މިޔަރު ހިމާޔަތްކުރުމުގެ ނަމޫނާ ދަމަހައްޓަން ރާއްޖެއަށް ގޮވާލައިފި

މިޔަރު ހިމާޔަތްކޮށް، ރައްކާތެރިކުރަން ރާއްޖެ އިން މުޅި ދުނިޔެ އަށް ދައްކައިދީފައިވާ ނަމޫނާ ދަމަހައްޓަން މިޔަރު ހިމާޔަތްކުރުމަށް މަސައްކަތްކުރާ ބައިނަލްއަގުވާމީ ޖަމިއްޔާއަކުން ގޮވާލައިފި އެވެ.

ރާއްޖޭގައި ކަށިމިޔަރުގެ މަސްވެރިކަމަށް އަންނަ ނޮވެމްބަރު މަހުން ފެށިގެން ސަރުކާރުން ހުއްދަ ދޭނެ ކަމަށް ރައީސް ޑރ. މުހައްމަދު މުއިއްޒު މިދިޔަ އަންގާރަ ދުވަހު އިއުލާން ކުރެއްވުމާ ގުޅިގެން، އިނގިރޭސި ވިލާތުގެ 'ޝާކް ގާޑިއަން' ޖަމިއްޔާއިން ވަނީ ކަންބޮޑުވުން ފާޅުކޮށްފަ އެވެ.

އެ ޖަމިއްޔާ އިން ރައީސަށް ފޮނުވި ސިޓީއެއްގައި ބުނީ، ރާއްޖެއަކީ 2010 ވަނަ އަހަރުން ފެށިގެން މިޔަރު ހިމާޔަތް ކޮށްފައިވާ ގައުމެއް ކަން އިއުލާނުކުރުމާ ގުޅިގެން، އެއީ ދުނިޔެ އަށް ގާއިމުކޮށްދިން ނަމޫނާއެއްގެ ގޮތުގައި ބަލައިގެންފައިވާ ކަމަށެވެ.

އަދި އެ ނިންމުމުގެ ސަބަބުން، އިކޯ-ޓޫރިޒަމް މަންޒިލެއްގެ ގޮތުގައި ރާއްޖެ މަޝްހޫރުވެ، ހާއްސަކޮށް ޑައިވިން ޓޫރިޒަމުން ރާއްޖޭގެ އިގުތިސާދަށް ވަރަށް ބޮޑު ހިއްސާއެއް ކޮށްދީފައިވާ ކަމަށް އެ ސިޓީގައި ފާހަގަކޮށްފައި ވެ އެވެ.

'ޝާކް ގާޑިއަން' އިން ބުނީ، މިޔަރުގެ މަސްވެރިކަމުން ލިބޭނެ އާމްދަނީ އަށް ވުރެ، އެތައް ގުނައެއް އިތުރަށް ޑައިވިން ޓޫރިޒަމުން ރާއްޖެއަށް ފައިދާވާ ކަމަށެވެ.

މިޔަރު މަސްވެރިކަން އަލުން ތައާރަފް ކުރުމަކީ، އެ ސިޓީގައި ބުނި ގޮތުގައި، ރާއްޖޭން ހޯދާފައިވާ މި ކާމިޔާބީ އަށް ބުރޫއަރާ، މިޔަރު ހިމާޔަތް ކުރުމުގައި ދުނިޔޭގައި ރާއްޖޭން ހޯދާފައިވާ މަގާމަށް ނުރައްކާވާނެ ކަމެކެވެ.

ދެމެހެއްޓެނިވި ގޮތެއްގައި މިޔަރުގެ މަސްވެރިކަން ރެގިއުލޭޓް ކުރުމަކީ ކުރެވޭނެ ކަމެއް ނޫން ކަމަށާއި މިކަން ވަކި ބާވަތެއްގެ މިޔަރަކަށް ލިމިޓުކޮށްފައި ބޭއްވުމަކީ ނާދިރު ކަމެއް ކަމަށް އެ ޖަމިއްޔާއިން ބުނެފައި ވެ އެވެ.

އަދި މިޔަރަކީ ރާއްޖޭގެ މުރަކަތަކާއި ފަރުތަކުގެ ސިއްހަތު ދެމެހެއްޓުމުގައި މުހިންމު ދައުރެއް އަދާކުރާ އެއްޗަކަށް ވާއިރު، މިޔަރުގެ އާބާދީ އަށް ކުރާ ނޭދެވޭ އަސަރު، ރާއްޖޭގެ އިގުތިސާދު ބަރޯސާވެފައިވާ އޮތް ކަނޑުގެ ވަސީލަތްތަކަށް ކުރާނެ ކަމަށް އެ ސިޓީގައި ބުންޏެވެ.

ރާއްޖޭގެ އިގުތިސާދު ސިންދަފާތުކޮށް، އާމްދަނީ ހޯދޭނެ އިތުރު މަގުތައް ކޮށުމަކީ މުހިންމު ކަމަކަށް ވިޔަސް، އެ ޖަމިއްޔާއިން ބުނި ގޮތުގައި، ދިވެހި ސަރުކާރުން ސިޔާސަތުތައް ކަނޑައަޅަން ޖެހޭނީ ތިމާވެއްޓާއި ކަނޑުގެ ދިރުންތައް ހިމާޔަތްކޮށް، ރާއްކާތެރިކުރެވިފައިވާ ގައުމެއްގެ ގޮތުގައި ރާއްޖޭން ގާއިމުކޮށްފައިވާ ނަމޫނާ ނުގެއްލޭ ގޮތަށެވެ.

އެހެންކަމުން، މިޔަރު މަސްވެރިކަމަށް އަލުން ހުޅުވައިލަން ނިންމި ނިންމުމާމެދު ދެވަނަ ވިސްނުމަކަށް ދާން އެ ޖަމިއްޔާއިން ވަނީ ރައީސް މުއިއްޒަށް ގޮވާލައިފަ އެވެ.

މިޔަރުގެ މަސްވެރިކަން މަނާކުރުމާ ޖެހެންދެން އެންމެ ފުޅާ ދާއިރާއެއްގައި މިޔަރުގެ މަސްވެރިކަން ކުރި ހދ. ކުޅުދުއްފުށީ ރައްޔިތުންނާ ބައްދަލުކުރަން މިދިޔަ ހޯމަ ދުވަހުގެ ރޭ އެ ރަށުގައި ބޭއްވި ޖަލްސާގައި ރައީސް މުއިއްޒު ވިދާޅުވީ މިޔަރުގެ މަސްވެރިކަން ކުރަން ބޭނުންވާ ފަރާތަކަށް އެކަން ފަހިވާނެ ކަމަށާއި އެހެން ތައްޔާރުވާން ގޮވައިލައްވާ ކަމަށެވެ.

"ފިޝަރީޒް މިނިސްޓްރީ، އެންވަރަޔަމަންޓް މިނިސްޓްރީން ގަވައިދުތަކާ އެއްޗެހި ބަލައި ވަރަށް ގިނަ މަސައްކަތް ކޮށްފިން އަދި ކުރަމުން މިދަނީ. މެނޭޖްމެންޓް ޕްލޭނެއް އެކުލަވާލާ ނިމިއްޖެ. މި ޕްލޭންގެ ދަށުން 1 ނޮވެމްބަރުން ފެށިގެން ކަށި މިޔަރުގެ މަސްވެރިކަން ކުރަން ހުޅުވާލާނަން،" ރައީސް ވިދާޅުވި އެވެ.

ރައީސް ވިދާޅުވީ މިޔަރުގެ މަސްވެރިކަން ފެށުމަކީ ވަރަށް މުހިންމު ދޮރެއް ކަމަށާއި އެކަމުގައި ކުރިއަށް ދާން ބޭނުންވާ ފަރާތްތަކަށް އެ ފުރުސަތު އޮންނާނެ ކަމަށެވެ.