ޝަކީބް 35 އަހަރުގެ ހިދުމަތަށް ފަހު ރިޓަޔާ ކުރައްވައިފި

ތައުލީމީ ދާއިރާ އާއި މީޑިއާގެ ދާއިރާގައި 35 އަހަރަށް ވުރެ ދިގު މުއްދަތަކަށް ހިދުމަތް ކުރެއްވި އަހްމަދު ޝަކީބް (ޝަކިއްބެ) ސަރުކާރުގެ ހިދުމަތުން ރިޓަޔާ ކުރައްވައިފި އެވެ.

ނޭޝަނަލް އިސްޓިޓިއުޓް އޮފް އެޑިއުކޭޝަން (އެންއައިއީ) ގެ ޑިރެކްޓާ ޖެނެރަލްގެ މަގާމުގައި އެންމެ ފަހުން ހުންނެވި ޝަކީބް ފޭސްބުކްގައި އިއްޔެ ކުރެއްވި ޕޯސްޓެއްގައި ވަނީ މި މަހު ފުރަތަމަ ދުވަހުން ފެށިގެން އޭނާ އެ މަގާމުން އިސްތިއުފާ ދެއްވައި، ހިދުމަތުން ރިޓަޔާ ކުރެއްވިކަން ކަށަވަރުކޮށް ދެއްވައިފަ އެވެ.

އޭގެ ކުރިން އޭނާ ހުންނެވީ ޑިޕާޓްމަންޓް އޮފް ޕަބްލިކް އެގްޒަމިނޭޝަން (ޑީޕީއީ)ގެ ޑިރެކްޓާ ޖެނެރަލްގެ މަގާމުގަ އެވެ. އެ މަގާމުގައި އޭނާ 16 އަހަރު ހުންނެވި އެވެ. އަދި އޭގެ ކުރިން ވެސް ތައުލީމީ ދާއިރާގެ އެކި މަގާމުތައް ފުރުއްވާފައިވެ އެވެ.

"މި ހިނގާ ޖުލައި މަހުގެ އެއް ވަނަ ދުވަހުން ފެށިގެން އަޅުގަނޑުގެ ކަރުން ޓައީގެ ގޮށް މޮހާލައި، މިނިވަން ވެއްޓެއްގައި ހިދުމަތްކުރުމުގެ އާ ބާބެއް ލިޔަން ފަށައިފީމެވެ. މިހާރު ނޭވާ ލާން ހާދަހައި ފަސޭހަވެއްޖެ އެވެ. އެންމެ މަތިވެރި، އޯގާވަންތަ، ދީލަތިވަންތަ، ﷲ އަށް ހަމްދުކުރަމެވެ،" އެ ޕޯސްޓުގައި އޭނާ ވިދާޅުވި އެވެ.

ޝަކީބް ތައުލީމީ ދާއިރާއަށް ހިދުމަތް ކުރައްވަން ފެށްޓެވީ 1985 ވަނަ އަހަރު އެވެ. އޭގެފަހުން އެ ދާއިރާގެ އިސް މަގާމުތައް އަދާ ކުރެއްވި ޝަކީބް 35 އަހަރާއި ހަތް މަސް ވަންދެން އެ ދާއިރާއަށް ހިދުމަތް ކުރެއްވިއިރު، އެ މުއްދަތުގައި ޓީވީއެމްގެ ޕްރެޒެންޓަރެއްގެ ގޮތުގައި މަސައްކަތް ކުރެއްވި އެވެ.

"ތައުލީމީ ދާއިރާގައްޔާއި މީޑިއާގެ ދާއިރާއިން ލިބުނު ގިނަގުނަ ފުރުސަތުތައް އަޅުގަނޑު ބޭނުންކޮށްފައި ވާނީ މީހުން ހޭލުންތެރި ކުރުމަށެވެ،" އޭނާ ވިދާޅުވި އެވެ.

ޝަކީބް ވިދާޅުވީ އޭނާއަށް އިރުޝާދު ދެއްވި ވެރިންނަށާއި އަދި އޭނާއާ އެކު މަސައްކަތް ކުރެއްވި ބޭފުޅުންނާއި އަދި އޭނާގެ އިރުޝާދަށް މަސައްކަތް ކުރެއްވި ބޭފުޅުންނަށް ހިތުގެ އަޑިން ޝުކުރު ދަންނަވާ ކަމަށެވެ.

އޭނާ ވަނީ އޮސްޓްރޭލިއާގެ ގްރިފްތު ޔުނިވާސިޓީން ތައުލީމީ ދާއިރާއިން ޑިގްރީ އަދި އެންވަޔަރަމެންޓަލް އެޑިއުކޭޝަންގެ ދާއިރާއިން މާސްޓާސް ޑިގްރީ ވެސް ހާސިލް ކުރައްވައިފަ އެވެ.