އެމްއެމްޕީއާރުސީން ގެއްލުނު 640 މިލިއަން ހޯދަން އެންގިޔަސް ދައުވާ ކުރާނެ ބަޔަކު ނުވެ އެތައް ދުވަހެއް!
އެމްއެމްޕީއާރްސީގެ ނައިބު ރައީސް އަބްދުއްސަލާމް: އެމްއެމްޕީއާރްސީއިން ގެއްލުނު 640 މިލިއަން ހޯދަން އެންގި ކަމަށާއި ނަމަވެސް ދައުވާއެއް ނުކުރާ ކަމަށް ވިދާޅުވި - ފޮޓޯ: ފަޔާޒު މޫސާ / މިހާރު
16 ޖުލައި 2024 - 15:50
6 comments
އެމްއެމްޕީއާރުސީގެ ހިޔާނާތާ ގުޅޭ 115 މައްސަލައެއްގެ ތަހުގީގު ނިންމައި 640 މިލިއަން ރުފިޔާ ދައުލަތަށް އަނބުރާ ހޯދަން އެ ކޯޕަރޭޝަނާއި ބަންޑާރަ ނައިބުގެ އޮފީހަށް އަންގާފައިވާނެ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ބުނެފި އެވެ.
އެ ކޮމިޝަނުން އެހެން ބުނީ، އެމްއެމްޕީއާރުސީގެ ހިޔާނާތުގެ ތަހުގީގާ ގުޅޭ ގޮތުން، ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީގައި މެންބަރުން ކުރެއްވި ސުވާލުތަކަށް ދިން ޖަވާބުގަ އެވެ.
އޭސީސީގެ ނައިބު ރައީސް އަބްދުއްސަލާމް ވިދާޅުވީ އެމްއެމްޕީއާރުސީގެ ހިޔާނާތާ ގުޅިގެން 166 މައްސަލައެއް އެ ކޮމިޝަނުން ތަހުގީގު ކުރަން ހަވާލުވި ކަމަށާއި އެއީ ގާތްގަނޑަކަށް 948 މިލިއަން ރުފިޔާ ހިމެނޭ މައްސަލަތައް ކަމަށެވެ.
އޭގެ ތެރެއިން 115 މައްސަލައެއް ނިންމާފައިވާ ކަމަށާއި އެ މައްސަލަތަކުން ދައުލަތަށް ގެއްލުނު ކަމަށް ފާހަގަކުރެވުނު 640 މިލިއަން ރުފިޔާ ހޯދަން ދައުލަތަށް އަންގާފައިވާނެ ކަމަށް ވެސް ސަލާމް ވިދާޅުވި އެވެ.
އެކަމަކު، އެ ފައިސާ ހޯދަން މިހާތަނަށް ދައުވާ ކޮށްފައި ނުވާ ކަމަށް ސަލާމް ވިދާޅުވި އެވެ.
ކޮމިޓީގެ ބައްދަލުވުމުގައި އޭސީސީގެ މެންބަރުން: އެމްއެމްޕީއާރްސީއިން ގެއްލުނު 640 މިލިއަން ހޯދަން އެންގި ކަމަށާއި ނަމަވެސް ދައުވާއެއް ނުކުރާ ކަމަށް ވިދާޅުވި - ފޮޓޯ: ފަޔާޒު މޫސާ / މިހާރު
އޭނާ ވިދާޅުވި ގޮތުގައި، ފައިސާ ހޯދަން ދައުވާ ކުރުމުގެ ގާނޫނީ ބާރު އޭސީސީއަކަށް ނޯވެ އެވެ. އެހެންކަމުން އެކަން ކުރުމަށް އެމްއެމްޕީއާރުސީ އަދި ބަންޑާރަ ނައިބުގެ އޮފީހުގައި ވެސް އެކި ފަހަރު މަތިން ދެންނެވި ކަމަށް ސަލާމް ވިދާޅުވި އެވެ.
ދައުވާ ކުރާނީ އެމްއެމްޕީއާރުސީން ތޯ ނޫނީ ބަންޑާރަ ނައިބުގެ އޮފީހުން ތޯ ބަހުސް ކުރަން މިވީހާ ދުވަހު ވެސް ތިބީ ކަމަށް ސަލާމް ވިދާޅުވި އެވެ.
ނަމަވެސް އޭނާ ވިދާޅުވީ މިހާރު އެމްއެމްޕީއާރުސީން ވަނީ އޭސީސީ އިން ހޯދަން އަންގާފައިވާ ފައިސާތަކާ ގުޅޭ ގޮތުން ދައުވާ ކުރަން ނިންމާފައިވާ ކަމަށާއި އެކަމާ ގުޅޭ ގޮތުން އެ ކުންފުންޏާ އެކު ވަރަށް އަވަހަށް މަޝްވަރާ ކުރާނެ ކަމަށެވެ.
ސަލާމް ވިދާޅުވި ގޮތުގައި، އޭސީސީން ހޯދަން އަންގާ ފައިސާ ދައުލަތުގެ އިދާރާތަކުން ނުހޯދައި ތިބޭ މައްސަލަ ވަރަށް ބޮޑެވެ. އެހެންކަމުން އެގޮތަށް އަމަލު ކުރާ ފަރާތްތަކާ މެދު ފިޔަވަޅު އަޅަން އޭސީސީން ނިންމާފައިވާ ކަމަށް އޭނާ ވިދާޅުވި އެވެ. އެކަން ރައްޔިތުންނަށް ފެންނަ ގޮތަށް ހާމަ ކުރާނެ ކަމަށް ވެސް ސަލާމް ވިދާޅުވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ދޭހިލޭ
17 July 2024
ޑިމޮކްރަސީއޭ ކިޔާ އެއްޗެއް އައި ފަހުން ކަރަޕްޝަނޭ ކިޔާ އެއްޗެއް އޮވޭތަ! ކޮންމެ ސަރުކާރެއް ނިމޭއިރު ކުރިއަށްވުރެ ބޮޑަށް ގައުމު ދެރުމާއި، ސަރުކާރުގެ ވެރިންގެ ޖީބުތައް ފުރުން ނޫން ކަމެއް ނުވޭ. އަންނަ ބަޔަކުވެސް އަންނަނީ ހިސާބުޖަހައިގެން. ވައުދު ފުއްދަން އެ ޖަހާ ހިސާބު ނިމޭއިރު ފެންނާނީ ހަމަ ކުރީގެވެސް މަންޒަރު. މިހާރު މިއަށް ކޮރަޕްޝަނޭ ނުކިޔައި، ޖީބުފުރާލުމޭ ކިޔަންވީ. ބަންޑާރަކަފަ އަމިއްލަ ބާލީހަށް ލެއްވުމާބެހޭ އޮފީހުން ރިޕޯޓު ލިޔުނީމާ ނިމުނީ.
ކޮބާ ބަލަނީ ދޯ
16 July 2024
ޢަމުރު ކިޔާ މީހަކު އެސްޓީއޯ ގަ ހުރެގެން އަނބުރާ ދައްކާ ގޮތަށް ވަކި ބަޔަކަށް ދިން އެތައް މިލިޔަން ރުފިޔާގެ ތެޔޮ އަނބުރާ ލިބިއްޖެހޭ..ގޯތި ގަނެ ގެ އަޅާ ނިމިއްޖެޔޭ..ނުބަލާތި..
މިއައު
16 July 2024
މި މީހުންގެ މަސައްކަތް ހުންނަށް ގޮތުން ހީވޭ މިރާއްޖޭގަ ކަރަޕްޝަނޭ ކިޔާ އެއްޗެއް ނެތްހެން. އެހެންނޫންނަމަ މިހާރު ދެން ކޮންމެސް އެއްޗެއް ހޯދާނެއެއްނުން
4
16 July 2024
ތީ ބޭކާރު ކަމެއް. ތިކަމާނޫޅެ ދެން ރަށުތެރެއިން ކޮންމެވެސް އެހެންކަމަކާ އުޅޭ.
ފަލީމް
16 July 2024
އަދީބް ފިލުވީ އިބޫ ސަރުކާރުން ޑީލް ހަދާފަ..ދެންކޮން ފައިސާއެއް ހޯދަން ތިއުޅެނީ..
އަފްރާސިޔާބު
16 July 2024
އިބޫ ސަރުކާރުން ފިލުވީމާ ހޯދަންވެސް އެނގޭނެ ދޯ؟ ކޮބާ ޕީޕީއެމް ސަރުކާރުގެ ވަޒީރުންއި މަޖިލީހުގެ މެންބަރުން. އެމީހުންވެސް ފިލުވީދޯ؟ ނާ އެހެނެއްނޫން. ގިނަމީހުން އޮތީ ރަށްތައް ވިއްކައިގެން ލިބުނު ކަޓުގައި ޖެހިފައި. ނަންވާނީ އަދީބު. ގާނޫނު ބަދަލު ކޮށް އަދީބަށް ފުރުސަތު ތަންމިނަށް ހުޅުވާ ދީފައި އޮތީ ޓޫރިޒަމުގެ ތެރެއިން އެވައްކަން ކުރަން.