މިއީ ދިވެހި ހައްޖުވެރިންނަށް އެންމެ ލުއި، އިންތިޒާމު ރަނގަޅު ހައްޖު މޫސުމަށް ވާނެ: ރައީސް

މި އަހަރުގެ ހައްޖަކީ ދިވެހި ހައްޖުވެރިންނަށް އެންމެ ލުއި، އިންތިޒާމުތައް އެންމެ ރަނގަޅު ހައްޖު މޫސުމަށް ވާނެ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.

އެ މަނިކުފާނު އެހެން ވިދާޅުވީ، ހައްޖުވެރިންގެ ދަތުރުފަތުރުގެ ކަންތައްތަކުގައި އެއާޕޯޓުން ބޮޑެތި ލުއިތައް ލިބޭ ގޮތަށް ސައޫދީން ކަނޑައަޅާފައިވާ "މައްކާ ރޫޓް އިނީޝިއޭޓިވް" ޕްރޮގްރާމުން ރާއްޖެ އަށް ފުރަތަމަ ފަހަރަށް ފުރުސަތު ދީ، އެ އަށް އިއްޔެ އިން ފެށިގެން އަމަލުކުރަން ފެށުން ފާހަގަކުރައްވައި އެކްސްގައި ކުރެއްވި ޕޯސްޓެއްގަ އެވެ.

ވެލާނާ އިންޓަނޭޝަނަލް އެއާޕޯޓުގައި އިއްޔެ ބޭއްވި ހާއްސަ ރަސްމިއްޔާތެއްގައި އެ ޕްރޮގްރާމުގައި ރާއްޖެ ބައިވެރިވުން އިފުތިތާހު ކޮށްދެއްވީ ރައީސް މުއިއްޒެވެ.

ރައީސް އެކްސްގައި ކުރެއްވި ޕޯސްޓުގައި މިއަދު ވިދާޅުވީ މައްކާ ރޫޓް އިނީޝިއޭޓިވްގައި ބައިވެރިވުމުގެ ފުރުސަތު މިހާތަނަށް ލިބުނު 8 ގައުމުގެ ތެރޭގައި ރާއްޖެ ހިމެނުމަކީ ވަރަށް ބޮޑު އުފަލެއް އަދި ޝަރަފެއް ކަމަށެވެ.

ރާއްޖެއިން މި އަހަރު ހައްޖަށް ދިޔަ ފުރަތަމަ ގްރޫޕުގައި ހިމެނޭ 235 ހައްޖުވެރިންނަށް ސައުދީ ސަރުކާރުން ޖިއްދާ އެއާޕޯޓުން ރޭ ކިޔާފައިވާ ހޫނު މަރުހަބާ ފާހަގަކުރައްވައި ރައީސް ވިދާޅުވީ އެ ގައުމުން އަދާކުރީ ފުރިހަމަ މެހެމާންދާރީއެއް ކަމަށެވެ.

"އިރާދަކުރެއްވިއްޔާ މި ފަހަރުގެ މުޅި ހައްޖު ދަތުރު ވެސް ދިވެހި ހައްޖާޖީންނަށް މިފަދަ އެތައް ލުޔެއް ލިބި، ހިދުމަތުގެ ފެންވަރު ވެސް ރަނގަޅު ވާނެ. ދިވެހި ހައްޖުވެރީންނަށް އެންމެ ލުއި، އެންމެ އިންތިޒާމު ރަނގަޅު ހައްޖު މޫސުމަށް ވާނެ. އުންމީދަކީ ކުރިމަގުގައި މި އަށް ވުރެ ވެސް ކަންކަން ފަހިވުން،" އެމަނިކުފާނު ވިދާޅުވި އެވެ.

ރައީސް ވަނީ ދިވެހި ހައްޖުވެރިންނަށް ވަރަށް ބޮޑެތި ފަސޭހަތަކެއް މިއަހަރު ހޯދައިދެވޭތީ ސައުދީ ސަރުކާރަށް ޝުކުރު އަދާކުރައްވައިފަ އެވެ.

"މައްކާ ރޫޓް އިނީޝިއޭޓިވް" އަކީ ހައްޖުވެރިން އަމިއްލަ ގައުމުން ފުރުމުގެ ކުރިން ދެ ގައުމުގެ އިމިގްރޭޝަނުން ކުރަން ޖެހޭ ކަންކަން އަމިއްލަ ގައުމުގެ އެއާޕޯޓުގައި ތިބެ ނިންމައިގެން ފުރޭނެ އިންތިޒާމު ހަމަޖައްސައިދޭ ޕްރޮގްރާމެކެވެ. އެ ޕްރޮގްރާމުގައި ބައިވެރިވުމުން ހައްޖަށް ދާ މީހުން އެ މީހުންގެ އަމިއްލަ ގައުމުގެ އެއާޕޯޓާއި ޖިއްދާ އެއާޕޯޓުގެ އިމިގްރޭޝަން ކައުންޓަރުތަކުގެ ކިއޫގައި މަޑުކުރާކަށް ނުޖެހޭނެ އެވެ. އަދި ޖިއްދާ އެއާޕޯޓަށް ފައިބައި ލަގެޖުގެ އިންތިޒާރުގައި ވެސް ތިބޭކަށް ނުޖެހޭނެ އެވެ.

އެހެންވެ، ޖިއްދާ އެއާޕޯޓުން އަވަހަށް ނުކުމެ، ހޮޓަލަށް ގޮސް ތައްޔާރު ވެގެން އުމްރާގެ އަޅުކަން އަވަސް ކުރުމުގެ ފުރުސަތު ވެސް މި ފަހަރު ލިބޭނެ ކަމަށް ހައްޖު ކޯޕަރޭޝަނުން ބުންޏެވެ.

އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އިއްޔެ ވިދާޅުވީ މައްކާ ރޫޓުގައި ބައިވެރިވެވޭނީ ވަރަށް ގިނަ ޝަރުތުތަކެއް ފުރިހަމަ ވުމުން ކަމަށެވެ.

ސައޫދީން އެ ފުރުސަތު ދެނީ އެ ގައުމަކުން އެއްފަހަރާ މަދުވެގެން 20،000 މީހުން ހައްޖަށް ދާ ނަމަ ކަމަށާއި ނަމަވެސް ރާއްޖެ އަށް އެ އަދަދާ ހަމައަށް ދެވޭނެ ދުވަހެއް ނޭނގުނަސް އެ ފުރުސަތު ލިބިފައި ވަނީ އެއްވެސް އެއްބަސްވުމެއް ނެތި ކަމަށް މިނިސްޓަރު ޝަހީމް ވިދާޅުވި އެވެ.

"އެހެން ގައުމުތަކާ ކުރެވޭ މުއާމަލާތްތައް އިސްތިސްނާކޮށް، އެއްވެސް އެގްރިމެންޓެއް ނެތި، ރައީސް ޑރ. މުހައްމަދު މުއިއްޒު އަށާއި ދިވެހި ރައްޔިތުންނަށް ދެއްވާ ހާއްސަ ހަދިޔާއްގެ ގޮތުގައި،" ޝަހީމް ވިދާޅުވި އެވެ.

ދުވަސްތަކެއްގެ މެދުކެނޑުމަކަށް ފަހު، ރާއްޖޭގެ ގައުމީ އެއާލައިންގައި މި ފަހަރު ވަނީ ދިވެހި ހައްޖުވެރިން މައްކާ އަށް އުފުލަން މިއަދު ފަށައިފަ އެވެ. ހައްޖަށް ދާ މީހުންގެ ތެރެއިން 50 ޕަސެންޓު މީހުން މޯލްޑިވިއަންގައި ގެންދަން ނިންމާފައި ވާއިރު، ސަރުކާރުން ބުނެފައި ވަނީ މޯލްޑިވިއަނުން ދަތުރު ކުރަން ފެށުމަކީ ހައްޖަށް ދާ މީހުން ދައްކާ ފައިސާ މަދު ކުރުމަށް ސަރުކާރުން ކުރަމުން އަންނަ މަސައްކަތުގެ ތެރެއަށް އިތުރުވި ބޮޅެއް ކަމަށެވެ.