ފަހި ދިރިއުޅުން ކޯޕަރޭޝަނުން ހުޅުމާލޭގައި ހަދަމުން އަންނަ ފްލެޓު ލިބުނު މީހުންނަށް ލިޔުން ދޭން ފަށާނީ އޭސީސީގެ ތަހުގީގު ނިންމައި ވަކި ގޮތެއް އެންގުމުން ކަމަށް، ހައުސިން މިނިސްޓަރު ޑރ. އަލީ ހައިދަރު އަހުމަދު މިއަދު ވިދާޅުވެއްޖެ އެވެ.
ގޯތި އަދި ފްލެޓުގެ ދާއިމީ ލިސްޓުގައި ހިމެނޭ މީހުންނަށް، މި ދެ ހަފުތާގެ ތެރޭގައި އެ ތަންތަނުގެ ރަޖިސްޓްރީ ހަވާލުކޮށް ނިންމާނެ ކަމަށް ރައީސް ޑރ. މުހައްމަދު މުއިއްޒު ވަނީ މިދިޔަ އަންގާރަ ދުވަހު ވިދާޅުވެފަ އެވެ. ނަމަވެސް، އޭސީސީން މިހާރު ވެސް އަންނަނީ ފްލެޓާ ގުޅޭ ގިނަ މައްސަލަތަކެއް ބަލަމުންނެވެ.
މިނިސްޓަރު ހައިދަރު "މިހާރު" އަށް ވިދާޅުވީ އޭސީސީގެ ތަހުގީގަށް މައުލޫމާތު ފޯރުކޮށްދީފައިވާ ކަމަށެވެ. އަދިވެސް ތަހުގީގު ނުނިމޭތީ ފްލެޓް ލިއުން އަދި ދޫނުކުރެވޭނެ ކަމަށް އޭނާ ވިދާޅުވި އެވެ.
މިނިސްޓަރު ކުރިން ވިދާޅުވެފައިވާ ގޮތުގައި ގާތްގަނޑަކަށް ދެތިން ހަފުތާގެ ތެރޭގައި މައްސަލަތައް ބަލައި ނިމޭނެ ކަމަށް އޭސީސީން އޮތީ ބުނެފަ އެވެ.
ފްލެޓުގެ ލިޔުން ހަވާލުކުރުން މި ވަގުތު ކުރިއަށް ނުގެންދިޔަސް، މިނިސްޓަރު ވިދާޅުވީ ބިމުގެ ރަޖިސްޓްރީ ހަވާލުކުރަމުން އަންނަ ކަމަށެވެ.
ކުރީގެ ސަރުކާރުން އިއުލާންކުރި ގެދޮރުވެރިޔާ ސްކީމްގެ ދާއިމީ ލިސްޓުގައި ފްލެޓަށް ޝަރުތު ހަމަވާ 13،000 މީހުން އެބަ ތިއްބެވެ. އޭގެ ތެރެއިން، އެންމެ ފުރަތަމަ ކަނޑައެޅީ 4،000 ފްލެޓް މީހުންނެވެ. ތިން ކޮޓަރި ދޭން ހަމަޖައްސާފައިވަނީ 76 ޕޮއިންޓަށް ވުރެ މަތިން ލިބޭ މީހުންނަށެވެ. އަދި ދެ ކޮޓަރީގެ ފްލެޓު ދޭނީ 73 ޕޮއިންޓަށް ވުރެ މަތިން ލިބުނު މީހުންނަށެވެ. ހައިދަރު ވިދާޅުވީ އެ ކްރައިޓީރިއާއަކަށް އެއްވެސް ބަދަލެއް ނުގެންނާނެ ކަމަށެވެ. އަދި ކުރީގެ ލިސްޓުގައި އެއްވެސް މައްސަލައެއް ނެތް ނަމަ، ހަމަ އެ ލިސްޓަށް، ފުރަތަމަ 4،000 ފްލެޓު ލިބުނު މީހުންނަށް ލިޔުން ދޭނެ ކަމަށް އޭނާ ވިދާޅުވި އެވެ.
"[އޭސީސީން ލިސްޓު ރިވިއުކުރަން އަންގައިފި ނަމަ]އެހެން ވިއްޔާ އެގޮތަށް އަމަލުކުރަން ޖެހޭނެ ދެއްތޯ." ހައިދަރު ވިދާޅުވި އެވެ.
މިހާރު ހަދަމުން އަންނަ ފްލެޓުތައް ލިބޭ މީހުން ކަނޑައެޅުމަށްފަހު، ދާއިމީ ލިސްޓުން ވެސް 9،000 މީހުން ބާކީވެ އެވެ.
މިނިސްޓަރު ވިދާޅުވީ އެ މީހުން ތިބޭނީ ފްލެޓުގެ ވެއިޓިން ލިސްޓުގައި ކަމަށެވެ. އޭރުން، މި ސަރުކާރުން ކުރިއަށްގެންދާ ހައުސިން މަޝްރޫއަށް ވަކިން ކުރިމަތިނުލިޔަސް ފްލެޓު ލިބޭނެ ކަމަށް އޭނާ ވިދާޅުވި އެވެ.
ހުޅުމާލޭގައި ފްލެޓު އެޅުމުގެ ޕްލޭނެއް އޮތް ކަމަށް ވިދާޅުނުވިޔަސް، އެ ފުރުސަތު އެބައޮތް ކަމަށް ހައިދަރު ވިދާޅުވި އެވެ.
އޭސީސީގެ މީޑިއާ އޮފިޝަލަކު ވިދާޅުވީ ފްލެޓުގެ މައްސަލަ ވީހާ ވެސް އަވަހަށް ނިންމަން ކުރަންޖެހޭ މަސައްކަތް ވަރަށް އިސްކަންދީގެން ކުރަމުން އަންނަ ކަމަށެވެ. އެކަމަށް ވަކި ހާއްސަ ޓީމެއް އެކުލަވާލައިގެން، ވަރަށް ބާރު ސްޕީޑުގައި މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.
