ހދ. ހަނިމާދޫ އެގްރިކަލްޗާ ސެންޓަރު (އެޗްއޭސީ) އަޕްގްރޭޑް ކުރުމުގެ މަސައްކަތް "ޑިޒައިން އެންޑް ބިލްޑް" އުސޫލުން ކުރާނެ ބަޔަކު ހޯދަން ފިނޭންސް މިނިސްޓްރީން އިއުލާންކޮށްފި އެވެ.
އެ މިނިސްޓްރީން އިއްޔެ ކުރި އިއުލާނެއްގައިވާ ގޮތުން އެޗްއޭސީ އަޕްގްރޭޑްކުރުމުގެ މަސައްކަތަށް ބިޑް ހުށަހަޅަން ޝައުގުވެރިވާ ކުންފުނިތަކުން ރަޖިސްޓްރީކުރުމުގެ ފުރުސަތު އޮންނާނީ މިއަދުން ފެށިގެން މާޗް 23އާ ހަަމަައަށެވެ.
ޕްރީބިޑް މީޓިން ބާއްވާނީ ފެބްރުއަރީ 10 ގައި ކަމަށާއި ބިޑްހުށަހަޅަން ރަޖިސްޓްރީ ކުރަން 1،500ރ. ނުވަތަ 100 ޑޮލަރުގެ ފީއެއް ދައްކަން ޖެހޭނެ ކަމަށް ވެސް އެ އިއުލާނުގައި ވެ އެވެ.
އެޗްއޭސީއަކީ ދަނޑުވެރިކަމުގެ ދިރާސާތައް ކުރުމާއި ތަމްރީނުދިނުމާއި ރާއްޖެއާ ގުޅޭ ގަސްކާނާ އާއި ޕެސްޓިސައިޑް ދެނެގަތުން ފަދަ މަަސައްކަތްތަކާއި ރާއްޖެއަށް ބޭނުންވާ ބައެއް ބާވަތްތައް މުޑުވައްކޮށް، ކުދި ގަސް ފޯރުކޮށްދިނުމުގެ މަސައްކަތް ވެސް ކުރާ މަރުކަޒެކެވެ.
ދަނޑުވެރިންނަށް ބޭނުންވާ ފަންނީ ލަފާ ދިނުމަކީ ވެސް އެ މަރުކަޒުން ކުރަން ޖެހޭ ކަމެކެވެ.
އެ މަސައްކަތަށް ކުރިމަތިލާ ކުންފުނިތަކުގައި ހުންނަން ޖެހޭ އެއް ޝަރުތަކީ އަހަރަކު 2.5 މިލިއަން ޑޮލަރުގެ ޓާންއޯވާއެއް އަންނަ ވަރަށް ކޮންސްޓްރަކްޝަން މަސައްކަތްތައް ކުރާ ކުންފުންޏަކަށް ވުމެވެ. އަމިއްލަ އަށް ނުވަތަ ޖޮއިންޓް ވެންޗާއެއްގެ ތެރެއިން ނުވަތަ ސަބްކޮންޓްރެކްޓަރެއްގެ ގޮތުގައި އެފަދަ މަދުވެގެން ދެ ޕްރޮޖެކްޓެއް ރަނގަޅަށް ނިންމާފައިވާ ކުންފުންޏަކަށް ވުމަކީ ވެސް ޝަރުތެކެވެ.
ފިނޭންސް މިނިސްޓްރީގެ އިއުލާނުގައިވާ ގޮތުން އެ ޕްރޮޖެކްޓަށް، އޭޝިއަން ޑިވެލޮޕްމެންޓް ބޭންކް (އޭޑީބީ)ން ވަނީ ފައިނޭންސިން ހަމަޖައްސައިދީފަ އެވެ. އެ މަސައްކަތަށް އޭޑީބީން ފަައިސާ ހަމަޖައްސައިދިނީ އެެއީ މޫސުަމަށް އަންނަ ބަދަލުތަކުގެ ގެއްލުން ކުޑަކުރުމަށާއި ކާބޯތަކެތީގެ ކަށަވަރުކަމަށް ހިންގާ މަޝްރޫއެއްގެ ގޮތުގަ އެވެ.
އެ އިއުލާނުގައިވާ ގޮތުން އެ ޕްރޮޖެކްޓް ކުރިއަށް ގެންދާނީ އެންވަޔަރަމެންޓް މިނިސްޓްރީން ހިންގާ ޕްރޮޖެކްޓެއްގެ ގޮތުގަ އެވެ.
އެހެން ނަމަވެސް އެންވަޔަރަމެންޓް މިނިސްޓްރީގެ މީޑިއާ އޮފިޝަލް ވިދާޅުވީ އެއީ އެ މިނިސްޓްރީ އާއި އެގްރިކަލްޗާ މިނިސްޓްރީ ގުޅިގެން ހިންގަ ޕްރޮޖެކްޓެއް ކަމަށެވެ.