ކުރިއަށް އޮތް ލޯކަލް ކައުންސިލްތަކުގެ އިންތިހާބަށް އަމިއްލަ ގޮތުން ވާދަކުރާ ކެންޑިޑޭޓުންގެ ތާއީދު ފޯމު ފުރުމަށް ހަމައެކަނި އީފާސް ބޭނުންކުރަން އިލެކްޝަންސް ކޮމިޝަން (އީސީ) އިން ނިންމާފައިވާ މައްސަލާގައި ކުރީގެ ރައީސް އަބްދުالله ޔާމީނާއި ކުރީގެ ހޯމް މިނިސްޓަރު އުމަރު ނަސީރު ކަންބޮޑުވުން ފާޅުކުރައްވައިފި އެވެ.
އިލެކްޝަންސް ކޮމިޝަންގެ އޮންލައިން ޕޯޓަލް މެދުވެރިކޮށް އިންތިހާބަށް ކުރިމަތިލުމަށް ހުޅުވާލީ މި މަހުގެ 17 ވަނަ ދުވަހު އެވެ.
އަންނަ އާދީއްތަ ދުވަހުގެ ދަންވަރު 12 ޖެހުމުގެ ނިޔަލަށް އެ ފުރުސަތު ހުޅުވާލާފައިވާއިރު، އެ އިންތިހާބަށް ކުރިމަތިލާން އެދޭ މީހުން ފޯމު ހުށަހަޅަން ޖެހެނީ އީސީގެ މައި ޕޯޓަލަށް އީފާސް މެދުވެރިކޮށް ލޮގިން ވެގެންނެވެ.
އަދި އަމިއްލަ ގޮތުން އިންތިހާބަށް ކުރިމަތިލާ ކެންޑިޑޭޓުން މަދުވެގެން 50 މީހުންގެ ތާއީދު ހޯދަން ޖެހޭއިރު، ތާއީދު އޮތްކަން ހާމަކުރުމަށް ވެސް އީފާސް އިން އެ ޕޯޓަލްއަށް ވަންނަން ޖެހެ އެވެ.
ޔާމީންގެ ޕީއެންއެފްގެ ޖަލްސާގައި ވާހަކަފުޅު ދައްކަވަމުން ޔާމީން ރޭ ވިދާޅުވީ ޝަރުއީ ކޯޓުތަކުގައި ވެސް ހެއްކެއް ބަލައިގަންނަނީ އޭގެ އަސްލު ކިތާބީ ނުވަތަ ޝަފަހީ ހެކި އޮންނަ ނަމަ ކަމަށެވެ. އެހެންކަމުން، ކަރުދާހުން ކުރާ މުއާމަލާތް އެއްކޮށް ހުއްޓާލުމުގެ ބާރު އީސީ އަށް ލިބިގެން ނުވާ ކަމަށް އެ މަނިކުފާނު ވިދާޅުވި އެވެ.
ޔާމީން ވިދާޅުވި ގޮތުގައި، އެ މައްސަލާގައި އީސީ ގޮވައިގެން ޕީއެންއެފުގެ ފަރާތުން މިހާރު ވަނީ ކޯޓަށް މައްސަލަ ވެސް ހުށަހަޅައިފަ އެވެ. އެ މަނިކުފާނު ވިދާޅުވީ، އެ މައްސަލަ އެބޭފުޅުންގެ ކޮޅަށް ކާމިޔާބު ވެސް ވާނެ ކަމަށެވެ.
އެ އުސޫލާ ގުޅޭ ގޮތުން ކަންބޮޑުވުން ފާޅުކުރައްވައި އުމަރު، އީސީގެ ރައީސް މުހައްމަދު ޒާހިދަށް ފޮނުއްވި ސިޓީއެއްގައި ވިދާޅުވީ އެ ގޮތަށް އޮތް އޮތުމަކީ އަމިއްލަ ގޮތުން ވާދަކުރާ ކެންޑިޑޭޓުންގެ އިންތިހާބީ ހައްގަށް އުނިކަން ލިބޭ ކަމެއް ކަމަށެވެ.
ރާއްޖޭގައި އީފަސް ބޭނުން ކުރަނީ އާބާދީގެ ވަރަށް މަދު ޕަސެންޓެއްގެ މީހުންކަން ފާހަގަ ކުރައްވަމުން އުމަރު ވިދާޅުވީ އީފާސް ބޭނުން ނުކުރާ މީހުންގެ ހައްގަށް އުނިކަން ލިބޭ ކަމަށެވެ.
އަންނަ އޭޕްރިލް މަހުގެ ހަތަރު ވަނަ ދުވަހު ބާއްވާ ކައުންސިލް އިންތިހާބުގައި ކައުންސިލްތަކުގެ ޖުމްލަ 225 ދާއިރާއަކަށް މެމްބަރުން އިންތިހާބު ކުރަންޖެހެ އެވެ.