ވެލާނާ އިންޓަނޭޝަނަލް އެއާޕޯޓް (ވީއައިއޭ) ގައި ހިނގާ އަލިފާނުގެ ހާދިސާތަކަށް ތައްޔާރުވުމުގެ ގޮތުން މޯލްޑިވްސް އެއާޕޯޓު ކޮމްޕެނީ ލިމިޓެޑް (އެމްއޭސީއެލް) އިން ބޭސިކް ފަޔާ ފައިޓާ ކޯހެއް މިއަދު ފަށައިފި އެވެ.
އެ ކުންފުނިން ބުނިގޮތުގައި، ފަޔާ ފައިޓަރުން ތަމްރީނު ކުރުމުގެ 29 ބެޗުގެ ކޯހުގައި އޭވިއޭޝަން ސޭފްޓީ އާއި އިމަޖެންސީ ހާލަތްތަކުގައި ފުރިހަމައަށް އަމަލުކުރާނެ ގޮތްތައް ވެސް ކިޔައިދޭނެ އެވެ.
އެމްއޭސީއެލުން ބުނީ 43 ދުވަހުގެ އެ ކޯހަކީ މޯލްޑިވްސް ސިވިލް އޭވިއޭޝަން އޮތޯރިޓީން އެޕްރޫވް ކޮށްފައިވާ ކޯހެއް ކަމަށެވެ. ކޯހުގައި 12 ފަޔާ ފައިޓަރުންގެ ގްރޫޕެއް ތަމްރީނު ކުރަމުން އަންނައިރު، ވެލާނާ އިންޓަނޭޝަނަލް އެއާޕޯޓާއި މަތިންދާބޯޓުގައި ހިނގާ އަލިފާނުގެ ހާދިސާތަކުގައި އަމަލުކުރާނެ ގޮތް ކިޔައިދޭނެ ކަމަށް އެއާޕޯޓު ހިންގާ އެ ކުންފުނިން ބުންޏެވެ.
އެމްއޭސީއެލުން ފަޔާ ފައިޓަރުން ތަމްރީނުކުރަމުން އަންނައިރު، މިފަހުން އެ ކުންފުނިން ވަނީ ފަހުގެ ޓެކްނޮލޮޖީތައް ހިމެނޭ ފަޔާ ސްޓޭޝަނެއް ވެސް އެއާޕޯޓުގައި ހުޅުވައިފަ އެވެ. މިއީ އިމަޖެންސީ ހާލަތްތަކުގައި އަވަހަށް ރެސްޕޮންޑް ކުރުމަށް ކުރެވޭ މަސައްކަތަށް އިތުރުވި ކަމެއްގެ ގޮތުގައި އެ ކުންފުނިން ސިފަ ކުރެ އެވެ.