އަލިފާނުގައި މާލޭ ރައްޔިތުންގެ މުހިންމު ލިޔެކިޔުންތަކެއް ގެއްލިދާނެކަމުގެ ބިރު!

ހައުސިން މިނިސްޓްރީ އާއި މާލޭ ސިޓީ ކައުންސިލްގެ ވައިޓަލް ރެޖިސްޓްރޭޝަންސް އޮފީސް ހިންގާ އިމާރާތުގައި އަލިފާން ރޯވެ އަނދައި ހުލިވި ހާދިސާގައި މާލޭ ރައްޔިތުންގެ މުހިންމު ގިނަ ލިޔެކިޔުންތަކެއް ގެއްލިދާނެ ކަމުގެ ބިރު ހީވެއްޖެ އެވެ.

އަލިފާނުގައި ސިޓީ ކައުންސިލްގެ އޮފީހާއި ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީގެ އިތުރުން އެންވަޔަރަމެންޓް މިނިސްޓްރީ ވަނީ އަނދައި ހުލިވެފަ އެވެ.

އެ ސަރަހައްދުގައި ހުންނަ ސިޓީ ކައުންސިލްގެ ވައިޓަލް ރެޖިސްޓްރޭޝަން އޮފީހަކީ އުފަންވުމާއި މަރުގެ ރެޖިސްޓްރޭޝަންތަކާއި ލިޔެކިޔުންތަކުގެ އިތުރުން ރަށްވެހިކަމާއި ގޯތިތަކުގެ ރެޖިސްޓްރޭޝަން ވެސް ބަލަހައްޓަމުން އަންނަ ތަނެވެ.

އަލިފާން ރޯވި ސަހަރައްދުގައި ހުންނަވައި، މާލޭ ސިޓީ ކައުންސިލްގެ ޑެޕިއުޓީ މޭޔަރު އަހުމަދު ނަރީޝް ވިދާޅުވީ، އެ އިމާރާތުގެ ތެރޭގައި 1960 އިން ފަށައިގެން މާލޭގައި އުފަންވި އެންމެންގެ ލިޔެކިޔުންތަކާއި ގެދޮރުގެ ރެޖިސްޓްރޭޝަންތައް ހުންނާނެ ކަމަށެވެ.

ސިޓީ ކައުންސިލްގެ އޮފީސް އިމާރާތުގެ ތެރެއިން ބައެއް ލިޔެކިޔުންތައް ނެރުމުގެ މަސައްކަތް ސިފައިން ކުރަނީ -- ފޮޓޯ: ނިޝާން އަލީ/ މިހާރު

އުފަން ދުވަހުގެ ސެޓްފިކެޓެއް އަލިފާނުގައި ގެއްލުނަސް އެ ރިކަވާ ކުރެވޭނެ ކަމަށާއި ނަމަވެސް ގެއެއްގެ ނުވަތަ ގޯއްޗެއްގެ ރެޖިސްޓްރީ ގެއްލިއްޖެ ހާލަތުގައި އެ އަނބުރާ ހޯދޭނެ ގޮތެއް ނޯންނާނެ ކަމަށް ނަރީޝް ވިދާޅުވި އެވެ.

"އެއްވެސް ޑޮކިއުމެންޓަކަށް ގެއްލުން ލިބިއްޖެއްޔާ ވެގެން ދާނީ އިއާދަނުކުރެވޭ ފަދަ ގެއްލުމަކަށް. މިއީ އިއާދަނުކުރެވޭ އެއްޗެއް، އެއީ އެހެން ތަނެއްގައި ހުންނާނެ އެއްޗެއް ވެސް ނޫން. މިލްކުވެރިކަން ވެސް ވާރުތަ މުދަލެއް ސާބިތުކުރާކަށް ވެސް ބޭނުން ކުރަން އެއްވެސް ތަނަކުން ލިބެން ހުންނާނެ އެއްޗެއް ނޫން،" ނަރީޝް ވިދާޅުވި އެވެ.

ނަރީޝް ވިދާޅުވީ އަލިފާން ރޯވުމާ އެކު، ފުލުހުންނާއި ސިފައިންގެ އެހީތެރިކަމާ އެކު ލިޔެކިޔުންތައް ނެރުމުގެ މަސައްކަތް ކުރި ކަމަށާއި ގިނަ ލިޔުންތައް ނެރެފައިވާ ކަމަށެވެ. އަދިވެސް އިތުރު ތަކެތި ނެރުމުގެ މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.

ސަލާމަތްކުރެވެން ހުރި ބައެއް ސާމާނު ސިފައިންނާއި ފުލުހުން ގުޅިގެން އެތަނުން ނެރެނީ.-- ފޮޓޯ: ނިޝާން އަލީ | މިހާރު

އެ އޮފީހުގައި ރޯވުމުގެ ސަބަބުން ލިބިފައިވާ ގެއްލުން އަންދާޒާ ކުރަން އަދި ނޭނގޭ ކަމަށް އޭނާ ވިދާޅުވި އެވެ.

އަލިފާނުގެ ހާދިސާ ހިނގީ ހައުސިން މިނިސްޓްރީ އާއި ތިމާވެއްޓާ ބެހޭ މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި މާލޭ ސިޓީ ކައުންސިލްގެ އޮފީހެއް ހިންގާ މ. ގްރީން ބިލްޑިންގަ އެވެ. އެ އަލިފާންގަނޑު މުޅި އިމާރާތަށް ފެތުރި ވަރަށް ބޮޑަށް ވަނީ އަނދައިފަ އެވެ. އަލިފާން ކޮންޓްރޯލްވީ ރޯވިތާ ހަތަރު ގަޑިއިރު ފަހުންނެވެ.