ޓީޗަރުންގެ މަޝްވަރާ ހިމަނައި، 210 ޕްރިންސިޕަލުންނާ އެކު މި އަހަރުގެ ކޮންފަރެންސް ފަށައިފި

ރާއްޖޭގެ ހުރިހާ ޕްރިންސިޕަލުންނަށް ހުޅުވާލައިގެން ބާއްވަމުން އަންނަ މި އަހަރުގެ ކޮންފަރެންސް މިއަދު ފަށައިފި އެވެ.

މިއަދާއި މާދަމާގެ ނިޔަލަށް 210 ސްކޫލެއްގެ ޕްރިންސިޕަލުންނާ އެކު ކުރިއަށް ގެންދާ އެ ކޮންފަރެންސް ކްރޮސްރޯޑްސްގައި ފައްޓަވައި ދެއްވީ ރައީސް ޑރ. މުހައްމަދު މުއިއްޒު އެވެ.

އެ ރަސްމިއްޔާތުގައި ވާހަކަ ދައްކަވަމުން އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު ވިދާޅުވީ، މީގެ ކުރިން ޕްރިންސިޕަލުންގެ ކޮންފަރެންސް ބާއްވާފައިވަނީ ޓީޗަރުންގެ ބައިވެރިވުމާ އެކު ނޫން ކަމަށެވެ.

ނަމަވެސް މި ފަހަރުގެ ކޮންފަރެންސް ބާއްވާފައި ވަނީ ޕޮލިސީ ކަރުދާސްތައް ފޮނުވައި ފުޅާ ދާއިރާއެއްގައި ޕްރިންސިޕަލުންނާއި ޓީޗަރުން މަޝްވަރާކޮށް އެ ބޭފުޅުންގެ ރެކަމަންޑޭޝަންތައް ހިފައިގެން އައިސް ކޮންފަރެންސްގައި މަޝްވަރާ ކުރާ ގޮތަށް ކަމަށް މިނިސްޓަރު ވިދާޅުވި އެވެ.

"ޓީޗަރުންނަށް ދިމާވާ ދަތިތައް، އެއީ ކްލާސްރޫމުގައި ކަމުގައި ވިޔަސް މެ، ކޮމިޔުނިޓީ ލެވެލްގައި ކަމުގައި ވިޔަސް، ކަރިކިޔުލަމް އިމްޕްލިމެންޓޭޝަން ލެވެލްގައި ކަމުގައި ވިޔަސް އަދި އެއީ ސީދާ ކްލާސް ރޫމުގައި ކިޔަވައިދނުމަށް ހުރި ދަތިތައް ކަމުގައި ވިޔަސް މެ، މި ކަންތައްތަކަށް މަޝްވަރާ ކުރެވިގެން އެ ބޭފުޅުންގެ [ޓީޗަރުންގެ] ރިކޮމެންޑޭޝަންތަކަށް، މި ކޮންފަރެންސް ކުރިއަށް ދާނީ،" އިސްމާއިލް ވިދާޅުވި އެވެ.

މިނިސްޓަރު ވިދާޅުވީ އޭގެ ސަބަބުން ތައުލީމީ ދާއިރާ އަށް ރަނގަޅު ޓީޗަރުން ހޯދުމަށް ކުރަން ޖެހޭ ކަންކަމާ ގުޅޭ ގޮތުން މަޝްވަރާކޮށް، ތައުލީމީ ދާއިރާ އަށް އިންގިލާބީ ބަދަލެއް ގެނެވޭނެ ކަމަށެވެ.