މާލޭގައި ޕިކަޕެއްގެ ތެރޭގައި އާއްމު އިޖުތިމާއީ މިންގަނޑާ ހިލާފު ވައްތަރުތަކެއް ޖެއްސި ފިރިހެނަކާ ގުޅޭ މައުލޫމާތު އެނގޭ ނަމަ އެކަން ހިއްސާކޮށްދިނުމަށް ފުލުހުން މިއަދު އެދިއްޖެ އެވެ.
ފުލުހުން އެކްސްގައި ކުރި ޕޯސްޓެއްގައި ބުނީ، ޕިކަޕެއްގެ ތެރޭގައި ހުރެ، އާއްމުންނަށް ފެންނާނެ ގޮތަށް އިޖުތިމާއީ މިންގަނޑާ ހިލާފު ވައްތަރު ޖެއްސި މީހާ ދަނެގަތުމުގެ މަސައްކަތް ފަށައި، އެކަން ތަހުގީގު ކުރަމުން އަންނަ ކަމަށެވެ.
އެ މީހާއާ ގުޅޭ އެއްވެސް މައުލޫމާތެއް ލިބިފައިވާ ނަމަ ހެންވޭރު ޕޮލިސް އިންވެސްޓިގޭޝަންގެ ނަންބަރު 9400053 އަށް ގުޅައި އެކަން ހިއްސާކޮށްދިނުމަށް ފުލުހުން އެދުނެވެ.
ސޯޝަލް މީޑިއާގައި އިއްޔެ ދައުރުވި ވީޑިއޯ އިން ފެންނަނީ ދުވާލުގެ ވަގުތެއްގައި ފިރިހެނަކު، ހަޑިހުތުރު ވައްތަރުތަކެއް ޖައްސާ ތަނެވެ.
އެ ޕިކަޕްގެ ތެރޭގައި އިތުރު ފިރިހެނަކު ހުރިއިރު އެކަން ހުއްޓުވަން އެއްވެސް ކަމެއް ކުރާ ތަނެއް ނުފެނެ އެވެ.
އެ ވީޑިއޯއިން ވެސް ޕިކަޕްގެ ނަމްބަރު ސާފުކޮށް ފެނެ އެވެ.