ވެލާނާ އިންޓަނޭޝަނަލް އެއާޕޯޓުން މިދިޔަ އަހަރު 89،000 ޓަނުގެ ކާގޯ އުފުލި ކަމަށް ތަފާސް ހިސާބުން ދައްކައިފި އެވެ.
އެ އެއާޕޯޓް ހިންގާ އެމްއޭސީއެލް އިން ސޯޝަލް މީޑިއާގައި މިއަދު ކުރި ޕޯސްޓެއްގައި ބުނީ މިދިޔަ އަހަރު 89،163 ޓަނުގެ ކާގޯ އުފުލާފައިވާ ކަމަށެވެ. އެއީ ކުރީ އަހަރާ އަޅާބަލާއިރު 10 ޕަސެންޓުގެ ކުރިއެރުމެއް ކަމަށް އެ ކުންފުނިން ބުންޏެވެ.
އޭގެ ތެރެއިން 66،480 ޓަނުގެ ކާގޯއަކީ އިންބައުންޑް އަދި 22،323 ޓަނުގެ ކާގޯއަކީ އައުޓްބައުންޑް މުދަލެވެ.
ޓްރާންޝިޕްމަންޓުގެ ގޮތުގައި، 16،372 ޓަނުގެ މުދާ ގެނެސްފައިވެ އެވެ. އެއީ މިދިޔަ އަހަރަށް ވުރެ 22 ޕަސެންޓުގެ ކުރިއެރުމެކެވެ.
ޓްރާންޝިޕްމަންޓް މުދަލުގެ ތެރެއިން ސީ-ޓު-އެއާ މެދުވެރިކޮށް 3،192 ޓަނުގެ މުދާ އެކްސްޕޯޓްކޮށްފައިވެ އެވެ. އަދި އެއާ-ޓު-އެއާ މެދުވެރިކޮށް 13،180 ޓަނުގެ މުދާ އެކްސްޕޯޓުކޮށްފައިވެ އެވެ.
ވެލާނާ އެއާޕޯޓުގެ މިދިޔަ އަހަރު ފްރެއިޓާ މޫވްމަންޓްސް (ކާގޯ އުފުލާ މަތިންދާބޯޓުތަކުގެ ދަތުރުތަކުގެ އަދަދު) އަކީ 524 ކަމަށް އެމްއޭސީއެލް އިން ބުންޏެވެ.
ވެލާނާ އެއާޕޯޓުން ކާގޯ ޓްރާންސްޝިޕްމަންޓް ހިދުމަތް ހޯދާ އެއާލައިންތަކުގެ ތެރޭގައި އެފްކޮމް، ފްލައި ވާޔު، އެމްޖެޓްސް، ގަތަރު ކާގޯ، ނޭޝަނަލް އެެއާލައިންސް، އެއާ މާސްޓާ އަދި އެމްއެންޖީ އެއާލައިންސް ހިމެނެ އެވެ.
ރާއްޖޭގެ ރަސްމީ ވައިގެބަނދަރު ވެލާނާ އިންޓަނޭޝަނަލް އެއާޕޯޓުން މިދިޔަ އަހަރު 8.3 މިލިއަން ފަސިންޖަރުންނަށް ހިދުމަތް ވެސް ދީފައިވެ އެވެ.