އިންޑިއާގެ އިންސްޓެންޓް ޕޭމެންޓް ސިސްޓަމް، ޔުނިފައިޑް ޕޭމެންޓްސް އިންޓަފޭސް (ޔޫޕީއައި) ގެ ދަށުން ރޫޕޭ ކާޑު ރާއްޖެއަށް ތައާރަފްކޮށްފި އެވެ.
ރޫޕޭ ކާޑު ރާއްޖޭގައި ބޭނުންކުރެވޭ ގޮތް ހަދާފައި ވަނީ ރައީސް ޑރ. މުހައްމަދު މުއިއްޒު އިންޑިއާއަށް ކުރައްވަމުން ގެންދަވާ ދަތުރުފުޅުގައި، ދެ ގައުމުގެ ރަސްމީ މަޝްވަރާތަކަށް ފަހު ބޭއްވި ރަސްމިއްޔާތުގަ އެވެ.
ރައީސް އާއި އިންޑިއާގެ ބޮޑުވަޒީރު ނަރެންދުރަ މޯދީގެ ބައްދަލުކުރެއްވުމަށް ފަހު، ދެ ބޭފުޅުން އެކުގައި ދެއްވި މީޑިއާ ސްޓޭޓްމަންޓް ފެއްޓެވުމުގެ ކުރިން ވަނީ ރާއްޖޭގައި، ރުޕޭ ކާޑުގެ ފުރަތަމަ ޓްރާންސެކްޝަން ހެދި މަންޒަރު ލައިވްކޮށް ދައްކާލައިފަ އެވެ. ރާއްޖޭގައި، އެ ޓްރާންސެކްޝަން ހެދީ އޮތެންޓިކް މޯލްޑިވްސް ފިހާރައެއްގަ އެވެ.
މި ހިދުމަތް ރާއްޖޭގައި ފެށިއިރު، މީގެ ކުރިން ސިންގަޕޫރާއި ޔޫއޭއީ ފަދަ ގައުމުތަކާ އެކު ޖުމްލަ 185 ގައުމެއްގައި ބޭނުން ކުރެ އެވެ.
ޔުޕީއައި ޕޭމެންޓް އިންޑިއާގައި ތައާރަފްކުރީ 2016 ވަނަ އަހަރެވެ. އެއީ މޯބައިލް ފޯނު މެދުވެރިކޮށް އިންޓަ ބޭންކް މުއާމަލާތްތައް ކުރެވޭނެ އިންތިޒާމު ހަމަޖެއްސުމަށް އެންޕީސީއައި އިން އުފައްދާފައިވާ ރިއަލް ޓައިމް ޕޭމަންޓް ސިސްޓަމެކެވެ.
ރާއްޖޭގައި ރޫޕޭ ކާޑު ބޭނުންކުރަން ފެށުން ވެގެންދާނީ ރާއްޖޭގައި ދިރިއުޅޭ އިންޑިއާގެ ރައްޔިތުންނަށް ފައިސާގެ މުއާމަލާތް ކުރުމަށް ލިބިގެންދާނެ ބޮޑު ފަސޭހައަކަށެވެ. އަދި ގިނަ އަދަދެއްގެ ދިވެހިން ވެސް އިންޑިއާގައި ދިރިއުޅެމުން އަންނައިރު ރޫޕޭ ކާޑު ބޭނުންކޮށްގެން ދެ ގައުމުގައި ވެސް ވިޔަފާރިކުރުމުގެ ފުރުސަތު ލިބޭނެ އެވެ.
ރާއްޖެއަށް ރޫޕޭ ކާޑު ތައާރަފްކުރުމަކީ އެ ގައުމުން އަންނަ ޓޫރިސްޓުންނަށް ވެސް ފައިސާގެ މުއާމަލާތް ކުރުމުގައި ލިބޭނެ ވަރަށް ބޮޑު ލުޔެކެވެ.
އިކޮނޮމިކް މިނިސްޓްރީން ބުނީ އިންޑިއާގެ ޓޫރިސްޓުންނަކީ ރާއްޖޭގެ ޓޫރިޒަމްގައި މުހިއްމު ދައުރެއް އަދާކުރާ ބައަކަށް ވާތީ ރާއްޖޭގައި ފަސޭހަކަމާ އެކު މުއާމަލާތްތައް ހިންގަން އެ ކާޑު ބޭނުން ކުރެވޭނެ ކަަމަށެވެ.
"އިންޑިއާ އަކީ ދިވެހިރާއްޖޭގެ ވިޔަފާރީގެ މުހިއްމު ބައިވެރިއަކަށް ވެފައި ރޫޕޭ ކާޑުގެ ހިދުމަތުގެ ސަބަބުން ދެ ގައުމުގެ ދެމެދު ކުރެވޭ މާލީ މުއާމަލާތްތައް ފަސޭހަކުރެވި ވިޔަފާރި އިތުރަށް ފުޅާކުރަން މަގުފަހިވެ ވަކިން ހާއްސަކޮށް ކުދި އަދި މެދުފަންތީގެ ވިޔަފާރިތަކުން އިންޑިއާއާ އެކު ވިޔަފާރި ކުރުމުގައި ލުއިތަކެއް ލިބޭނެ ކަން ފާހަގަކުރަމެވެ،" މިނިސްޓްރީން ނެރުނު ބަޔާނުގައިވެ އެވެ.
ރާއްޖޭގައި ރޫޕޭ ކާޑުގެ ހިދުމަތް ފަށާފައި މިވަނީ މިދިޔަ އޮގަސްޓް މަހުގެ ތެރޭގައި އިންޑިއާގެ އެކްސްޓާނަލް އެފެއާޒް މިނިސްޓަރު ސުބްރަމަނިއަމް ޖައިޝަންކަރު ރާއްޖެއަށް ކުރެއްވި ދަތުރުފުޅުގެ ތެރެއިން ސޮއި ކުރި އެމްއޯޔޫއެއްގެ ދަށުންނެވެ. މިއީ، އިކޮނޮމިކް މިނިސްޓްރީ އާއި ނޭޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި)އާ އެކު ސޮއި ކުރި އެމްއޯޔޫއެކެވެ.
ޖައިޝަންކަރު ވެސް ވިދާޅުވެފައި ވަނީ އެ އެމްއޯޔޫގެ ސަބަބުން ޓޫރިޒަމަށް ވަރަށް ބޮޑު ފައިދާއެއް ކުރާނެ ކަމަށެވެ.
އެމްއޯޔޫގައި ސޮއިކޮށް އިކޮނޮމިކް މިނިސްޓްރީން ނެރުނު ބަޔާނުގައި ބުނީ ޔޫޕީއައި ޕޭމަންޓް ހިދުމަތާ އެކު އީ ކޮމާސްގެ ދާއިރާ އިތުރަށް ތަރައްގީކޮށް، މާލީ ބާޒާރުގައި ބައިވެރިވުމުގެ ފުރުސަތު ބޮޑުވާނެ ކަމަށެވެ.
ރޫޕޭގެ ހިދުމަތް ފެށުމުގެ އިތުރުން އެ ރަސްމިއްޔާތުގައި ވަނީ ހަނިމާދޫ އިންޓަނޭޝަނަލް އެއާޕޯޓުގެ އާ ރަންވޭ އިފްތިތާހުކުރުމުގެ އިތުރުން ހުޅުމާލޭ ދެވަނަ ފިޔަވަހީގައި އިންޑިއާ އިން ހަދާފައިވާ 700 ހައުސިން ޔުނިޓްގެ މަސައްކަތް ނިންމައި ހަވާލުކޮށްފަ އެވެ.