ފުލުހުންގެ އޮފިސަރު ރަޖުނީއަށް ވިނަރެސް ލިބުނު ގޮތް ފުލުހުން ސާފުކުރަނީ

އިކޮނޮމިކް ކްރައިމް ޑިޕާޓްމެންޓްގެ ހެޑް ސުޕްރިންޓެންޑެންޓު އޮފް ޕޮލިސް ރަޖުނީ ޝުއައިބު ވިނަރެސް ފްލެޓް ހޯދި ގޮތާ މެދު ސޯޝަލް މީޑިއާގައި ފެތުރިފައިވާ ވާހަކަތައް ފުލުހުންގެ އިދާރާއިން ސާފުކުރަމުންދާ ކަމަށް އެ އިދާރާއިން ބުނެފި އެވެ.

ފުލުހުންގެ ތަރުޖަމާނު އަހުމަދު ޝިފާން ވިދާޅުވީ ރަޖުނީއާ ގުޅޭ ގޮތުން ސޯޝަލް މީޑިއާގައި އާންމުވަމުންދާ މައުލޫމާތާ ގުޅިގެން ފުލުހުންގެ ހިދުމަތުން ބަލަންޖެހޭ ކަންކަން ބަލަމުން އަންނަ ކަމަށެވެ.

ވަގު ލިޔުންތަކެއް ހުށަހަޅައިގެން ނުހައްގުން ގޯތިތަކެއް ހޯދި މައްސަލައިގެ ތަހުގީގާ ގުޅޭ މައުމޫލާތު ހިއްސާކުރަން މިދިޔަ ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ބައިވެރިވި ރަޖުނީ ވިނަރެސް ފްލެޓް ހޯދާފައިވަނީ އުސޫލުން ބޭރުން ކަމަށް ބުނެ ސޯޝަލް މީޑިއާގައި ވާހަކަތައް ވަނީ ފެތުރިފަ އެވެ.

ސޯޝަލް މީޑިއާގައި އާންމުވެފައިވާ ވިނަރެސް ފްލެޓް ލިބުނު މީހުންގެ ލިސްޓްގައި ރަޖުނީގެ ނަން ވެސް އެބަ އޮތެވެ.

ރަޖުނީއަށް ވިނަރެސް ފްލެޓް ދޫކުރަން ނިންމި ލިޔުމާއި އެކަމުގެ އެއްބަސްވުމުގެ ކޮޕީ "މިހާރު" އަށް ވަނީ ލިބިފަ އެވެ. އެ ލިޔުމުން އެނގޭ ގޮތުގައި ރަޖުނީއަށް ވިނަރެސް ފްލެޓެއް ދޫކުރަން އެޗްޑީސީން ނިންމާފައިވަނީ 2022 ވަނަ އަހަރު ތެރޭގަ އެވެ. އެއީ ހިޔާ ފްލެޓްގެ ބަދަލުގައި ވިނަރެސް ފްލެޓް ހޯދަން ހުޅުވާލި ފުރުސަތުގައި އޭނާ އެކަމަށް އެދިގެން ހޯދާފައިވާ ފުރުސަތެއް ކަމަށް ވަނީ އެނގިފަ އެވެ.

ވިނަރެސް ފްލެޓްތައް ދޫކުރި ގޮތުގައި މައްސަލަތަކެއް އުޅޭކަން ފާހަގަކުރެވެނީ ކުރީ ސަރުކާރު ނިމި، މި ސަރުކާރު އައިއިރު ބާކީ ހުރި ފްލެޓްތައް ދޫކުރި ގޮތުންނެވެ.

ވިނަރެސް މަޝްރޫއުގެ ދަށުން އިމާރާތްކުރި 13 ބުރީގެ 10 ޓަވަރުގައި ހިމެނޭ 1،344 ފްލެޓްގެ ތެރެއިން ކުރީގެ ރައީސް އިބްރާހިމް މުހައްމަދު ސޯލިހުގެ ވެރިކަމުގެ ދައުރު ހަމަވިއިރު ބާކީ ދޫނުކުރެވި ގާތްގަނޑަކަށް 400 ފްލެޓް ހުއްޓެވެ.

Vinares ge baakee flat thah dhinee Sealife ah faisaa dhekki kamuge fake liyun hadhaigen

The most trusted news source in the Maldives

Mihaaru

މި ސަރުކާރު އައި ފަހުން އެ ފްލެޓްތައް ދޫކުރަން އެޗްޑީސީން އިއުލާނެއް ކުރުމަށް ފަހު އެ ބާތިލްކުރި އެވެ. ބާކީ ހުރި ފްލެޓްތައް ދޫކުރަނީ ސީލައިފުން އަޅަން ބުނި ފްލެޓްތަކަށް ފައިސާ ދައްކައިގެން ގެއްލުންވި މީހުންގެ ތެރެއިން ސަރުކާރާ އެކު އެއްބަސްވުން ހަދާފައިވާ މީހުންނަށް ކަމަށް އެޗްޑީސީން ބުނެފައިވެ އެވެ. ގުޅިފަޅު ފްލެޓް ގެއްލުނު މީހުންގެ ތެރެއިން ފްލެޓް ބޭނުންވާ މީހުންނަށް ވެސް ވިނަރެސް ދޭން ނިންމާފައިވެ އެވެ.

ނަމަވެސް، އިތުރުބާރު ހުރި ގޮތަކުން "މިހާރު" އަށް އެނގިފައިވާ ގޮތުގައި އާންމުކޮށް އިއުލާންކޮށްފައި ނުވާ ސީލައިފްގެ ލިސްޓާ އެޗްޑީސީން ވަނީ ކުޅެފަ އެވެ. ސީލައިފްގެ ލިސްޓުގައި ނެތް މީހުން އެ ލިސްޓަށް އިތުރު ކޮށްފައިވަނީ އެއީ ސީލައިފުން ފްލެޓް ގަންނަން ފައިސާ ދެއްކި މީހުން ކަމުގެ ފޭކް ލިޔުންތައް ހަދައި ހުށަހަޅައިގެން ކަމަށް މި ކަމުގެ މައުލޫމާތު އެނގޭ މީހުން ކިޔައިދިނެވެ.

ސީލައިފްގެ ލިސްޓުގައި ހިމެނުނު ބައެއް މީހުންނަށް ބޭންކުން ލޯނު ހަމަނުޖެހި ފައިސާ ދެއްކޭނެ ގޮތެއް ނުވުމުން އެ މީހުން ލިސްޓުން އުނިކުރުމަށް ފަހު، ފޭކް ލިޔުންތަކާ އެކު އެހެން ބަޔަކު އެ ސްލޮޓްތަކަށް އިތުރުކުރަނީ އެވެ. މީގެ ސައްހަ ނޫން ބައެއް ލިޔުންތައް ކޯޓަށް ހުށަހަޅައިގެން ހުކުމްތައް ނެރެފައިވެ އެވެ.

މިގޮތަށް ހަމަޖައްސައިދެނީ އެޗްޑީސީގެ ވަކި ބަޔަކަށް ފައިސާ ދިނުމުން ކަމަށާއި އެކަން ކުރަން ވަކި ޓީމެއް އޮންނަ ކަމަށް ވަނީ އެނގިފަ އެވެ.