ސަރުކާރުން އިއުލާނުކޮށްފައިވާ "އާއިލީ ބޯހިޔާވަހިކަން" ޕްރޮގްރާމަށް ޝަރުތު ކަނޑައަޅާފައިވާ ގޮތާ މެދު އާންމުންގެ މެދުގައި ހުރި ބައެއް ކަންބޮޑުވުންތަކަށް ހައުސިން މިނިސްޓަރު ޑރ. އަބްދުﷲ މުއްތަލިބު ޖަވާބުތަކެއް ދެއްވައިފި އެވެ.
އަނބިމީހާ ނުވަތަ ފިރިމީހާއަށް އެއްވެސް ބޯހިޔާވަހިކަމެއް އޮތުމުން މި ޕްރޮގްރާމަށް ޝަރުތު ހަމަނުވާއިރު ބޯހިޔާވަހިކަމެއް އޮތުން އުސޫލުގައި މާނަކޮށްފައިވާ ގޮތާ މެދު މިފަހަރު ޝަކުވާ ގިނަ އެވެ.
އެކަމާ ގުޅޭ ގޮތުން ސޯޝަލް މީޑިއާ "ލިންކްޑްއިން" ގައި ކުރެއްވި ޕޯސްޓެއްގައި މުއްތަލިބު ވިދާޅުވީ އެއްވެސް ގެއެއް ނުވަތަ ގޯއްޗެއް ނެތް މީހުން ނޫނީ އާއިލީ ބޯހިޔާވަހިކަމުގެ ޕްރޮގްރާމަށް ޝަރުތު ހަމަނުވާނެ ކަމަށް ކަނޑައެޅުމަކީ އެންމެ އިންސާފުވެރި އަދި ކޮންމެހެން ވެސް އެކަން އޮންނަން ވެސް ޖެހޭ ގޮތް ކަމަށެވެ. އެ ޕްރޮގްރާމްގެ ބޭނުމަކީ ބިންގަލެއް އަޅައިދިނުން ކަމަށާއި އެއީ ހަރުމުދާ ގިނަ ކުރުމުގެ ފުރުސަތެއް ނޫން ކަމަށް ވުމީ އުސޫލު އެގޮތަށް އޮންނަން ޖެހޭ ފުރަތަމަ ސަބަބުގެ ގޮތުގައި މިނިސްޓަރު ފާހަގަކުރެއްވި އެވެ.
"އާއްމު ގެދޮރުވެރިކަމުގެ ސިޔާސަަތު އޮތީ އެންމެ ސަބަބަކަށްޓަކައި. އެއީ އަބުރުވެރިކަމާއި ހަމަޖެހުމަށް ބޭނުންވާ އަަސާސީ ބިންގާ އެޅިފައި ނުވާ އެއްވެސް އާއިލާއެއް ނުބޭއްވުން،" ޕޯސްޓްގައި މުއްތަލިބު ވިދާޅުވި އެވެ.
ބޯހިޔާވަހިކަމަކީ ބޯނަހެއް ނޫން ކަމަށާއި އެއީ ތައުލީމާއި ވަޒީފާ ފަދަ އެންމެހާ ކަންކަމެއްގެ ފަށާ ހިސާބު ކަމަށް ވެސް އޭނާ ވިދާޅުވި އެވެ.
އެއްވެސް ތަނެއް ނެތް މީހުންނަށް އިސްކަން ދިނީ ކީއްވެ؟
އާއިލީ ބޯހިޔާވަހިކަން ޕްރޮގްރާމުގެ ދަށުން ފްލެޓާއި ގޯތި ދޭ އުސޫލުގައި މިފަހަރު ޝަރުތު ހަމަވަނީ ހަމަ އެއްވެސް އެެހެން ތަނެއް ނެތް މީހުންނަށް ކަމަށް ކަނޑައެޅީ މިނިސްޓަރު ވިދާޅުވި ގޮތުގައި އެއްވެސް ތަނެއް ހުރި މީހުންނަށް ވުރެ ބޮޑަށް އެ މީހުންނަށް އިސްކަން ދޭން ޖެހޭތީ އެވެެ. އެއީ އޭނާ ވިދާޅުވި ގޮތުގައި ބޯހިޔާވަހިކަމުގެ މައްސަލަ އޭގެ އެންމެ ފުންމިނަށް ކުރިމަތިވެފައިވާ މީހުން އެހާލަތުން ސަލާމަތްކުރަން ޖެހޭތީ އެވެ.
މިފަހަރުގެ އުސޫލުން ލިބޭ ބަޔަކީ އެފަދަ އާއިލާތައް ކަަމަށް ހަދަން ޖެހޭ ކަމަށް މިނިސްޓަރު ދެކެވަޑައިގަންނަވާ ތިން ސަބަބެއް އެ ޕޯސްޓްގައި ބަޔާންކުރައްވާފައި ވެ އެވެ.
- ފޯލްބެކް އޮޕްޝަނެއް އެފަދަ އާއިލާތަކަށް ނެތުން (ގޮތް ހުސްވެގެން ގޮސް ވަންނާނެ ތަނެއް ވެސް ނެތުން)
- ދުރު މުސްތަގުބަލަށް ބަލާއިރު ވެސް އެއްވެސް ރައްކާތެރިކަމެއް ނެތުން
- އަގުތައް ބޮޑުވެ، އުޅޭތަނުން ނުކުންނަން ޖެހިދާނެ ހާލަތަކުން ސަލާމަތްވާނެ މަގެއް ނެތުން
މީހުންގެ ބަދަލުގައި އާއިލާތަކުގެ ހާލަތު ބަލާ ސަބަބު
މުއްތަލިބު ލިއުއްވާފައިވާ ގޮތުގައި ބޯހިޔާވަހިކަމަށް ޑިމާންޑް އުފެދެނީ ވަކިވަކި މީހުންގެ ފަރާތަކުން ނޫނެވެ. ނަމަވެސް އެ ޑިމާންޑް އުފެދެނީ އާއިލާތަކަކުން ކަމަށާއި އާމްދަނީ އާއި ޒިންމާ އާއި ރިސްކްތައް ވެސް ހިއްސާކުރަނީ އާއިލާތަކުން ކަމަށް އޭނާ ވިދާޅުވި އެވެ.
"މީހެއްގެ މިލްކިއްޔާތު ހުރި ގޮތެއް ވަކިން ބެލުމުގެ ބަދަލުގައި އާއިލީ ބޯހިޔާވަހިކަން ޕްރޮގްރާމްގައި ގޭބިސީތަކުގެ ހާލަތު ބަލަނީ އެހެންވެ،" އޭނާ ވިދާޅުވި އެވެ.
ގޭބިސީއެއްގެ ގޮތުގައި، ވަންނާނެ ކޮންމެވެސް ގެއެއް ނުވަތަ ބިންކޮޅެއް އޮތް ބަޔަކަށް، އެފަދަ އެއްވެސް ގޮތެއް ނެތް ބަޔަކަށް ދިނުމުގެ ކުރިން ރައްޔިތުންގެ ފައިސާއިން ހަރަދުކޮށްގެން ހަދާ ހައުސިން ޔުނިޓެއް ދީފި ނަމަ ހަމަހަމަކަން ގާއިމްވުމުގެ ބަދަލުގައި ނަހަމަކަން ވާނީ ބޮޑު ކަމަށް އޭނާ ވިދާޅުވި އެވެ.
މުއްތަލިބު ވިދާޅުވެފައިވާ ގޮތުގައި ބޯހިޔާވަހިކަން ލިބޭ މީހުންގެ އަދަދު އިތުރުވަމުން އަންނަ ވަރަކަށް އެ އުސޫލު ބަދަލުވެސް ވާނެ އެެވެ.
މިފަހަރުގެ އުސޫލުގައި އިސްކަން ދީފައިވަނީ އެއްވެސް ބޯހިޔާވަހިކަމެއް ނެތް މީހުން ކަމަށް ކަނޑައަޅާފައި ވާއިރު މީގެ ކުރިން ސޯޝަލް ހައުސިން ލިބި އެކަމަކު މިހާރު އާއިލާއާ އެކު އެތަންތަނުގައި އުޅެން ޖާގަ ދަތިވެފައިވާ މީހުންނަށް، އެ ތަންތަން ދޫކޮށްލާފައި އާ ޕްރޮގްރާމަށް ކުރިމަތިލެވޭނެ ގޮތްތަކެއް ކަނޑައަޅާފައިވެ އެވެ.