މަސްތުވާތަކެތި ޓްރެފިކް ކުރާ ކަމަށް އެއްބަސްވެ، ދައުލަތާ އެކު އެއްބަސްވުން ހެދުމުން 12 އަހަރުގެ ޖަލު ހުކުމެއް ކްރިމިނަލް ކޯޓުން އިއްވައިފި އެވެ.
މަސްތުވާތަކެތި ޓްރެފިކް ކުރާ ކަމުގެ ކުށަށް ކަނޑައަޅާފައިވާ އަދަބަކީ އުމުރަށް ޖަލަށްލުން ނުވަތަ 25 އަހަރުގެ ޖަލު ހުކުމެވެ. ނަމަވެސް، ކުށަށް އިއުތިރާފު ވެއްޖެ ނަމަ އެއްބަސްވެވޭ ގޮތުގެ މަތިން އަދަބަށް ލުއި ލިބެ އެވެ.
ހ. ފިނިފެންމާގޭ، އިބްރާހިމް ޒިހުނީގެ މައްޗަށް ކްރިމިނަލް ކޯޓުން އިއްޔެ ހުކުމް އިއްވީ 2020 ވަނަ އަހަރު ފުލުހުން ހިންގި އޮޕަރޭޝަނެއްގައި އޭނާ ދިރިއުޅޭ ގެއިން މަސްތުވާތަކެތި އަތުލައިގެންފައިވާ މައްސަލައިގަ އެވެ.
އެ މައްސަލައިގައި އޭނާގެ މައްޗަށް އިއްވި ކެނެބިސް ޓްރެެފިކް ކުރުމުގެ ދައުވާ އަށް ޝަރީއަތުގެ މަޖިލީހުގައި އިއުތިރާފުވެ، ދައުލަތާ އެކު އިއުތިރާފު އެއްބަސްވުމެއް ހެދި އެވެ.
އެ އެއްބަސްވުން ބަލައިގަނެ، ކޯޓުން ނިންމީ އެ އަށް ރިޔަތްކޮށް ޒިހުނީގެ މައްޗަށް ހުކުމް އިއްވުމަށެވެ. އެގޮތުން، ލުއި އަދަބެއްގެ ގޮތުން އިއްވާފައިވަނީ 12 އަހަރާއި ހަ މަސް ދުވަހަށް ޖަލަށްލުމާ އެކު، 50،000ރ. އިން ޖޫރިމަނާ ކުރުމަށެވެ.