ހދ. ކުޅުދުއްފުށިން ކަރަންޓު ކެނޑޭ މައްސަލަ ހައްލުކުރަން މާދަމާ ޖަނަރޭޓަރެއް އެ ރަށަށް ފޮނުވާނެ ކަމަށް ފެނަކަ އިން މިއަދު ބުނެފި އެވެ.
ކުޅުދުއްފުއްޓަށް ކަރަންޓު ދިނުމަށް ހަތް ޖަނަރޭޓަރު ބޭނުންކުރެ އެވެ. ހޫނު ގަދަވުމުގެ ސަބަބުން ލޯޑް ނުހިފެހެއްޓި، އެ ރަށުގައި ހުރި ޖަނަރޭޓަރުތަކުން ރަށަށް ބޭނުންވާ ވަރަށް ކަރަންޓު ނުއުފެއްދޭތީ ކޮންމެ ދުވަހަކު ވެސް ވަކި ގަޑިތަކެއްގައި ޖެހެނީ ރަށުން ކަރަންޓު ކަނޑާށެވެ.
އެކަމާ އެ ރަށު ރައްޔިތުން އަންނަނީ ކަންބޮޑުވުން ފާޅުކުރަމުންނެވެ.
ފެނަކައިގެ މެނޭޖިން ޑިރެކްޓަރު މުއާޒް މުހައްމަދު ރަޝީދު "މިހާރު" އަށް ވިދާޅުވީ، ކުޅުދުއްފުއްޓަށް ދިމާވެފައިވާ ކަރަންޓްގެ މައްސަލައަށް ވަގުތީ ހައްލެއް ގެނައުމަށް 800 ކިލޯވޮޓްގެ ޖަނަރޭޓަރެއް މިހާރު ފޮނުވާފައިވާ ކަމަށެވެ.
"ކުޅުދުއްފުއްޓަށް މިހާރު އެބަ ފޮނުވަން 800 ކިލޯވޮޓުގެ ޖެންސެޓެއް. އެ ޖެންސެޓެއް މާދަމާ އެ ރަށަށް ލިބޭނެ،" އޭނާ ވިދާޅުވި އެވެ.
އެ ޖަނަރޭޓަރު ގެންދެވުމުން މިހާރު ކަރަންޓް ކަނޑަމުންދާ މައްސަލައަށް ވަގުތީ ހައްލެއް ލިބޭނެ ކަމަށް މުއާޒް ވިދާޅުވި އެވެ.
އެ ރަށު ކަރަންޓު މައްސަލައަށް ދާއިމީ ހައްލެއް ގެނައުމަށް ބޭނުންވަނީ 1.2 މެގަވޮޓުގެ ޖަނަރޭޓަރެއް ކަމަށާއި އެ ގަތުމަށް މިހާރު ހަވާލުކޮށްފައިވާ ކަމަށް އޭނާ ވިދާޅުވި އެވެ.
"ގަންނަންދީފައި، މިހާރު އެ އައުމުގެ މަގުމަތީގައި ވަނީ. އެއަށްވުރެ ކުރިން ވެސް ހައްލުވާނެ ގޮތެއް ހޯދަން އަޅުގަނޑުމެން މާދަން މި ޖެންސެޓް ފޮނުވަނީ،" މުއާޒް ވިދާޅުވި އެވެ.