އައިޖީއެމްއެޗުން މެޑިކަލް އިންޓާން ދިނުމުގައި ރާއްޖޭގައި ކިޔަވާ ޑޮކްޓަރުންނަށް އިސްކަން ދޭން ނިންމައިފި

އައިޖީއެމްއެޗުގައި މެޑިކަލް އިންޓާންޝިޕް ހެދުމުގެ ފުރުސަތު ދޭއިރު، ރާއްޖޭގައި ޑޮކްޓަރުކަން ކިޔަވާ ކުދިންނަށް އިސްކަންދޭން ނިންމައިފި އެވެ.

އެ ހޮސްޕިޓަލްގެ ސީއީއޯ އިބްރާހިމް އަބްދުއްރައްޒާގް ހަލީމް "މިހާރު" އަށް ރޭ ވިދާޅުވީ ރަނގަޅަށް އިންޓާންޝިޕް ގެންދަން އަހަރަކަށް ގިނަ ވެގެން ފުރުސަތު ދެވެނީ 35 ޑޮކްޓަރުންނަށް ކަމަށެވެ. ނަމަވެސް، އައިޖީއެމްއެޗުގައި މި ވަގުތު ވެސް ދެ ބެޗެއްގައި 60 ޑޮކްޓަރުން އިންޓާންޝިޕް ހަދަމުން އަންނަ ކަމަށް އޭނާ ވިދާޅުވި އެވެ.

ހަލީމް ވިދާޅުވީ މިދިޔަ މާޗު މަހު ފެށި އިންޓާންޝިޕަށް ކުރިމަތިލި ހުރިހާ ޑޮކްޓަރުންނަށް ފުރުސަތު ދިން ކަމަށެވެ. އެކަމަކު، އެ ފަހަރު ޖާގަ ދިން 39 ޑޮކްޓަރުން ވެސް ކިޔެވީ ރާއްޖެ އިން ބޭރުންނެވެ.

ނަމަވެސް، އައިޖީއެމްއެޗުން އޭރު ނިންމައިގެން ތިބީ އެ ހޮސްޕިޓަލްގެ ބޮޑު ބައިވެރިވުމަކާ އެކު، ރާއްޖޭގައި ތަމްރީނުކުރި ޑޮކްޓަރުންގެ ފުރަތަމަ ބެޗުގައި 21 ދަރިވަރުން ހިމެނޭތީ މާޗު މަހު 15 ޑޮކްޓަރުންނަށް ޖާގަ ދޭށެވެ.

އެކަމަކު، ވިސްނުން ބަދަލުކޮށް ފަހުން އެ ހުރިހާ ދަރިވަރުންނަށް އިންޓާންޝިޕްގެ ފުރުސަތު އައިޖީއެމްއެޗުން ފަހިކޮށްދިނެވެ. އޭގެ ފަހުން، އެމްއެންޔޫގެ މެޑިސިންގެ ފުރަތަމަ ބެޗުގެ 21 ޑޮކްޓަރުން މިދިޔަ އޮކްޓޯބަރު މަހު ވަނީ އެއް އަހަރުގެ އިންޓާޝިޕް ޕްރޮގްރާމް ހަދަން ފަށައިފަ އެވެ.

އެމްއެންޔޫ މެޑިސިންގެ ދެ ވަނަ ބެޗު މި މަހު ކިޔެވުން ވަނީ ނިންމައިފަ އެވެ. އެ ޑޮކްޓަރުންގެ އިންޓާންޝިޕް އައިޖީއެމްއެޗްގައި އަންނަ އަހަރުގެ ކުރީކޮޅު ފަށާނެ އެވެ.

ޑޮކްޓަރުކަން ކިޔެވުމަށް ފަހު އަމަލީ މައިދާނަށް އެ މީހުންނަށް ނުކުމެވޭނީ އެއް އަހަރު ދުވަހުގެ އިންޓާންޝިޕެއް ފުރިހަމަ ކުރުމަށް ފަހު އެވެ.

ހަލީމް ވިދާޅުވިގޮތުގައި، މީހުން ބިނާކުރަން ގައުމީ ޔުނިވާސިޓީން މަސައްކަތް ކުރާއިރު، ސަރުކާރުގެ މައި ހޮސްޕިޓަލްގެ ހައިސިއްޔަތުން އައިޖީއެމްއެޗުން އެއްބާރުލުން ދޭން ޖެހޭ އެވެ.

"މި ތަނުގައި ކިޔަވައިދީފައި، މީހުން ބިނާކުރަން ގައުމީ ޔުނިވާސިޓީން މަސައްކަތް ކުރާއިރު އަޅުގަނޑުމެން ޖެހޭ އެބަ އެ ބޭފުޅުން ގްރެޖުއޭޓް ވުމަށް ފަހު، އަޅުގަނޑުމެން ކިޔަވައިދިން މީހުން ވީމާ އިންޓާންޝިޕަށް ނަގަން. ބޭރުން ކިޔަވައިގެން އަންނަ ކުދިން އަޅުގަނޑުމެން ނެގުން ހުއްޓާލީކީ ނޫން. އަޅުގަނޑުމެންނަށް ނެގޭނީ ކެޕޭސިޓީ ހުރި ވަރަކަށް،" އިންޓާންޝިޕް ފުރުސަތުގެ ޖާގައިގެ ދަތިކަން ފާހަގަކުރައްވަމުން ހަލީމް ވިދާޅުވި އެވެ.

އޭނާ އެންމެ ބޮޑަށް ފާހަގަކުރެއްވީ އައިޖީއެމްއެޗަކީ ކޮންމެ ދުވަހަކު އެތައް ސަތޭކަ ބަޔަކަށް ފަރުވާ ދޭ ހޮސްޕިޓަލަކަށް ވާއިރު، ތަނުގެ ޖާގައިގެ ދަތިކަމެވެ. އިންޓާންޝިޕް ހަދާ ދަރިވަރުން ވެސް އޮޕަރޭޝަން ތިއޭޓަރާއި އައިސީޔޫ ފަދަ ކްރިޓިކަލް އޭރިއާތަކަށް ވަދެ ނުކުމެ އުޅޭއިރު އެ ތަންތަނުގެ ޖާގަ ނިސްބަތުން ކުޑަކަމަށް ހަލީމް ވިދާޅުވި އެވެ.

"މި ތަންތަނަކީ އަސްލު އެއްފަހަރާ އެހާ ގިނަ ކުދިން ވައްދައިގެން ޓްރެއިނިންގެ ކަންތައްތަކުގައި، ހޮސްޕިޓަލުގައި ބަލި މީހުންނަށް ފަރުވާ ދޭ ތަނެއްވީމާ ހޮސްޕިޓަލުގެ އެކުއާޑް އިންފެކްޝަންތަކުން ޕްރޮޓެކްޓް ކުރަން ޖެހޭ ތަނެއް. ކެރިން ކެޕޭސީޓީ އަށް ވުރެ އިތުރަށް ނަގައިގެން އެބަވޭ ރިސްކަކަށް ބަލި މީހުންނަށް އަދި އިންޓާން ހަދާ ކުދިންނަށް. ކޮންމެ ވެސް ވަރަކަށް ކޮންޓްރޯލްކުރަންޖެހޭތީ އެކަން އަޅުގަނޑުމެން ލިމިޓްކުރަން ޖެހުނީ،" ހަލީމް ވިދާޅުވި އެވެ.

އޭނާ ވިދާޅުވިގޮތުގައި، އައިޖީއެމްއެޗުން އިންޓާންޝިޕް ދިނުމުގައި ރާއްޖޭގައި ޑޮކްޓަރުކަން ކިޔަވާ ދަރިވަރުންނަށް އިސްކަން ދިނަސް، އެހެން ގައުމުތަކުން ކިޔަވާ ދަރިވަރުންނަށް ވެސް ޖާގަ ހުރި ވަރަކުން ފުރުސަތު ދޭނެ އެވެ.

"ބޭރުން ކިޔަވާ ކުދިން [އިންޓާން އަށް] ނަގަން ބޭނުން. އެކަމަކު، ނެގޭނީ ނެގޭނެ އެމައުންޓަށް،" ހަލީމް ވިދާޅުވި އެވެ.

ރާއްޖޭގައި މި ވަގުތު މެޑިކަލް އިންޓާންޝިޕް ހެދެނީ އައިޖީއެމްއެޗުގައި އެކަންޏެވެ. ސިވިލް ސާވިސްގެ ސްޓްރްކްޗާއާ އެއްގޮތަށް އެ ޑޮކްޓަރުންނަށް މަހަކު 10،000ރ. ގެ އެލަވަންސެއް ލިބެ އެވެ. ނަމަވެސް، އިންޓާނަށް އޮތް ލޯޑު ކުޑަކުރަން ހެލްތު މިނިސްޓްރީން ވަނީ އެ ޕްރޮގްރާމް ފަށައި ދިނުމަށް އޭޑީކޭ ހޮސްޕިޓަލްގައި ހެދިފަ އެވެ.

އެ މިނިސްޓްރީގެ ހުއްދަ ނެގުމަށް ފަހު، ރާއްޖޭގައި ހިންގާ އަމިއްލަ އެންމެ ބޮޑު ހޮސްޕިޓަލް އޭޑީކޭ އިން ވަނީ އަންނަ އަހަރުގެ ޖެނުއަރީގައި އިންޓާން ފަށަން ނިންމައި އެކަމަށް ކުރިމަތިލާން ހުޅުވާލައިފަ އެވެ. ނަމަވެސް، އެ ހޮސްޕިޓަލުގައި އިންޓާން ހެދުމަށް ކޮންމެ ދަރިވަރަކު ކޮންމެ މަހަކު ވެސް 14،500ރ. ދައްކަން ޖެހެ އެވެ.

އެ ފީއާ ގުޅޭގޮތުން، އޭޑީކޭ ހޮސްޕިޓަލްގެ މެނޭޖިން ޑިރެކްޓަރު އަހުމަދު އަފްއާލް ވިދާޅުވީ އިންޓާންޝިޕް ޕްރޮގްރާމެއް ހިންގަން ބޮޑު ހަރަދެއް ކުރަން ޖެހޭ ކަމަށެވެ. އޭގެ ތެރޭގައި، އިންޓާން ޑޮކްޓަރުން ސުޕަވައިޒްކޮށް، އެސެސް ކޮށްދޭނެ ސްޕެޝަލިސްޓު ޑޮކްޓަރުން ހޯދުމާއި އެ މީހުންނަށް މުސާރަ ދޭންޖެހޭ ކަމަށް އަފްއާލް ވިދާޅުވި އެވެ.

އޭގެ އިތުރުން ކޮންސިއުމަބްލްސް އާއި ޓްރެއިނިން ސްކޫލް ހިންގުމާއި ދުވަހުން ދުވަހަށް ކުރަންޖެހޭ އެހެނިހެން ހަރަދުތައް ވެސް ބޮޑު ކަމަށް އޭނާ ވިދާޅުވި އެވެ.

"މިއީ ހަގީގަތުގައި ކޮންމެ ކުއްޖަކަށް އަރާ ވަރެއް ނޫން. އަޅުގަނޑުމެން ހެލްތު މިނިސްޓްރީ އަށް ހުށަހެޅީ އަސްލު އަގު ކުޑަކޮށްފައި،" އަފްއާލް ވިދާޅުވި އެވެ.

އޭނާ ވިދާޅުވީ އިންޓާންޝިޕް ފުރިހަމަކުރަން ޑޮކްޓަރުން، ހޮސްޕިޓަލަށް ފައިސާ ދައްކާ އެހެން ގައުމުތައް ވެސް އެބަހުރި ކަމަށެވެ.