ރޯދައިގެ ކުރިން މަޖިލިސް އިންތިހާބު ބާއްވަން ހުށަހަޅައިފި

އަންނަ އަހަރު ބާއްވާ ރައްޔިތުންގެ މަޖިލީހުގެ އިންތިހާބު ރޯދަ މަހުގެ ފަހު 10 އަށް ދިމާވާތީ ރޯދައިގެ ކުރިން އިންތިހާބު ބޭއްވޭނެ ގޮތަށް ގާނޫނަށް އިސްލާހެއް ގެންނަން އިލެކްޝަންސް ކޮމިޝަން (އީސީ) އިން މަޖިލީހުގައި އެދެފި އެވެ.

މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި މިއަދު ވާހަކަ ދައްކަވަމުން އެ ކޮމިޝަންގެ ނައިބު ރައީސް އިސްމާއިލް ހަބީބް ވިދާޅުވީ 19 ވަނަ މަޖިލީހުގެ މެންބަރުންގެ ދައުރު 28 މެއި، 2024 އަށް ހަމަވާ އިރު ގާނޫނު ބުނާ ގޮތުން އޭގެ 120 ދުވަސް ކުރިން އިންތިހާބު ބޭއްވުމުގެ މަސައްކަތް ފަށަން ޖެހޭ ކަމަށެވެ.

ގާނޫނުގައި ބުނާ ތާރީހުތައް ތަރުތީބު ކޮށްލުމުން އިންތިހާބު ބޭއްވެނީ މާޗު 19 ގައި ކަމަށާއި ނަމަވެސް އެއީ ސްކޫލްތަކުގައި މޮކް އެގްޒާމް ކުރިއަށްދާ ދުވަސްކޮޅެއް ކަމަށް ހަބީބް ވިދާޅުވި އެވެ.

ވޯޓުލާ މަރުކަޒުގެ ގޮތުގައި އީސީން ބޭނުން ކުރަމުން އަންނަނީ ސްކޫލްތަކުގެ ހޯލްތަކެވެ. އެހެންވެ އިމްތިހާނުގެ ދުވަސްވަރާ ދިމާވާތީ އިންތިހާބު އޭގެ ފަހަށް ބާއްވަން ޖެހޭ ކަމަށް ހަބީބް ވިދާޅުވި އެވެ.

އެހެންވެ އެންމެ އަވަހަށް ވެސް އިންތިހާބު ބޭއްވެނީ މާޗު 30 ގައި ކަމަށައި އެއީ ރޯދަ މަހުގެ 20 ވަނަ ދުވަސް ކަމަށް ހަބީބް ވިދާޅުވި އެވެ.

އިންތިހާބުގެ ތާރީހުތައް އީސީން ރާވާ ގޮތް:

- ޖެނުއަރީ 30 އިން ފެބްރުއަރީ 15 އަށް އިންތިހާބަށް ކުރިމަތިލާން ހުޅުވާލުން

- ފެބްރުއަރީ 17 ގައި ގުރުއަތު ނަގައި ނަންތައް ތަރުތީބު ކުރުން

- ފެބްރުއަރީ 18 އިން ފެށިގެން 30 ދުވަހުގެ ކެމްޕެއިން މުއްދަތު ދިނުން

- މާޗު 30 ގައި އިންތިހާބު ބޭއްވުން

ރޯދަ މަސް ތެރޭގައި އަދި ވަކިން ހާއްސަކޮށް ފަހު 10 ގައި އިންތިހާބު ބާއްވަން ގިނަ ގޮންޖެހުންތަކެއް ދިމާވާނެ ކަމަށް ހަބީބް ވިދާޅުވި އެވެ.

އޮފިޝަލުން ހޯދުމާއި ތަމްރީން ކުރުމުގެ މަސައްކަތްތަކާއި އީސީގެ އެހެނިހެން މަސައްކަތްތައް ކުރުމަށް ބޮޑެތި ދަތިތަކެއް ކުރިމަތިވާނެ ކަމަށާއި އޭގެ އިތުރުން ރޯދައިގެ ތެރޭގައި ކެންޑިޑޭޓުން ކެމްޕެއިން ކުރުމަށް ވެސް ދަތިތަކެއް ހުންނާނެ ކަމަށް ހަބީބް ވިދާޅުވި އެވެ.

އެ މައްސަލަ ހައްލު ކުރުމަށް އީސީން ދެ ގޮތެއް ހުށަހެޅި އެވެ. އެއް ގޮތަކީ ގާނޫނުގައި ކެމްޕެއިން ކުރުމަށް ކެންޑިޑޭޓުންނަށް ދޭ 30 ދުވަހުގެ މުއްދަތު 20 ދުވަހަށް ކުރު ކޮށްލުމެވެ. އޭރުން ރޯދަ މަސް ފެށުމުގެ ދެ ދުވަސް ކުރިން މާޗު ނުވައެއްގައި އިންތިހާބު ބޭއްވިދާނެ ކަމަށް ހަބީބް ވިދާޅުވި އެވެ.

ދެވަނަ ގޮތަކީ ގާނޫނުގައި ބުނާ 120 ދުވަހުގެ މުއްދަތު 140 އަށް އިތުރު ކޮށްދިނުމެވެ. އޭރުން އިންތިހާބުގެ މަސައްކަތް ކުރިން ފަށައި އަވަހަށް އިންތިހާބު ބޭއްވިދާނެ ކަމަށް ވެސް އޭނާ ވިދާޅުވި އެވެ.

މި މައްސަލާގައި މިނިވަން މުއައްސަސާތަކާ ބެހޭ ކޮމިޓީން ގޮތެއް ނިންމަނީ އިތުރަށް މަޝްވަރާކޮށް ކަމާބެހޭ އެހެނިހެން ފަރާތްތަކުގެ ހިޔާލު ހޯދުމަށް ފަހު އެވެ.