އެމެރިކާގެ މިނިއާޕޮލިސްގެ ޓައުން ހޯލެއްގައި އެމެރިކާގެ ކޮންގްރެސް މެންބަރު އިލްހާން އުމަރު ވާހަކަ ދައްކަވަން ހުންނަވަނިކޮށް މީހަކު ގޮސް އޭނާގެ ގަޔަށް، ގޮތް ނޭނގޭ ސްޕްރޭއެއް ޖަހައިފި އެވެ.
މި ހާދިސާ ހިނގާފައި މި ވަނީ ގާނޫނާ ހިލާފަށް އެމެރިކާގައި އުޅޭ ބިދޭސީންގެ މައްސަލަ ހައްލުކުރުމުގެ ނަމުގައި ފެޑެރަލް އިމިގްރޭޝަން އެންފޯސްމަންޓުން ހަރުކަށިކަމާ އެކު ހިންގަމުން ގެންދާ ހަރަކާތްތަކުގައި މި މަހު ދެ މީހަކު މަރާލުމުން މައްސަލަ ވަރަށް ބޮޑަށް ހޫނުވެފައި ވަނިކޮށެވެ.
އެމެރިކާއަށް 1990 ގެ ތެރޭގައި ހިޖުރަކުރި، ސޯމާލިއާއަށް އުފަން އިލްހާނަށް ހަމަލާދޭން މަސައްކަތްކޮށްފައި މި ވަނީ ބިދޭސީންނާ މެދު ރައީސް ޑޮނަލްޑް ޓްރަމްޕު ގެންގުޅުއްވާ ސިޔާސަތަށް އިލްހާން ފާޑު ވިދާޅުވާތީ ޓްރަމްޕުގެ ބަހުގެ ހަމަލާތައް ވެސް އިލްހާނަށް އަމާޒުވެފައި ވަނިކޮށެވެ.
ކަޅު ކޯޓެއްގައި ލައިގެން ހުރި މީހާ ދުވެފައި ގޮސް އިލްހާންގެ ގަޔަށް ސިރިންޖަރުން ސްޕްރޭކުރުމާ އެކު ސެކިއުރިޓީން އެ މީހާ ހިފަހައްޓައި ބިންމައްޗަށް ވައްޓާލުމަށްފަހު އަތުގައި ކްލިޕް އެޅުވި އެވެ. އެ މީހާ ހިފެހެއްޓުމާ އެކު، އެ ބައްދަލުވުމުގައި ތިބި މީހުން ތަރުހީބުދީ އަތްޖަހަން ފެށި އެވެ.
މި ހާދިސާއަށް ފަހު ވެސް އިލްހާން ވަނީ އޭނާގެ ވާހަކަ ކުރިއަށް ގެންގޮސްފަ އެވެ.
މި ބައްދަލުވުމުގައި، ޑިމޮކްރެޓް ޕާޓީގެ މެންބަރު އިލްހާން ވަނީ އެމެރިކާގެ އިމިގްރޭޝަން އެންޑް ކަސްޓަމްސް އެންފޯސްމަންޓް (އައިސް) އުވާލައި، ހޯމްލޭންޑް ސެކިއުރިޓީ ސެކްރެޓަރީ ކްރިސްޓީ ނޯމް އިސްތިއުފާ ދެއްވުމަށް ގޮވާލައްވައިފަ އެވެ.
"އައިސް އިސްލާހެއް ނުކުރެވޭނެ،" އޭނާ ވިދާޅުވި އެވެ.
ކޮންގްރެސްގައި ހަަތަރު ވަނަ ދައުރު އަދާކުރައްވަމުން ގެންދަވާ އިލްހާނަށް ޓްރަމްޕު މީގެ ކުރިން ވަނީ އިހުތިރާމު ކުޑަކޮށް، އާންމު. ފޯރަމްތަކުގައި ބަހުގެ ހަމަލާތައް ދެއްވައިފަ އެވެ.
މި ހާދިސާގެ ކުރިން ވެސް ޓްރަމްޕު ވަނީ އަޔޯވާގައި ބޭއްވި އެއްވުމެއްގައި އިލްހާނަށް ފާޑު ވިދާޅުވެފަ އެވެ. އަދި އެމެރިކާގައި އުޅެވޭނީ އެމެރިކާ ދެކެ ލޯބިވާކަން ސާބިތުކޮށްދޭ މީހުންނަށް ކަމަށް ޓްރަމްޕު ވިދާޅުވި އެވެ.
"އެއީ ގައުމަށްޓަކައި ފަހުރުވެރިވާ ބަޔަކަށް ވާންޖެހޭނެ. އެއީ އިލްހާން އުމަރު ކަމަށް ބަޔަކަށް ވެގެން ނުވާނެ،" ޓްރަމްޕު ވިދާޅުވި އެވެ.
"އޭނާ އައިސް އެ ހުރީ ކާރިސާއެއް ކަހަލަ ގައުމަކުން. އެ ކަންކަމަށް ބަލާއިރު އަޅުގަނޑަށް ހީވަނީ އެއީ ގައުމެއް ވެސް ނޫންހެން."
މި ހާދިސާ ހިނގާފައި މި ވަނީ އެމެރިކާގެ ފްލޮރިޑާގެ ޑިމޮކްރެޓިކް ކެންޑިޑޭޓެއް ކަމަށްވާ މެކްސްވެލް ފްރޮސްޓްގެ މޫނުގައި މީހަކު ޖަހައި ޓްރަމްޕް އޭނާ ޑީޕޯޓް ކޮށްލާނެ ކަމަށް ބުނެ އިންޒާރު ދިން މީހަކު ހައްޔަރު ކުރިތާ ދުވަސްކޮޅެއް ފަހުންނެވެ.