒު އަނެއްކާވެސް ދެއްވި އެވެ.