މައްސަލަ ބޮޑުވެފައިވާ ތިނަދޫގެ 200 ހައުސިން ޔުނިޓް ދޫކުރުމުގެ މަސައްކަތް ސީދާ މިނިސްޓްރީން ކުރަން ނިންމައިފި

ގދ. ތިނަދޫގެ 200 ހައުސިން ޔުނިޓް ދޫކުރުމުގެ ކަންކަމުގައި އެ ރަށު ސިޓީ ކައުންސިލުން ހައުސިން މިނިސްޓްރީގެ އެންގުމާ ހިލާފަށް އަމަލުކުރަމުންދާ ކަމަށް ބުނެ، އެ ހައުސިން ޔުނިޓްތައް ދޫކުރުމުގެ ކަންކަން ސީދާ އެ މިނިސްޓްރީން ކުރަން މިއަދު ނިންމައިފި އެވެ.

ހައުސިން މިނިސްޓްރީން މިއަދު ނެރުނު ނޫސްބަޔާނެއްގައި ބުނީ، ސަރުކާރުން ކުރިއަށް ގެންދާ މަޝްރޫއުތަކުގެ ދަށުން ހައުސިން ޔުނިޓްތައް ދޫކުރުމަށް އެކުލަވާލަން ޖެހޭ އުސޫލުތަކާއި މިންގަނޑުތައް އަބަދުވެސް ކަނޑައަޅަނީ އެ މިނިސްޓްރީން އެންޑޯސްކޮށް، ހުއްދަ ލިބިގެން ކަމަށެވެ. ނަމަވެސް، ތިނަދޫ ސިޓީ ކައުންސިލުން އެ އުސޫލާ ހިލާފަށް މިނިސްޓްރީގެ ހުއްދަ ނެތި ފްލެޓްތައް ދޫކުރަން މިދިޔަ ޖެނުއަރީ މަހުގެ 29 ގައި އިއުލާންކޮށްފައިވާ ކަމަށް ހައުސިން މިނިސްޓްރީން ބުންޏެވެ.

އެހެންވެ، އެ އިއުލާން ބާތިލު ކުރުމަށް މިދިޔަ ޖެނުއަރީ މަހުގެ 30 ވަނަ ދުވަހު ސިޓީ ކައުންސިލަށް އަންގައި، ހައުސިން ޔުނިޓްތައް ލިބޭ މީހުން ކަނޑައެޅުމުގައި އަމަލުކުރާ ގޮތުގެ އުސޫލު އެންޑޯސް ކުރުމަށް މިނިސްޓްރީ އަށް ހުށަހެޅުމަށް ވެސް އަންގާފައިވާ ކަމަށް ހައުސިން މިނިސްޓްރީން ބުންޏެވެ.

އެކަމަކު، މިއަދާ ހަމައަށް ވެސް އެ އެންގުމާ އެއްގޮތަށް ތިނަދޫ ސިޓީ ކައުންސިލުން އަމަލުކޮށްފައި ނުވާ ކަމަށް މިނިސްޓްރީން ބުންޏެވެ.

ހައުސިން މިނިސްޓްރީން ބުނީ އެއީ އެ މިނިސްޓްރީގެ ލަފަ އާއި އެންޑޯސްކުރުމަކާ ނުލައި ކޮށްފައިވާ އިއުލާނަކަށް ވާތީ، އެ އިއުލާނުގެ ދަށުން ކުރާ އެއްވެސް މަސައްކަތެއް މިނިސްޓްރީން ބަލައިނުގަންނާނެ ކަމަށެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން އިންސާފުވެރިކަމާއި ހަމަހަމަކަމާ އެކު، އެ ހައުސިން ޔުނިޓްތައް ލިބޭ މީހުން ކަނޑައެޅުމަށް އެކުލަވާލަން ޖެހޭ އުސޫލު ހަދައި، އެ ތަންތަން ދޫކުރުމުގެ މަސައްކަތް ވީ އެންމެ އަވަހަށް މިނިސްޓްރީން ކުރާނެ ކަމަށް ވެސް އެ ބަޔާނުގައި ވެ އެވެ.