ދުނިޔޭގެ އެންމެ ބަރު މީހާގެ ލަގަބު، މިސްރުގެ އީމާން އަހުމަދަށް ގެއްލެން ވަރަށް ކައިރިވެއްޖެ އެވެ. މަހެއްހާ ދުވަސް ތެރޭގައި އޭނާގެ ހަށިގަނޑުން 120 ކިލޯ ލުއިވެއްޖެ އެވެ.
އީމާންގެ ފަރުވާއަށް މިސްރުން އިންޑިއާއަށް ގެންގޮސް ބާއްވާފައި އޮތް މުމްބާއީގެ ސައިފީ ހޮސްޕިޓަލުގެ ޑޮކްޓަރުން މިހާރު އިންތިޒާރު ކުރަމުން ދަނީ އީމާންގެ ޖީން ޓެސްޓް ރިޕޯޓަށެވެ. ޑޮކްޓަރުން ވިދާޅުވަނީ އީމާން ބަރުދަން މިހާ ހަލުވިކަމާ އެކު ލުއި ވަމުން ދިޔަ ނަމަވެސް ބެރިއޭޓްރިކް ސާޖަރީއެއް ހަދަން ޖެހޭނެކަމަށް ލަފާ ކުރެވޭ ކަމަށެވެ.
މިސްރުގެ އިސްކަންދަރިއްޔާގައި ހުންނަ އީމާންގެ ގެއިން ނުނިކުންނަތާ 25 އަހަރު ފަހުން އިޖިޕްޓްއެއާ ޚާއްސަ ފްލައިޓެއްގައި މީގެ މަހެއްހާ ދުވަސް ކުރިން މުމްބާއީއަށް ގެންގޮސް އިންޑިއާގެ ޑޮކްޓަރުން ފަރުވާ ކުރަން ފެށި ފަހުން އޭނާގެ ސިއްހަތަށް ރަނގަޅު ބަދަލުތަކެއް ވަނީ އައިސްފަ އެވެ. ނަމަވެސް ބަރުދަން ލުއިކުރުމުގެ މަރުހަލާ ފަށައިގެން މިވީ ކުޑަ ދުވަސްކޮޅުގެ ތެރޭގައި އީމާނަށް އެތައް ފަހަރަކު ސްޓްރޯކް ޖެހިފައިވުމަކީ ޑޮކްޓަރުންގެ އޮތް ކަންބޮޑުވުމެކެވެ. ނަމަވެސް އޭނާއަށް ސްޓްރޯކް ޖެހެން މެދުވެރިވާ ސަބަބު ދެނެގަނެވެން އަންނަނީ ވެސް އެމްއާރުއައި މެޝިނަކަށް ލެވޭ ވަރަށް އޭނާ ހިކިގެންނެވެ.
ޑޮކްޓަރުން އުންމީދުކުރަނީ ކުރިއަށް އޮތް މަހެއްހާ ދުވަހުގެ ތެރޭގައި އެމްއާރުއައި މެޝިނަށް ފިޓްވާ ވަރަށް އީމާންގެ ބަރުދަން ލުއިވާނެ ކަމަށެވެ. މިހާރު މެޑިކަލް ޓީމުން ގިނަ މަސައްކަތްތައް ކުރަނީ ޕޯޓެބަލް އެކްސްރޭ މެޝިނެއްގެ އެހީގަ އެވެ.
އީމާނަށް ފަރުވާ ދޭން ފެށި އިރު އެ ހޮސްޕިޓަލަށް ދިމާވި އެންމެ އުނދަގޫ ކަމަކީ ގަވާއިދުން އޭނާގެ ބަރުދަން ޗެކް ކުރެވޭނެގޮތެއް ހޯދުމެވެ. މި މައްސަލަ ހައްލުކުރީ ބަރުދަން ބަލާ މެޝިންތައް، އީމާން އޮތް އެނދުގައި ހަރުކޮށްގެންނެވެ.
އީމާންގެ ޑޮކްޓަރު މުޒައްފަލް ލަކްޑާވާލާ ވިދާޅުވި ގޮތުގައި އީމާން ބަރުދަން މިހާރު ހުރީ 300 ކިލޯ އަށް ދަށްވެފަ އެވެ. ފަރުވާ ފެށިއިރު ބަރުދަނަކީ 498 ކިލޯ އެވެ.
ޑޮކްޓަރު ވިދާޅުވީ އީމާންގެ ޖެނެޓިކް ރިޕޯޓް ކުރިޔަށް އޮތް ހަފުތާ ތެރޭ ލިބުމުން އޭނާގެ ސާޖަރީ ވަރަށް އަވަހަށް ހަދާނެކަމަށެވެ. އަދި ހޮސްޕިޓަލަށް ގެނައިއިރު އީމާން އަށް ދިމާވެފައިވާ، ކާއެއްޗެހި ދިރުވަން އުނދަގޫވާ މައްސަލަ އާއި ކާންދޭއިރު ކޮށި އަރާ މައްސަލަ މިހާރު ވަނީ ހައްލުކޮށްފަ އެވެ. އަޑު ހުންނަ ގޮތުން، އޭނާ ދައްކާ ވާހަކަ އޮޅުން ނުފިލާ މައްސަލަ ވެސް ހައްލުވެއްޖެ އެވެ.
ކޮންމެ ދުވަހަކު ވަރުގަދަ ފިޒިއޮތެރަޕީ ސެޝަންތައް ކުރިޔަށް ގެންދާ ކަމަށާއި މިކަމުގެ ސަބަބުން އީމާނަށް މިހާރު އަމިއްލައަށް ތެދުވެ އެނދުގައި އިށީނދެ އިނދެގެން ފައިގެ ބޮޑުވާ އިނގިލީގައި ވެސް ހިފާ ލެވޭ ކަމަށް ޑޮކްޓަރު ވިދާޅުވި އެވެ. މީގެ ކުރިން އީމާނަށް އަތެއް ފަޔެއް ގުނޑުވާ ވެސް ނުލެވެ އެވެ.
"އެހެން އެވީ ހަށިގަނޑުގައި އިތުރުވެފައި ހުރި ފެންތައް މިހާރު ނެތީމަ. އެކަމަކު އިތުރު 100 ކިލޯ ލުއިކުރުން މިހާ ފަސޭހައެއް ނުވާނެ. ސަބަބަކީ ބޭހުން ކުރެވޭނެ ވަރު މިހާރު ކުރެވިފައި ވާތީ،" ޑޮކްޓަރު ވިދާޅުވި އެވެ.
އީމާނަށް އެހީވުމަށް ހޮސްޕިޓަލުން ބެހެއްޓި ފަންޑު ފޮއްޓަށް މިހާރު 60 ލައްކަ ރުޕީސް ވަނީ ލިބިފަ އެވެ. މީގެ ތެރޭގައި ފިލްމީ ތަރިންނާއި އެމީހުންގެ އާއިލާގެ މެމްބަރުން ދީފައިވާ ހަދިޔާ ހިމެނެ އެވެ.