ކުޑަހުވަދޫގައި ހިންގާ އަތޮޅު ތައުލީމީ މަރުކަޒުގެ ކްލާސްރޫމެއްގައި ކިޔަވައިދެނީ.-- ފޮޓޯ: ނިޝާން އަލީ/ މިހާރު
27 މާޗް 2025 - 21:32
އަންނަ އަހަރުން ފެށިގެން ރޯދަމަހަށް ސްކޫލު ބަންދުކުރެވޭނެ ގޮތްތައް ހަމަޖައްސަން ރައީސް ޑރ. މުހައްމަދު މުއިއްޒު އަންގަވައިފި އެވެ.
"ރައްޔިތުންނާ އެކު" ގެ ނަމުގައި ރައީސް އޮފީހުން ފެށި ޕޮޑްކާސްޓް ޝޯ ގެ ފުރަތަމަ އެޕިސޯޑުގައި ރައީސް މިއަދު ވިދާޅުވީ، މިދިޔަ އަހަރުން ފެށިގެން ރޯދަމަހުގެ ފަހު 10 ބަންދުކުރީ ރޭ އަޅުކަން ކުރުމަށް ވަގުތު ދިނުމަށް ކަމަށެވެ.
އެގޮތަށް ބާރު އެޅުމަށް އަންނަ އަހަރުގެ ދިރާސީ އަހަރު ފެށުމަށް ގެންނަ ބަދަލުތަކުގެ ތެރެއިން ރޯދަމަހުގެ ތެރޭގައި ސްކޫލު ބަންދު ވާނެ ގޮތް ހެދުމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު އަށް އަންގަވާފައިވާނެ ކަމަށް ރައީސް ވިދާޅުވި އެވެ.
ދިރާސީ ކަލަންޑަރަށް ގެނައި ބަދަލުތަކުން، މި ރޯދަމަހަކީ ސްކޫލު ބޮޑު ޗުއްޓީ އެވެ. އެ ކަލަންޑަރުގައިވާ ގޮތުން ދިރާސީ އާ އަހަރުގެ ކިޔެވުން ފެށޭނީ އަންނަ މަހުގެ 7 ވަނަ ދުވަހެވެ.
"ރައްޔިތުންނާއެކު" ނަމުގައި ރައީސް އޮފީހުން ފެށި ޕޮޑްކާސްޓުގައި ރައީސް ޑރ. މުއިއްޒު ވާހަކަފުޅުދައްކަވަނީ.-- ފޮޓޯ: ރައީސް އޮފީސް
"އެއް ހަފުތާ ޝިފްޓުކޮށްލަން ޖެހުނީ އެހެން ދުވަސްތަކަށް ވުރެ. މުޅި މަސް ބަންދުކޮށްލެވިއްޖެ. އަޅުގަނޑު ވާނީ އެޑިއުކޭޝަން މިނިސްޓަރަށް ދަންނަވާފައި ބައްލަވައި ދެއްވާށޭ މިހެން ދެން ކޮންމެ އަހަރެއްގައި ވެސް މުޅި ރަމަޟާން މަސް ބަންދުކުރެވޭނެ ގޮތް ހަމަޖެއްސޭތޯ، އެއްވެސް ވަރަކަށް ކިޔަވައިދޭ ދުވަސްތައް ނޫނީ ގަޑިތައް ނުގެއްލޭނެ ގޮތަކަށް ހަމަޖައްސައިދިނުމަށް." ރައީސް ވިދާޅުވި އެވެ.
އެ މަނިކުފާނު ވިދާޅުވިގޮތުގައި، ރޯދަމަހު ސްކޫލު ބަންދުކުރުމުން ބެލެނިވެރިން ބަލައިގަނެ އެވެ. އެގޮތަށް ހަމަޖެއްސެވި އެއް ސަބަބަކީ ރޯދަމަހަށް ފަހު އަންނަ އީދުގައި އުފާފާޅުކުރުމަށް ސަރުކާރުން ފުރުސަތު ދިނުން ކަމަށް ވެސް ރައީސް މުއިއްޒު ވިދާޅުވި އެވެ.
މި އަހަރުގެ ބޮޑު ޗުއްޓީ ލިބޭނީ ޑިސެމްބަރު 28 އިން ޖެނުއަރީ 27 އަށެވެ. އެ އުސޫލުން ބަލައި، އަންނަ އަހަރުގެ ރޯދަމަހު ސްކޫލުތައް ބަންދުކޮށްފިނަމަ ކިޔަވައިދޭން ލިބޭނީ މަދު ދުވަސްތަކެކެވެ. ކަލަންޑަރު ދައްކާގޮތުން އަންނަ އަހަރުގެ ރޯދަ މަސް ފެށޭނީ ފެބްރުއަރީ މެދެތެރޭގަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
މިޒްޔާންް
28 March 2025
ރައީސް މިކަން ކޮށްފިނަމަ މި ލިބިގެންދަނީ ވަރަށް ބޮޑު ލުޔެއް. ރައީސް މުއިއްޒަކީ ރައްޔިތުންގެ އިހްސާސްތަށް ދަންނަ ވެރިޔެއް.
ނިޝާމްް
28 March 2025
މިތާ ބައެއް ކޮމެންތްތަށް ކިޔާލީމަ ހިތައްރަނީ ދިވެހިންގެ މަދުބަޔެއްވިޔަސް ހާދަ ގޮތެއްފޮތެއް ނެތް މީހުން ތިބިކަން. މާތް މަސްވަރެއްގައި ތިބާއަށް ފަސޭހައިން އަޅުކަންކުރެވޭނެ މާހައުލެއް ގާއިމްކުރުމަކީ މިހާރު ޖޯކްޖަހާކަމަކަށް ވެއްޖެ.
ޖުމާންް
28 March 2025
އަޅުކަންތަކަށް ރައީސް ދެއްވާ ސަމާލުކަން ފެނިގެން މިދަނީ. ރައްޔިތުންނަށް ބުރަނުވާނެގޮތަކަށް އަބަދުވެސް މަސައްކަތްކުރައްވަނީ.
133333
28 March 2025
މީ އަންނަން އޮތް ޖީލުތަކަށްދޭ ނުބައި މެސެޖެއް... ރޯދަމަހަކީ މަސައްކަތް ނުކުރާ ރެސްޓް ކުރާ މަހެއް ގޮތަށް... ބަލަ މީގެ އެތައް އަހަރެއްގެ ކުރިން ދަރިން ރޯދަމަހު ޓެސްޓްތަށް ހަދާ އަދި ކިޔަންވަން ގޮސް ނަތީޖާވެސް މާރަނގަޅޭ!! ރައީސްމީހާ މީހުން ރުއްސަން ކުރާކަންކަމުގެ ހިތި ނަތީޖާ ފެންނާނެ ކުރިއަށް އޮތްތަނުގަ!!!!!
ށިމާދްް
28 March 2025
އެއްވެސް ހާލަތެއްގައި ރެސްޓް ކުރާކަށްނޫން. ވެރިމީހާ އެދެނީ އަޅުކަންކުރަން ހުސްވަގުތު. އެވަގުތުގެ ބޭނުން ހެޔޮގޮތުގަ ހިފާނީ ހަމަ ރައްޔިތުން. އެ ވަގުތު ނަހަމަ ގޮތުގައި ބޭނުންކުރާނީ ނުވިސްނޭ މޮޔައިން.
ސުލްބުލީ
28 March 2025
އަޅުކަމަކީ ހަމައެކަނި ޤުރުއާން ކިޔަވައި ތަރާވީސްނަމާދު ކުރުންތަ؟ ފަރުޟު އަދާކޮށްފަ، ޙަލާލު ގޮތުގައި ރިޒްޤު ހޯދުމަށް ބިސްމި ކިޔާފާ މިކުރާ ހުއްދަ މަސައްކަތް އަޅުކަމުގެ ތެރޭގައި ގުނޭނެކަން ނޭނގެނީބާ؟
ސިޔާދްް
28 March 2025
އަޅުކަންކުރެވޭނެ އެހެން މަސްވަރުގަވެސް. ވަކި ކަމެއްގަ ރަމަޝާން މަހުގައި ކުރާ އަޅުކަންތަށް މާތްވެގެންވަނީ. މަހުގެ ބަރަކާތާމެދު ސުވާލުކުރަނީތަ؟ އެމަހުގައި ވީހާވެސް ލުއިކޮށް އަޅުކަމުގައި އުޅުމަށް ހުސްވަގުތުދޭފަދަ ގޮތަކަށް ކަންކަން ބައްޓަންކުރުމަކީ ނުރުހުންވާންވީ ކަމެއްނޫން.
ބަސް
29 March 2025
ސިޔާދަށް ފަހުމު ނުވި ދޯ ބުނި އެއްޗެއް. ހެޔޮނިޔަތުގައި ކުރާ ކޮންމެ ރަނގަޅު ޢަމަލަކީވެސް އަޅުކަމެއް. ރަމަޟާން މަހު ކިޔެވުމާއި ކިޔަވައިދިނުމުން ލިބޭ އިތުރު ދަރުމަ ބޭނުން ނުވަނީބާ؟
ޢުސްމާނުބެ
28 March 2025
ކުރާނެ މަކެއްނެއް، ގޭގައި ތިބެގެން ކަންނެއް ވޫން ކަމެއް ނުވޭ
އިއްބެ
28 March 2025
ރޯދަ ހިފާ ނިމޭއިރު ގައުމަށް ވާނެ އެއްޗެއްވެ ނިމިފަ.
ޗޫޤީ
28 March 2025
ރޯދަމަހު ސުކޫލުތައް ބަންދުކުރުން އެއްފަރާތުގައި ބާއްވާފައި ރާއްޖޭގެ ހުރިހާ ސުކޫލެއް އެއްދަންފަޅިއަށް ކިޔަވައިދެވޭ ގޮތަށް ހެދޭތޯ އުޅެންވެއްޖެއެއްނޫންތަ. ރޯދަމަހަސް ރޯދަ މަސްނޫނަސް ބެލެނިވެރިންނަކަށް ފަސޭހައެއް ނުވާނެ ޕުރައިމަރީ ގުރޭޑް ތަކުގެ ކުދިންގޮވައިގެން ރަތްދަކައަވީގައި ސުކޫލުދޮށަށް ހިނގާކަށް. އަދި މުދައްރިސުންނަށްވެސް އެވަގުތު ކިޔަވައިދޭކަށްވެސް ފަސޭހައެއް ނުވާނެ. އެންމެ ފަސޭހަގޮތަކީ ހެނދުނުހެނދުނާ ހުރިހާކަމެއް ފަށައި މެންދުރަށް ނިންމާލުން.
ސައިނާން
28 March 2025
މިހާރަކަށް އައިސް މި ފެންނަނީ ވަރަށް ބޮޑަށް ޓީޗަރުންނަށް ދަތިކުރެވޭތަން. ޓީޗަރުންނަކީ ވެސް އިންސާނުން. ބޭސް ފަރުވާކުރަން އިންޑިޔާއަށް ދިއުމާ.ރަށްރަށުގައި ތިބޭ ޓީޗަރުން މާލެ އައުމާ، މިއީ ބޮޑު ޗުއްޓީގައި ޓީޗަރުން ކުރާ ކަންކަން. ސުކޫލު ދުވަސްކޮޅު ނޭވާނުލާ ބިޒީކޮށް އުޅެފައި ބޯ ހަމަޖައްސާލަން އެމީހުންނަށް ލިބޭ ބޮޑު ޗުއްޓީ ކުރުކޮށްފައި ރޯދަމަސް ބަންދުކުރުން މީ ދެރަކަމެއް. ވެކޭޝަންއަށް ގޮސްލަން ބޮޑު ބަންދުގައި ލިބޭ ދުވަސްކޮޅުވެސް ދިޔައީ ތިދެން
ޓިނު
28 March 2025
މިއަހަރު ހަމަ ހިތައްއެރީމަ ބަންދުކުރީތަ