ތިނަދޫ ކައުންސިލްގެ މޭޔަރު ސައުދު މަސައްކަތުގައި: އެލްޖޭއޭ އިން ފިޔަވަޅު އެޅީ ގާނޫނާ ހިލާފަށް ކަމަށް ބުނެ އޭނާ ވަނީ ކޯޓަށް މައްސަލަ ހުށަހަޅާފައި.- ފޮޓޯ: ފަޔާޒު މޫސާ | މިހާރު
06 ޖުލައި 2025 - 23:49
ތިނަދޫ ސިޓީ ކައުންސިލަށް ތުހުމަތުކޮށް ލޯކަލް ގަވަމަންޓް އޮތޯރިޓީ (އެލްޖީއޭ) އަށް ހުށަހަޅާފައިވާ މައްސަލަތަކާ ގުޅިގެން ހެދި އިންކުއަރީއަށް ފަހު، އެ ސިޓީގެ މޭޔަރު ސައުދު އަލީ އާއި ޑެޕިއުޓީ މޭޔަރު ނަސްރުﷲ އަލީ ސަސްޕެންޑްކުރީ ގާނޫނާ ހިލާފަށް ކަމަށް ވިދާޅުވެ، އެ މައްސަލަ ސިވިލް ކޯޓަށް ހުށަހަޅައިފި އެވެ.
ސައުދު، "މިހާރު" އަށް ވިދާޅުވީ މައްސަލަ ސިވިލް ކޯޓަށް ހުށަހެޅީ އެލްޖީއޭ އިން އަމަލުކުރީ ގާނޫނާއި އިންކުއަރީތަކާ ގުޅިގެން އެކުލަވާލާފައިވާ އުސޫލުތަކާ ހިލާފަށް ކަމަށް ގަބޫލުކުރައްވާތީ ކަމަށެވެ.
އޭނާ ވިދާޅުވި ގޮތުގައި ގާނޫނުގައި އެލްޖީއޭއަށް ލާޒިމުކުރާ ކަންކަން ވެސް ފުރިހަމަކޮށްފައެއް ނުވެ އެވެ. އަދި އިޖުރާއަތުތައް ފުރިހަމަނުކޮށް ފިޔަވަޅު އެޅީ ސިޔާސީ ބޭނުމެއްގައި ކަމަށް އޭނާ ތުހުމަތު ކުރައްވަ އެވެ.
އޭނާ ވިދާޅުވި ގޮތުގައި އެލްޖީއޭ އިން އެ ފިޔަވަޅުތައް އެޅީ، ރައްޔިތުންގެ މަޖިލީހުގެ މެމްބަރަކު އިސްވެ ހުންނަވަ އެވެ. ސިޔާސީ ގޮތުން ނިންމުންތައް ނިންމުމަކީ ލާމަރުކަޒީ ނިޒާމު ވަރަށް ބޮޑަށް ނުރައްކަލަކަށް ވައްޓާލުން ކަމަށް ވިދާޅުވެ ނުރުހުންފާޅުކުރެއްވި އެވެ.
"200 މައްސަލަ ކައުންސިލާ ގުޅިގެން ބެލިޔަސް މައްސަލައެއް ނެތް. 2000 މައްސަލަ ބެލިޔަސް މައްސަލައެއް ނެތް. އެކަމަކު ބަލަންޏާ ބަލަންވާނީ ގާނޫނީ އިމުގެ ތެރެއިން އިޖުރާއަތުތައް ފުރިހަމަކޮށްގެން ރައްޔިތުންނަށް މައުލޫމާތު ސާފުކޮށްދީފައި،" އޭނާ ވިދާޅުވި އެވެ.
ސައުދު ވިދާޅުވީ އެ އިންކުއަރީ ކުރިއަށް ގެންދަން ތިނަދޫ ކައުންސިލުން ވާނީ ފުރިހަމައަށް އެއްބާރުލުން ދީފައި ކަމަށެވެ. އެކަމަކު އިންކުއަރީ ކުރިއަށް ގެންދިޔައީ ސީދާ އޭނާއަށް ޓާގެޓުކޮށްގެން ކަމަށާއި އެންޓި ކޮރަޕްޝަން ކޮމިޝަން (އޭސީސީ) އިން އުވާލާފައިވާ ގާނޫނެއްގެ ދަށުން ވެސް ފިޔަވަޅު އަޅާފައި ކަމަށް ވިދާޅުވި އެވެ.
"އެހެންވީމަ އޭގެއިން އެބަ ސާފުވޭ އެބޭފުޅުންގެ ނިޔަތް ހަގީގަތުގައި ސާފު ނޫންކަން،" ސައުދު ވިދާޅުވި އެވެ.
ތިނަދޫ ސިޓީ ކައުންސިލްގެ އިންކުއަރީ ހެދުމަށް މިދިޔަ މާޗު މަހު އެލްޖީއޭގެ ޓީމެއް ވަނީ ތިނަދު އަށް ގޮސް ކައުންސިލްގެ މެމްބަރުންނާ ބައްދަލުކޮށް ބަޔާން ނަގައި ލިޔެކިޔުންތައް ކައުންސިލުން ހޯދައިފަ އެވެ. އިންކުއަރީ އަށް ފަހު ކައުންސިލަށް ޖަވާބުދާރީވާން ހަތް ދުވަހުގެ މުއްދަތެއް ވެސް ދިނެވެ. އެ މައްސަލާގައި ކައުންސިލުން ޖަވާބުދާރީވި ކަމަށް އޭރު އެލްޖީއޭ އިން ބުނެފައިވެ އެވެ.
އެ މައްސަލާގައި މިދިޔަ މަހުގެ 25 ގައި އެލްޖީއޭ އިން ވަނީ މޭޔަރަށް މުސާރަ އާއި އިނާޔަތް ނުލިބޭ ގޮތަށް ތިން މަހަށް ސަސްޕެންޑްކޮށްފަ އެވެ. އަދި ޑެޕިއުޓީ މޭޔަރަށް ވެސް މުސާރަ އާއި އިނާޔަތް ނުލިބޭ ގޮތަށް އެއް މަސް ދުވަހަށް ސަސްޕެންޑްކުރި އެވެ.
އެލްޖީއޭ އިން ބުނެފައިވާ ގޮތުގައި އެ އިންކުއަރީގައި ބެލީ ތިނަދޫ ކައުންސިލުގެ ވާޖިބު އަދާކުރުމަށް ނުކުޅެދިފައިވާ ކަމަށާއި ކައުންސިލުގެ ބާރުތަކާއި ވަސީލަތްތައް ނަހަމަ ގޮތުގައި ބޭނުން ހިފައި ކައުންސިލަރުންގެ ސުލޫކީ މިންގަނޑާއި ހިލާފަށް އެ ސިޓީ ކައުންސިލުގެ މޭޔަރާއި މެމްބަރުން އަމަލުކުރާ ކަމަށް ބުނެ އަމިއްލަ ފަރާތަކުން ހުށަހެޅި މައްސަލަތެކެކެވެ.
އިންކުއަރީއަށް ފަހު އެލްޖީއޭ އިން އެކުލަވާލި ރިޕޯޓުގައި 19 މައްސަލައެއް ފާހަގަކޮށްފައިވެ އެވެ. އޭގެ ތެރޭގައި ހިމެނެނީ ކައުންސިލަށް އިދާރާތަކުން ފޮނުވާ ސިޓީތަކަށް ޖަވާބުނުދީ ފޮނުވާލާ މައްސަލަ އާއި ތިނަދޫން އެހެން ރަށްތަކަށް ރަށްވެހިކަން ބަދަލުކުރުމަށް ހުށަހެޅުމުން 5000ރ. ގެ ފީއެއް ނަގާ މައްސަލަ އާއި ތިނަދޫގައި އަޅާ 200 ހައުސިން ޔުނިޓަށް ކުރިމަތިލުމަށް ހައުސިން މިނިސްޓްރީގެ މަޝްވަރާ ނެތި ހުޅުވާލުމާއި އެކަން ނުކުރަން އެންގި އެންގުމަށް އަމަލުނުކުރުމެވެ. އަދި ކައުންސިލުން އިއުލާނުކޮށްގެން ހަދާފައިވާ މޮނިއުމަންޓް ޕްރޮޖެކްޓްގެ ފައިސާ މޭޔަރުގެ ނަމުގައި ރަޖިސްޓްރީކޮށްފައިވާ އަމިއްލަ ފަރުދުންގެ ވިޔަފާރި އެކައުންޓަކަށް ޖަމާކުރި މައްސަލަ ފަދަ އިތުރު މައްސަލަތަކެއް ވެސް އެލްޖީއޭ އިން ބެލި އެވެ.
ތިނަދޫ މޭޔަރާއި ޑެޕިއުޓީ މޭޔަރަށް ފިޔަވަޅު އެޅުމުގެ އިތުރުން ކައުންސިލުގެ އެހެން މެމްބަރުންނަށް ވަނީ ނަސޭހަތް ދީފަ އެވެ.
Copyright © 2025 Mihaaru · Terms and Conditions · Privacy Policy
ކޮމެންޓްތައް
ހޮޅިންގެ ވެރިކަން
07 July 2025
ދަރިންނޭ މިއަނިޔާވެރި ކެހިވެރި ދޮގުވެރި ހޮޅިންގެ ވެރިކަން ނިމޭނީ 2028 ނޮވެމްބަރ 11 އައެވެ . އެއްތެރިވާށެވެ ނަސްރާއަ ކާމިޔާބު ލިބޭނީ ހައްގަށެވެ އިންޝާ ﷲ .
ސަރުކާނު
07 July 2025
ހަޤީޤަތުގައި ކައުންސިލްތަކުގެ ސަބަބުން ލިބޭ ފައިދާއަށްވުރެ ގިނައީ ގެއްލުން. ޕާޓީގެ ކައުންސިލުން ކިތަންމެ ވައްކަމެއް ކުރިޔަސް ނުބެލޭ އެއީ ވަކި ސަރުކާރެއްނޫން. ކައުންސިލްތަކަށް ކުރަންޖެހޭ ޚަރަދު އެހާބޮޑު. ކައުންސިލަރުން އެހާފޮނި. ފައިސާ ޚަރަދުކުރުމުގަ ގޮތެއްފޮތެއް ނެތް. ކައުންސިލްތަކުން ޕްރޮޖެކްޓް ހިންގުމަށް އެކިއެކި ކޮންސަލްޓުން ހޯދުމަށް ކައުންސިލަރުންނަށް ފައިދާ ނުވާގޮތަކަށް ނޫނީ ނުބަލާ. ޚާއސަކޮށް ދެކުނުގެ ރަށްރަށުގެ ކައުންސިލްތައް އެހާފޮނިބޮޑު
އައިމިނާ
07 July 2025
މާތްކަލާކޯ. ތިޔަ ކައުންސިލްތައް އުވާލާ. ކޮރަޕްޝަން އިންތިހާ. ކޮންމެ ދުވަހަކު ނޫސް ފަޅުފިލުވާލާ. ތިޔަ ކައުންސިލްތަކުގަ ތިބީ ދުވަހަކު ފައިސާ ނުފެނި އުޅުނުބައެއްހެން ހީވޭ. އަލުން ކަތީބުން އައްޔަންކުރޭ. އަތޮޅުވެރިން އައްޔަންކުރޭ.
ޢޭސީސީ
07 July 2025
އަޅުގަނޑު މެން ގާނޫނު ހަދާ ގާނޫނު އުވާއެއް ނުލަން. އެއިިީ ރައްޔަތުންގެ މަޖިލިހަށް. އެކަނި އޮންނަ ބާރެއް. ތިބޭފުޅާ ހެން ނުލިބޭ ބާރެއް ހައްގެއް ބޭނުމެއް ނުކުރަން.
އައިމިނާ
07 July 2025
ތިޔަކޯޓުގެ ހުރިވަރެއްވެސް އެނގިދާނެތާ.
އައިމިނާ
07 July 2025
މިއީ ރާއްޖޭގެ ގާނޫނަށްވުރެ މަތީގަ އުޅޭ ބައެއްބާ.
ތިނަދޫ ލާޓް
07 July 2025
ހަޤީޤަތަކީ ތިނަދޫ މޭޔަރ އަށް މިހާލު ޖެއްސީ ނުޤަވާއިދުން ކަންތައްތަކެއް ކުރުމަށް އެމްޑީޕީ ސަރުކާރުން މީނާއަށް އެންގުމުން / ދޮގުހަދައިގެން ސިޓީއަކަށް ތިނަދޫ ބަދަލުކުރީ އަމިއްލަ އެދުމުގައި
ބްރޯސް
07 July 2025
ހިތުން ލައްކަ މޮޅުތަކެއް ވާނެކަމަށް ހީކޮށް ކޯޓަށް ދިއަޔަސް ކޯޓަކުން ތިކަމެއް ނުނިމޭނެ.
ލަދު ބާއްވާ
07 July 2025
"ތިނަދޫ ސިޓީގެ މޭޔަރު" ކިޔާ މަގާމަކަށް ތިނަދޫ ރައްޔިތުންނެއް މީހަކަށް ވޯޓެއް ނުދޭ. ރައްޔިތުން ވޯޓު ދީގެން ހޮވީ ތިނަދޫ ކައުންސިލްގެ ރައީސެއް. އެ ރައީސް ހެދުނު ގޮތަކުން ވެވުނު ގޮތަކުން ސީޓިގެ ދަރަޖަޔަށް ނުފެތުނަސް ތިނަދޫ ސިޓީއަކަށް ބަދަލުކޮށް، އަމިއްލަޔަކަށް މަގާމު ބަދަލުކޮށް، މުސާރަ ޝީޓު ހަދާ، އަމިއްލަ އަންބޮޑިޔަށް ދައުލަތުގެ ބަންޑާރަ ކަފަ ލައްވާފަ، މިކަންކަންވެސް މަތިއަޅުވަނީ އެހެން މީހުނާ ހެދި ވާ ކަންކަމުގެ ގޮތުގަ.
1181
07 July 2025
އެވަރުގެ ބޮޑެތި ސީރިއަސް އަދި ގިނަ ތުހުމަތުތަކެއް ކޮށް ސަސްޕެންޑް ކުރުމުން، ކިރިޔާވެސް ލަދެއް ހުރި ނަމަ އިސްތިއުފާ ދިނީސް.
ސަރުކާނު
07 July 2025
ހަޤީޤަތުގަވެސް