ސަރުކާރުން ލާމަރުކަޒީ ގާނޫނަށް ގެނައި އިސްލާހުތަކާ އެކު، ކައުންސިލްތަކަށް ލިބިދޭ ބާރުތައް ކަނޑުވާލަން އުޅޭ ކަމަށް ބުނެ އިދިކޮޅު އެމްޑީޕީން "ލާމަރުކަޒީ ގުޅުން" ނަމުގައި ހާއްސަ ކޮންފަރެންސެއް މިއަދު ފަށައިފި އެވެ.

މި ކޮންފަރެންސް މިއަދު ހެނދުނު ފެށީ ހދ. ކުޅުދުއްފުށިންނެވެ.

އެމްޑީޕީން ކުރިން ބުނެފައިވާ ގޮތުގައި، އެކި ފިޔަވަހިތަކަށް ބަހާލައިގެން މި ކޮންފަރެންސް ރާއްޖޭގެ އެކި ހިސާބުތަކުގައި ބޭއްވުމަށް ވަނީ ހަމަޖެހިފަ އެވެ. މިއަދު ފެށި މި ކޮންފަރެންސްގެ ފުރަތަމަ ފިޔަވަހީގައި ރާއްޖޭގެ އުތުރު އެކި އަތޮޅުތަކުގައި ކޮންފަރެންސް ކުރިއަށް ގެންދިއުމަށް ވަނީ ނިންމައިފަ އެވެ.

އެމްޑީޕީގެ ''ލާމަރުކަޒީ ގުޅުން'' ކޮންފަރެންސް ފެށުމަށް ހދ. ކުޅުދުއްފުށީގައި ބޭއްވި ބައްދަލުވުމުގައި އައްޑޫގެ މޭޔަރު އަލީ ނިޒާރާއި މަރަދޫ ދާއިރާގެ މެމްބަރު އަހްމަދު ދީދީ އަދި އެމްޑީޕީގެ ޗެއާޕާސަން ފައްޔާޒް އިސްމާއިލް ބައިވެރިވެވަޑައިގަންނަވަނީ.-- ފޮޓޯ: އެމްޑީޕީ
އެމްޑީޕީގެ ''ލާމަރުކަޒީ ގުޅުން'' ކޮންފަރެންސް ފެށުމަށް ހދ. ކުޅުދުއްފުށީގައި ބޭއްވި ބައްދަލުވުމުގައި އައްޑޫގެ މޭޔަރު އަލީ ނިޒާރާއި މަރަދޫ ދާއިރާގެ މެމްބަރު އަހްމަދު ދީދީ އަދި އެމްޑީޕީގެ ޗެއާޕާސަން ފައްޔާޒް އިސްމާއިލް ބައިވެރިވެވަޑައިގަންނަވަނީ.-- ފޮޓޯ: އެމްޑީޕީ

ކުޅުދުއްފުށީގައި ބާއްވާ ކޮންފަރެންސްގައި ކުރީގެ ރައީސް އިބްރާހިމް މުހައްމަދު ސޯލިހާއި، އެމްޑީޕީގެ ޗެއާޕާސަން ފައްޔާޒް އިސްމާއިލާއި ކުރީގެ ނައިބު ރައީސް ފައިސަލް ނަސީމް، މާލޭގެ މޭޔަރު އާދަމް އާޒިމް އާއި އެމްޑީޕީގެ މަޖިލިސް މެމްބަރުން އަދި ޕާޓީގެ އިސްބޭފުޅުން ބައިވެރިވެވަޑައިގަންނަވަ އެވެ.

މި ކޮންފަރެންސްގެ މައިގަނޑު މަގުސަދަކީ ލާމަރުކަޒީ ނިޒާމުގެ ބާރު ކަނޑުވާލުމަށް ސަރުކާރުން ކުރަމުން ގެންދާ ކަންކަމުގެ މައުލޫމާތު ކައުންސިލްތަކާ ހިއްސާކުރުމެވެ.

މިއަދުން ފެށިގެން އަންނަ އަންގާރަ ދުވަހުގެ ނިޔަލަށް މި ކޮންފަރެންސްގެ ހަރަކާތްތައް ކުރިއަށް ގެންދާއިރު، އެމްޑީޕީގެ ޓީމުތަކުން ށ، ހއ. އަދި ހދ. އަތޮޅުގެ ރަށްތަކަށް ދާނެ އެވެ. އެ ދަތުރުތަކުގައި ޕާޓީގެ ހިންގުން ހަރުދަނާ ކުރުމާ ގުޅޭ ގޮތުން މެމްބަރުންގެ ހިޔާލު ހޯދުން ވެސް އޮންނާނެ އެވެ.

އެމްޑީޕީގެ ''ލާމަރުކަޒީ ގުޅުން'' ކޮންފަރެންސް ފެށުމަށް ހދ. ކުޅުދުއްފުށީގައި ބޭއްވި ބައްދަލުވުމުގެ ކުރިން ކުރީގެ ނައިބް ރައީސް ފައިސަލް ނަސީމް ބައެއް މީހުންނާ ވާހަކަދައްކަވަނީ.-- ފޮޓޯ: އެމްޑީޕީ
އެމްޑީޕީގެ ''ލާމަރުކަޒީ ގުޅުން'' ކޮންފަރެންސް ފެށުމަށް ހދ. ކުޅުދުއްފުށީގައި ބޭއްވި ބައްދަލުވުމުގެ ކުރިން ކުރީގެ ނައިބް ރައީސް ފައިސަލް ނަސީމް ބައެއް މީހުންނާ ވާހަކަދައްކަވަނީ.-- ފޮޓޯ: އެމްޑީޕީ

އެމްޑީީޕީގެ ވެރިކަމުގައި 2019 ވަނަ އަހަރު ލާމަރުކަޒީ ނިޒާމަށް ގެނައި ބަދަލުތަކަކީ ދިރާސާތައް ކުރުމަށް ފަހު ގެނައި ބަދަލުތަކެއް ކަމަށް އެ ޕާޓީން ބުންޏެވެ.

ނަމަވެސް، މި ސަރުކާރުން ގެންނަ ބަދަލުތަކާ އެކު އެ ނިޒާމު "ފުނޑޭނެ" ކަމަށް އެމްޑީޕީން ވަނީ ސިފަކޮށްފަ އެވެ.

ބިނާވެށި ޕްލޭން ކުރުމާއި ހިންގުމުގެ ގާނޫނާއި އިދާރީ ދާއިރާތައް ލާމަރުކަޒީ އުސޫލު ހިންގުމުގެ ގާނޫނަށް ރައްޔިތުންގެ މަޖިލީހުން ގެނައި އިސްލާހު ރައީސް ޑރ. މުހައްމަދު މުއިއްޒު ވަނީ މިދިޔަ މަހު ތަސްދީގުކުރައްވައިފަ އެވެ.

އެމްޑީޕީގެ ''ލާމަރުކަޒީ ގުޅުން'' ކޮންފަރެންސް ފެށުމަށް ހދ. ކުޅުދުއްފުށީގައި ބޭއްވި ބައްދަލުވުމުގައި ކުޅުދުއްފުށީގެ މޭޔަރު މުހައްމަދު އާތިފް އަދި މާލޭގެ މޭޔަރު އާދަމް އާޒިމް ބައިވެރިވެވަޑައިގަންނަވަނީ.-- ފޮޓޯ: އެމްޑީޕީ
އެމްޑީޕީގެ ''ލާމަރުކަޒީ ގުޅުން'' ކޮންފަރެންސް ފެށުމަށް ހދ. ކުޅުދުއްފުށީގައި ބޭއްވި ބައްދަލުވުމުގައި ކުޅުދުއްފުށީގެ މޭޔަރު މުހައްމަދު އާތިފް އަދި މާލޭގެ މޭޔަރު އާދަމް އާޒިމް ބައިވެރިވެވަޑައިގަންނަވަނީ.-- ފޮޓޯ: އެމްޑީޕީ

ބިނާވެށި ޕްލޭން ކުރުމާއި ހިންގުމާ ބެހޭ ގާނޫނުގައިވާ ގޮތުން ގައުމީ ސިޔާސަތު ކަނޑައަޅާނީ ވަޒީރުންގެ މަޖިލީހުގެ ލަފާގެ މަތިން ރައީސެވެ. އަދި އެ ގާނޫނު ތަންފީޒު ކުރުމުގެ އިސް ޒިންމާ އަދާކުރާނީ ޕްލޭނިން މިނިސްޓަރެވެ.

އެހެންވެ، އެ ގާނޫނުގެ ސަބަބުން ލާމަރުކަޒީ އުސޫލާ ހިލާފަށް، ރައްޔިތުންގެ ބައިވެރިވުމެއް ނެތި ރަށްރަށުގެ ބިން ޕްލޭންކުރަން ސަރުކާރަށް ފުރުސަތު ލިބިގެންދާނެ ކަމަށް އެމްޑީޕީން ބުންޏެވެ.

މި ސަރުކާރުން ވަނީ ކައުންސިލްތަކުގައި ތިބޭ މެމްބަރުންގެ އަދަދު މަދުކުރަން ވެސް ނިންމައިފަ އެވެ. އެކަމަށް ވެސް އެމްޑީޕީން ވަނީ ވަރަށް ބޮޑަށް ފާޑުކިޔައިފަ އެވެ.