"ރާޔާ މާލެ" ގެ ނަމުގައި ސޯޝަލް މީޑިއާގައި ހިންގަމުން އަންނަ ޕޭޖަކުން ސްކޭމްކޮށްގެން ފައިސާ ހޯދަމުންދާތީ އެކަމަށް ސަމާލުވުމަށް ފުލުހުން އެދެފި އެވެ.
"ރާޔާ މާލެ" ނަމުގައި ހިންގާ އެ ޕޭޖުން ބުނަނީ އެ މީހުންނަކީ ދިވެހި ޖުވެލަރީ ބްރޭންޑެއް ކަމަށެވެ. ގާތް މީހުންގެ އެހީތެރިކަމާއި ތަރުހީބާ އެކު އެތައް އަހަރެއް ވަންދެން ހިންގަމުން އައި ވިޔަފާރި އޭނާގެ ފިރިމީހާ ނިޔާވުމާ ގުޅިގެން ހުއްޓާލަން ނިންމާފައިވާ ކަމަށް ބުނެ އެ ޕޭޖުގައި ދޮގު ވާހަކަތައް ލިޔެފައިވެ އެވެ.
ވިޔަފާރި ހުއްޓާލަން ނިންމައި ހުރިހާ ގަހަނާތައް ވިއްކާލުމަށް ހުސްކުރާ ސޭލެއް ކުރިއަށް ގެންދަން ނިންމާފައިވާ ކަމަށް ޕޯސްޓުގައި ބުނެ އެވެ.
ޕޭޖުގައިވާ ގޮތުން 80 ޕަސެންޓާ ހަމައަށް ސޭލުގައި ޑިސްކައުންޓް ލިބޭނެ އެވެ.
އެއީ ރަނގަޅު ވިޔަފާރިއެއް ކަމަށް ދެއްކުމަށް އީމެއިލް އާއި ވަކި ވެބްސައިޓެއް ވެސް އޮތް ކަމަށް ދައްކަ އެވެ.
އެ މައްސަލާގައި ފުލުހުންގެ އެންޓި ސްކޭމް ސެންޓަރުން ކުރި ޕޯސްޓެއްގައި ބުނީ އެ ޕޭޖުން ކާޑު އަދި ޒާތީ މައުލޫމާތު ނަގައި އެކައުންޓުތައް ކޮމްޕްރޮމައިޒްކުރުމަށް މަސައްކަތްކުރާ ކަމަށެވެ.
އެހެންވެ، އެ ޕޭޖުގައިވާ އެއްވެސް މައުލޫމާތެއް ފުރިހަމަ ނުކުރުމަށް ފުލުހުން ވަނީ އިލްތިމާސްކޮށްފަ އެވެ.
ފުލުހުން ބުނި ގޮތުގައި އެ ޕޭޖުން ތަކެތި ވިއްކާ ކަމަށް ބުނެ ސްކޭމްކޮށްގެން ދަނީ ފައިސާ ހޯދަމުންނެވެ. އެ ވެބްސައިޓަކީ ކާޑުގެ މައުލޫމާތުގެ އިތުރުން އިންޓަނެޓް ބޭންކިން ކްރެޑެންޝަލްސް ވަގަށް ނެގުމަށް ހިންގަމުންދާ ސްކޭމެއް ކަމަށާއި ޕޭމަންޓު ހަދައި ވަގުތު ބޭންކުގެ ފޭކް ލޮގިން ޕޭޖެއް ދައްކައި އެމީހުންގެ ޔޫސާ ނޭމާއި ޕާސްވޯޑު ހޯދަމުންދާ ކަމަށް ފުލުހުން ބުންޏެެވެ.
އެހެންވެ ފުލުހުން ވަނީ އިންޓަނެޓް ބޭންކިން އަށް ވަނުމަށް އެއްވެސް ވެބްސައިޓަކުން ދީފައިވާ ލިންކަކަށް ނުފިތުމަށާއި އެއްވެސް ލިންކެއްގައި އޯޓީޕީ ނުޖެހުމަށް އިލްތިމާސްކޮށްފަ އެވެ. އަދި އެ ވެބްސައިޓުގައި މައުލޫމާތު ޖެހިފައިވާ ނަމަ، ބޭންކަށް ގުޅައިގެން އެކައުންޓާއި ކާޑު ބްލޮކް ކުރުމަށް ވެސް އިލްތިމާސްކޮށްފައިވެ އެވެ.
އޮންލައިން ޕޭޖުތަކުން ސްކޭމްކޮށްގެން ފައިސާ ހޯދަމުން ދާއިރު "ދީނުގެ މަގުގައި" ގެ ނަމުގައި ސޯޝަލް މީޑިއާގައި ހިންގާ ޕޭޖަކުން ވެސް ސްކޭމްކޮށްގެން ފައިސާ ހޯދާ މައްސަލަތަކެއް ފުލުހުން އާންމުންގެ ސަމާލުކަމަށް ގެނެސްފައިވެ އެވެ. އެއީ ބަލި މީހުންނަށް އެހީ ހޯދުމުގެ ނަމުގައި ސްކޭމްކުރާ ޕޭޖެކެވެ.