ލޯންޗަށް ޖެހީ ރާޅެއް، ދިޔަވާތީ އެންމެން ފުންމާލީ!

އދ. ދިގުރަށުން މާލެ އަންނަން "ހުވަން" ލޯންޗު މިއަދު ހެނދުނު ނައްޓާލީ މިއީ ވިއްސާރަ ދުވަސްވަރަކަށް ވުމުން މޫސުމަށް ވަރަށް ބޮޑަށް ބެލުމަށް ފަހު އެވެ. އެ ރަށުން ފުރައިގެން މާލެ އަންނަން ދެ ގަޑިއެއްހާއިރު ހޭދަވާއިރު، ލޯންޗުގެ ފަޅުވެރިންނާ އެކު ޖުމުލަ 48 މީހުން ގޮވައިގެން ދުއްވުނީ ތިރީކަށް މިނިޓެވެ. ވިއްސާރައިގައި ޖެހި ދެން ލޯންޗު ކުރިއަށް ދެވޭ ވަރެއް ނުވި އެވެ.

"ލޯންޗަށް ޖެހީ ރާޅެއް. ދެން ދިޔަވާން ފެށީމާ ލޯންޗުގައި ތިބި އެންމެން ފުންމާލީ މޫދަށް. އިރުގަނޑެއް ނުވަނީސް ދިޔަބޮޑުވެގެން އަޑިއަށް ދާން ފެށީ،" ދިގުރަށާއި މާލެއާ ދެމެދު ދަތުރުތައް ބާއްވާ "ލެޓްސް ގޯ ދިގުރަށް" ކުންފުނީގެ ހިއްސާދާރަކު "މިހާރު" އަށް މިއަދު ކިޔައިދިނެވެ.

ލޯންޗު އަޑިއަށް ދިޔަ ސަރަހައްދު ފާހަގަކޮށްފައި.---

އޮޔާ ދިޔަ ނުދިނުމަށާއި އެ ސަރަހައްދަށް ދާ ބަޔަކަށް އެ 48 މީހުން ސަލާމަތް ކުރަން ވެސް ފަސޭހަވާނެތީ، އެންމެން ކަނޑަށް ފުންމާލީ ގުރޫޕުތަކަކަށް ބެހިގެން، ލައިފްޖެކެޓު އަޅައިގެންނެވެ.

ތިން ކްރޫއިންނާއި 45 ފަސިންޖަރުން ހިމެނޭހެން އެ ލޯންޗުގައި ހަތަރު ކުޑަކުދިން ވެސް ދަތުރުކުރި އެވެ. އެ އެންމެން މިހާރު ވަނީ ސަލާމަތްކޮށް، ދިގުރަށަށް ގެންގޮސްފަ އެވެ. ފުލުހުން ބުނީ އެންމެންގެ ހާލު ވެސް ރަނގަޅު ކަމަށެވެ.

އެ ލޯންޗުގައި ދަތުރުކުރީ ދިގުރަށުގެ އެކިއެކި ގެސްޓް ހައުސްތަކުގެ މީހުންނެވެ.

މާލެ ދަތުރުކުރުމަށް އެ ކުންފުނީގެ ދެ ލޯންޗު ގެންގުޅޭއިރު، އަޑިއަށް ދިޔަ ލޯންޗު ގެންގުޅޭތާ އަދި ވާނީ އަހަރެއްހާ ދުވަސް ކަމަށް ލެޓްސް ގޯ ދިގުރަށް" ކުންފުނީގެ ފަރާތުން ވާހަކަ ދެއްކެވި އިސްވެރިޔާ ވިދާޅުވި އެވެ.

އޭނާ ވިދާޅުވިގޮތުގައި، އަޑިއަށް ދިޔަ ލޯންޗު ގަންނަން ހައެއްކަ މިލިއަން ރުފިޔާ ހަރަދު ކޮށްފައި ވާނެ އެވެ. އެހެންވެ، ލޯންޗު އަޑިއަށް ދިއުމަކީ ލިބުނު ވަރަށް ބޮޑު ގެއްލުމެއް ކަމަށް އެ ކުންފުނިން ބުންޏެވެ.

48 މީހުންނާއެކު ދަތުރުކުރަމުންދިޔަ ލޯންޗެއް އަޑިއަށްދިއުމުރުން މީހުން ސަލާމަތްވާން ލައިފްޖެކެޓުގައި--

މެޓް އޮމެޓް އޮފީހުން ބުނީ މިއަދު ވެސް ރާއްޖޭގެ ބޮޑު ބަޔަކަށް ވިއްސާރަކޮށް، ބައެއް ރަށްތަކަށް ބޯކޮށް ވާރޭވެހި، ގުގުރުން އެކަށީގެންވާ ކަމަށެވެ. އަދި ކަނޑުތައް އަދައިގެ ވަރަކަށް ގަދަވެފައި، ވިލާގަނޑުގައި އިތުރަށް ގަދަވާނެ ކަމަށް ވެސް އެ އޮފީހުން ބުންޏެވެ.

ބޯކޮށް ވާރޭ ވެހޭނެ ކަމަށް ލަފާކޮށް މި ވަގުތު ވެސް ރާއްޖޭގެ ބޮޑު ސަރަހައްދަކަށް ވަނީ ޔެލޯ އެލާޓް ނެރެފަ އެވެ. އެއީ، ހއ. އަތޮޅުން ފެށިގެން މ. އަތޮޅާ ހަމައަށެވެ. މެޓުން ވަނީ ކަނޑު ދަތުރު ކުރުމުގައި ސަމާލުވާން އިލްތިމާސް ވެސް ކޮށްފަ އެވެ.