ރާއްޖޭގެ ހުރިހާ ސްކޫލެއްގައި މިއަދުން ފެށިގެން އެސެމްބްލީގައި ގައުމީ ސަލާމް ކިޔަން ފަށަން ފަށައިފި އެވެ.
މިދިޔަ އަހަރުގެ އޮގަސްޓް މަހު ފެށި ދިރާސީ އާ އަހަރުގެ ފުރަތަމަ ޓާމް ޗުއްޓީ އަށް ފަހު، ދެވަނަ ޓާމްގެ ކިޔެވުން މިއަދު ފެށީ ރާއްޖޭގެ ހުރިހާ ސްކޫލެއްގައި ވެސް އެސެމްބްލީގައި ގައުމީ ސަލާމާ އެކު އެވެ. ކޮންމެ ދުވަހަކު ވެސް ދެން ގައުމީ ސަލާމް ކިޔާނެ އެވެ.
މިއީ، ގައުމިއްޔަތު ދިރުވުމުގެ ގޮތުން ރައީސް ޑރ. މުހަންމަދު މުއިއްޒު ނިންމެވި ނިންމެވުމެކެވެ. ރައީސް ވިދާޅުވެފައިވާ ގޮތުގައި އެ ގޮތަށް ނިންމެވީ ގައުމު ދެކެ ލޯބިވާ ކުދި ބަޔަކަށް ދަރިވަރުން ހެދުމަށާއި ގައުމީ ސަލާމާއި ގައުމީ ދިދަ ދެކެ ލޯބިވާ ބަޔަކަށް ތުއްތު ކުދިން ހެދުމަށެވެ.
ރާއްޖޭގެ ސްކޫލްތަކުގައި މި އަހަރު 84،200 ދަރިވަރުން ކިޔަވަމުން ގެންދެ އެވެ.
މި އަހަރަކީ، އަހަރުގެ މެދު ތެރެއިން ދިރާސީ އާ އަހަރު ފަށާނެ އެންމެ ފަހު އަހަރެވެ. ސަރުކާރުން ވަނީ އަންނަ އަހަރުގެ ކިޔެވުން އަނެއްކާ ވެސް ޖެނުއަރީ މަހު ފަށާ ގޮތަށް ބަދަލުކުރަން ނިންމައިފަ އެވެ. ނަމަވެސް އެ ބަދަލު ގެނެސް ކިޔަވައިދޭން ފަށާނެ ގޮތެއް އަދި ސަރުކާރުން ހާމައެއް ނުކުރެ އެވެ.