ހުޅުމާލެ 2 ގައި އެސްޖޭ ކުންފުނިން އިމާރާތް ކުރަމުން އަންނަ މިސްކިތުގެ މަސައްކަތް ނުނިމި ދިގުލައިގެން ދަނީ އެތަނުގެ ކުރެހުންތަކަކަށް އިސްލާމިކް މިނިސްޓްރީން "އެޕްރޫވަލް ނުލިބިގެން" ކަމަށާއި އެ ތަން އިމާރާތް ކުރުމަށްވި އެއްބަސްވުމުގެ މުއްދަތު ވެސް އޮތީ ހަމަވެފައި ކަމަށް އެސްޖޭ ކުންފުނިން ބުނެފި އެވެ.
އެސްޖޭ އިން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދަށް މިދިޔަ އަންގާރަ ދުވަހު ފޮނުވި ސިޓީއެއްގައި އެހެން ބުނީ، އެ ކުންފުންޏާ ހަވާލު ކޮށްގެން ހުޅުމާލެ 2 ގައި އިމާރާތްކުރަމުން އަންނަ މިސްކިތުގެ މަސައްކަތް ނިންމުން ލަސްވާ ސަބަބު ބަޔާންކޮށްފައިވާ ސިޓީއެއްގަ އެވެ.
އެސްޖޭގެ ޑިރެކްޓަރު ޝިހާދު އިބްރާހިމް ސޮއިކުރައްވައި އެ ސިޓީ ފޮނުވަން ޖެހުނު ސަބަބެއް ކަަމަށް އޭގައ ބުނެފައި ވަނީ އޭނާ އަށް މިނިސްޓަރު ޝަހީމް ފޮނުއްވި މެސެޖެއްގެ މައްސަލައިގަ އެވެ.
ސިޓީގައި ތުހުމަތު ކޮށްފައިވާ ގޮތުގައި ވަޓްސްއެޕުން ފޮނުއްވި އެ މެސެޖުގައި ވަނީ "30 މިލިއަން ރުފިޔާ ކާލައިގެން އަމިއްލަ ވިޔަފާރި ތިކުރަނީ" ކަމަށް ޝަހީމް ވިދާޅުވެފަ އެވެ. އަދި އެސްޖޭއިން ރިސޯޓެއް ތަރައްގީކުރާ ވާހަކަ ނޫހެއްގައި ލިޔެފައި އޮތުމުން އޭގެ ސްކްރީންޝޮޓެއް ފޮނުއްވައި "މިސްކިތް ނުނިންމާ ކުރާ ކަންތައް މިއީ" ކަމަށް ވިދާޅުވެފައިވާ ކަމަށް ވެސް ސިޓީގައިވެ އެވެ.
އެކަމަކު މި މެސެޖުތަކުގެ ސައްހަކަން "މިހާރު" އަށް ކަށަވަރެއް ނުވެ އެވެ.
އެސްޖޭގެ ސިޓީގައި ބުނީ މިސްކިތް އިމާރާތްކުރުމުގެ އެއްބަސްވުން ލިޔެ ތައްޔާރުކުރާނެ ފަންނީ މުވައްޒަފެއް މިނިސްޓްރީގައި ނެތުމުން އެ މިނިސްޓްރީން އެދުނީ ކުންފުނިން އެކަން ކޮށްދިނުމަށް ކަމަށާއި އެހެންވެ، އެ މަސައްކަތް ވެސް ކުރީ ކުންފުނިން ކަމަށެވެ. އަދި މިނިސްޓްރީން ބޭނުންވީ ޝިހާދު ތައްޔާރުކުރި އެއްބަސްވުން އެ އޮތްގޮތަށް ސޮއިކުރަން ކަމަށާއި އެކަމަކު އެޓާނީ ޖެނެރަލްގެ ލަފާ ލިބިގެން ނޫން ގޮތަކަށް އެ އެއްބަސްވުމުގައި ސޮއިކުރަން ކުންފުނިން އިންކާރުކުރި ކަމަށް ޝިހާދު ވިދާޅުވި އެވެ.
ފަހުން އެކަމުގެ އެއްބަސްވުން ހެދީ އެޓާނީ ޖެނެރަލް ބޭނުންވި މާއްދާއެއް ވެސް އެއްބަސްވުމަށް އިތުރު ކޮށްފައި ކަމަށް ޝިހާދު ވިދާޅުވެފައިވެ އެވެ.
ސިޓީގައި ޝިހާދު ވިދާޅުވީ އެއްބަސްވުމުގެ ބައެއްގެ ގޮތުގައި މިނިސްޓްރީން ތައްޔާރުކޮށްފައިވާ ސްޓްރަކްޗަރަލް އަދި އާކިޓެކްޗަރަލް ކުރެހުންތަކެއް ވެސް ހިމަނާފައިވާ ކަމަށެވެ. ކުރެހުމުން މަދުވާ ބައިތައް ފޯރުކޮށްދިނުމާއި އައިބުތައް ފިލުވުމާއި ގެންނަން ޖެހޭ ބަދަލުތައް ގެނައުމަކީ މިނިސްޓްރީގެ ޒިންމާއެއް ކަމަށް ވެސް ވިދާޅުވެފައިވެ އެވެ.
އެ މިސްކިތަކީ، ޝިހާދު ވިދާޅުވެފައިވާ ގޮތުގައި، ރާއްޖޭގައި އާންމުކޮށް ބިނާކުރާ މިސްކިތްތަކާ ތަފާތުކޮށް ގޯތީގެ އެއްބައިގައި، އިމާ ޖައްސައިގެން، މިސްކިތާ ގުޅިގެންދާ ގޮތަށް ކޮންކްރިޓް އާޗްތަކަކުން ހަދާފައިވާ ކޯޓްޔާޑެއް ހިމެނޭ ގޮތަށް ޑިޒައިންކުރާ ތަނެކެވެ.
"އަޅުވެރިން ވުޟޫކުރާ ތަންތަނާއި ފާހާނާތައް ހުންނަނީ މިދެންނެވި ކޯޓިޔާޑްގަ އެވެ. އެހެންކަމުން ގިބްލަ ކުޑަތަންކޮޅެއް ޖެހިލިޔަސް އޭގެ އަސަރު ކޯޓިޔާޑަށް އަންނާނެއެވެ،"
ޝިހާދު ވިދާޅުވީ މިސްކިތުގެ ކުރެހުމުގައިވާ ގިބްލަ މިސްރާބާއި އޮން ސައިޓުގައި މިނިސްޓްރީން ޖަހާދިން ގިބްލަ ދިމާނުވުމުގެ ސަބަބުން އައި ބަދަލުތަކާ ހުރެ އާޗްތަކުން ދެ މީޓަރު އުނިވެގެން ދިޔަ ކަމަށެެވެ. އެހެންވެ، އެ ބަދަލާ އެއްގޮތަށް ހުރިހާ އާޗްތައް ދިމާވާ ގޮތަށް ކުރެހުން އިސްލާހު ކުރަންޖެހޭ ކަމަށާއި އެކަމާ ގުޅިގެން ކޯޓިޔާޑާއި އާޗްތަކުގެ މަސައްކަތް މަޑުޖައްސާލަން މިނިސްޓްރީން އެންގި ކަމަށް އޭނާ ވިދާޅުވެފައިވެ އެވެ.
ޝިހާދު ވިދާޅުވި ގޮތުގައި އޭގެ ފަހުން ތިން އަހަރު ފާއިތުވެ ދިޔައިރު ވެސް އެ ކުރެހުންތައް މިނިސްޓްރީން ފޯރުކޮށްދީފައެއް ނުވެ އެވެ.
އެ ކުރެހުމުގައިވާ ގުއްބުގެ ސްޗްރަކްޗަރަލް ޑްރޯވިން މަދުވާތީ ގުއްބުގެ ފުރިހަމަ ކުރެހުން ފޯރުކޮށްދިނުމަށް 2023 ވަނަ އަހަރު މިނިސްޓްރީގައި އެދިފައިވާނެކަމަށާއި އެކަމަކު އެ ކުރެހުން ވެސް ފޯރުކޮށްދީފައި ނުވާ ކަމަށް އޭނާ ވިދާޅުވި އެވެ.
"އެނގިލައްވާނެ ފަދައިން މިސްކިތުގެ ގުއްބަކީ 80 ފޫޓް 40 ފޫޓް، ކުކުޅުބިސް ބުރު ޑިޒައިނަށް އިންނަ ގުއްބެކެވެ. ސްޗްރަކްޗަރަލް ޑްރޯވިން ނެތި ގުއްބު ބަނުމަކީ ކުރެވޭނެ ކަމެއް ނޫނެވެ،"
ޝިހާދު ވިދާޅުވީ މިދިޔަ އަހަރުގެ ސެޕްޓެމްބަރު މަހުގެ ދެ ވަނަ ދުވަހު މިނިސްޓަރު ވަނީ ސައިޓަށް ވަޑައިގެން ގުއްބުގެ ސައިޒު އާދަޔާ ހިލާފަށް ބޮޑުވުމުން މެއިންޓެނަންސް ކުރުމަށް ދަތިވާނެތީ ގުއްބު އަލުން ރީޑިޒައިން ކޮށްދިނުމަށް އެދިވަޑައިގެންފަ އެވެ. އެހެންވެ އެގޮތަށް ރީޑިޒައިންކޮށް އަލުން މިނިސްޓްރީއަށް ހުށަހަޅާފައިވާނެ ކަމަށް ސިޓީގައިވެ އެވެ.
"އަދާ ހަމައަށްވެސް މިނިސްޓަރު ސައިޓަށް ވަޑައިގެން ދެއްވި އިރުޝާދު ލިޔުމުން މި ކުންފުންޏަށް ލިބިފައިނުވެ އެެވެ. އަދި ޑްރޯވިން އެޕްރޫވަލް ލިބިފައިވެސްނުވެ އެވެ." މިސްކިތުގެ މަސައްކަތް ލަސްވާ ސަބަބު ބަޔާންކޮށް ފޮނުވި ސިޓީގައިވެ އެވެ.
ޝިހާދު ވިދާޅުވީ އެ މަސައްކަތަކީ ދައުލަތުގެ މަސައްކަތެއް ކަމަށާއި އެއްބަސްވުމަށް ގެނައި ބަދަލުތަކާއި ގެނައި އިސްލާހުތަކާއި މިނިސްޓަރު ދެއްވާ އިރުޝާދަކީ ލިޔުމުން ދޭންޖެހޭ އެއްޗެހި ކަމަށެވެ. އެކަމަކު މިނިސްޓަރު ޝަހީމް ވަޒީރުކަމާ ހަވާލުވެވަޑައިގަތް ފަހުން އެއްބަސްވުމަށް ގެނެވުނު އެއްވެސް އިސްލާހެއްގައި ސޮއިކޮށްފައިނުވާ ކަމަށް ތުހުމަތުކުރައްވާފައިވެ އެވެ.
ޝިހާދު ވިދާޅުވި ގޮތުގައި ރިސްކެއް ނަގައި އެ ކުންފުނިން ވަނީ ގުއްބު ފެބްރިކޭޓްކުރުމަށް މެލޭޝިއާގެ ކުންފުންޏަކާ ހަވާލުކޮށްފަ އެވެ. ސިލޯނު ބޭންކް މެދުވެރިކޮށް ފައިސާ ވެސް ދައްކާފައިވާ ކަމަށާއި އަންނަ މަހުގެ ފުރަތަމަ ހަފްތާގައި މެލޭޝިއާ އިން އެ ގުއްބު ފުރުވާލާނެ ކަމަށް ވެސް ވިދާޅުވި އެވެ.
އަނެއް ކަމެއްގެ ގޮތުގައި ޝިހާދު ވިދާޅުވީ މިސްކިތުގެ ދޮރުތަކުގެ ކުރެހުމުގައި މައްސަލަތަކެއް ހުރެގެން އެކަން ފާހަގަކޮށް މިނިސްޓްރީއަށް ލިޔުނު ނަމަވެސް އެ މަސައްކަތް ކުރާނެ ގޮތުގެ އިރުޝާދެއް ވެސް މިނިސްޓްރީން ނުދިނުމެވެ.
ސިޓިގައި ފާހަގަކުރި އިތުރު ކަންކަން:
- މިނިސްޓްރީގައި ފަންނީ މަސައްކަތް ކުރެވޭނެ ފެންވަރުގެ މުވައްޒަފުން ނެތް ނަމަ ހިލޭ ސާބަހަށް އެކަން ކޮށްދޭން ތައްޔާރަށް އޮތް ކަމަށް.
- އެ މިސްކިތަކީ ދައުލަތުން ދާރުލް ޒިކްރާ އިމާރާތް [މާލޭގެ ޒިކުރާ މިސްކިތް] އަޅަން ހެދި އެއްބަސްވުމުގެ ދަށުން ދޫކޮށްފައިވާ އިކްއިޓީ ފައިސާ އާއި ކުންފުނީގެ ސީއެސްއާރު ފަންޑުން ހަރަދުކޮށްގެން ހިންގާ ޕްރޮޖެކްޓެއް. ޕްރޮޖެކްޓްގެ ހަމަ އަގަކީ 70 މިލިޔަން ރުފިޔާ.
- 2024 ވަނަ އަހަރު އެސްޖޭގެ އޮޑިޓް ރިޕޯޓުގައިވާގޮތުން ދާރުލް ޒިކްރާ އިމާރާތް ކުރުމަށް ވެވުނު އެއްބަސްވުމުގެ ދަށުން ދޫކޮށްފައިވާ އިކްއިޓީ ފައިސާއަށްވުރެ ބޮޑު ހަރަދެއް އެތަނަށް ހިނގާފައިވޭ.
- "30 މިލިއަން ރުފިޔާ ކާލައިގެން ކުރީ އަމިއްލަ ވިޔަފާރި" ކަމަށް މިނިސްޓަރު ވިދާޅުވާ ނަމަ، އެކަން ސާބިތުކޮށްދިނުމަށް އެދިފައިވޭ.
- މިނިސްޓްރީގެ މުސްތަގިއްލު ވެލުވޭޓާއަކާ ހަވާލުކޮށްގެން މިސްކިތަށް މިހާތަނަށް ހިނގި ހަރަދު ބެލުމަށް އެދިފައިވޭ. އަދި އެފަރާތަށް ދައްކަންޖެހޭ ފީ ދައްކާނެ ކަމަށް ބުނެފައިވޭ.
- މިސްކިތް ނިންމާނެ ކަމަށް މިނިސްޓަރު ތާރީހުތަކެއް ދެއްވަމުން ދާއިރު އެއްބަސްވުމާ އެއްގޮތަށް ކުންފުނިން ހުށަހެޅި އެއްވެސް އީއޯޓީއެއް އެޕްރޫވްކޮށްފައި ނުވާ މައްސަލަ.
- ސަރުކާރުން ހިންގާ ތަރައްގީގެ މަޝްރޫއުތަކަށް ރައީސް އޮފީހުން ދިން ހަ މަސް ދުވަހުގެ މުއްދަތު އެ ޕްރޮޖެކްޓަށް ލިބިފައެއް ނުވޭ. އެހެންވެ، އެ ކުންފުނިން ނޮވެމްބަރު 15، 2023 ގައި ސިޓީ ފޮނުވިޔަސް އެ ސިޓީގެ ޖަވާބު ލިބުނީ މެއި 20، 2025 ގައި.
- އެ ސިޓީގެ ޖަވާބު ފޮނުވިއިރު އެއްބަސްވުމުގެ މުއްދަތު އޮތީ ޖުލައި 18، 2024 ގައި ހަމަވެފައި.
- އީއޯޓީތަކުގެ ރިކޯޑް މިނިސްޓްރީން ނުބަލަހައްޓާ މައްސަލަ ފެންމަތިކޮށްފައިވޭ.
- އެއްބަސްވުން އާ ނުކޮށް އޮންނަތާ 341 ދުވަސް ފާއިތުވެގެން ދިޔައިރު ވެސް މިނިސްޓްރީން ހަބަރެއް ނުވެގެން ޖޫން 24، 2025 ގައި ބައްދަލުވުމެއް ބާއްވައިދޭން އެދުނު.
- އެ ބައްދަލުވުމުގައި އެއްބަސްވުން ބާތިލުވެއްޖެ ކަމާއި މަސައްކަތް ނިންމުމަށް މަދުވާ ކުރެހުންތައް ހިމަނައިގެން އެއްބަސްވުން އާކުރުމަށް އެސްޖޭ އިން އެދުނު. އަދި އެއްބަސްވުން ހަފްތާއެއްގެ ތެރޭގައި އާކުރާނެ ކަމުގެ ޔަގީންކަން މިނިސްޓްރީން ދިން ކަމަށް އެސްޖޭ އިން ބުނޭ.
- މިއަދާ ހަމައަށް މަދުވާ ކުރެހުމެއް އަދި އެއްބަސްވުން ވެސް އާކޮށްފައެއް ނުވޭ.
- ބައްދަލުވުމުގެ ޔައުމިއްޔާ ހޯދުމަށް އެދުމުން ބުނެފައި ވަނީ ޔައުމިއްޔާ ނެތް ކަމަށް. އެކަމަކީ އެއްބަސްވުމާއި ދައުލަތުގެ މާލިއްޔަތާ ވެސް ހިލާފު ކަމެއް ކަމަށް ބުނެފައިވޭ.
- ދައުލަތުން ހިންގާ ޕްރޮޖެކްޓެއްގެ ރެކޯޑް ނުބެލެހެއްޓުމަކީ ވަރަށް ޣައިރު ޒިންމާދާރު އަދި އައިރު ގާނޫނީ ކަމެއް ކަމަށް ބުނެފައިވޭ.
- ޖޫން 30، 2025 ގައި ވަނީ އެއްބަސްވުމުގެ މުއްދަތު މިއަހަރުގެ ފެބްރުއަރީއަށް އިތުރުކޮށް ދިނުމަށާއި އިތުރު ޑޮކިއުމަންޓެއް ބޭނުންނަމަ އަންގައިދޭން އެދިފައި. އެކަމަކު ދެތިން ފަހަރަށް ރިމައިންޑާ މެއިލްކޮށްގެން ވެސް ނުލިބިގެން އެކަން މިނިސްޓަރު ސައިޓު ބެލުމަށް ވަޑައިގެންނެވި ދުވަހެއްގައި ހިއްސާކުރި. އެއީ ސެޕްޓެމްބަރު 2 ގައި.
- ޖޫން 24، 2025 ގައި ބޭއްވި ބައްވުމަށްފަހު އެއްބަސްވުން އާކުރުމަށް ދެ ފަރާތުން އެއްބަސްވެފައި، ބައްދަލުވުމުގައި ވައުދުވި ފަދައިން މިނިސްޓްރީން އަމަލުކޮށްފައިނުވާތީ އެކަށީގެންވާ މުއްދަތެއްގައި އެއްބަސްވުން އާ ސަބަބުން އެއްބަސްވުން އެކީގައި ބާތިލުވެފައިވުން.
މިނިސްޓްރީގެ އިހުމާލު ކަމަށް ވިދާޅުވެ އެތައް ކަމެއް ފާހަގަކުރައްވާފައިވާ ސިޓީގައި ޝިހާދު ވިދާޅުވީ އެ ކުންފުންޏަކީ މިހާތަނަށް 11 މިސްކިތާއި އިސްލާމީ މަރުކަޒެއް ބިނާކޮށް ނިންމައި މިނިސްޓްރީ އަށް ލިޔުން ދީފައިވާ ކުންފުންޏެއް ކަމަށެވެ. އަދި ހުޅުމާލޭ 2 ގައި މިސްކިތުގެ މަސައްކަތް ފެށި ފަހުން ހއ. ދިއްދޫގައި 75 ރޯހައުސް އާއި ލ. ގަމުގައި 100 ހައުސިން ޔުނިޓްގެ އެޅުމުގެ މަސައްކަތް ކުރަމުން އަންނަކަން ފާހަގަކުރެއްވި އެވެ. މިއީ މިސްކިތަށް ވުރެ ފަހުން ފެށި ބޮޑެތި ޕްރޮޖެކްޓްތަކަށް ވާއިރު އެ ދެ މަޝްރޫއުގެ ވެސް 95 ޕަސެންޓް މަސައްކަތް ނިންމުމުން ހައުސިން މިނިސްޓްރީން ލިޔުން ދީފައިވާކަން އޭނާ ފާހަގަކުރެއްވި އެވެ.
އެ ކުންފުނިން އަންނަނީ އއ. ރަސްދޫ އާއި ޅ. ކުރެންދޫ އަދި ސ. ފޭދޫގައި ވެސް ހައުސިން މަޝްރޫއު ކުރިއަށް ގެންދަމުން ކަމަށް ވިދާޅުވެ ޝިހާދު ވަނީ އެސްޖޭ ކޮންސްޓްރެކްޝަނަށް މާލެއިން ކޮންސްޓްރެކްޝަން މެޓީރިއަލް ގެންގޮސްގެން ރަށްރަށުގައި ކާމިޔާބުކަމާ އެކު ޕްރޮޖެކްޓްތައް ހިންގޭއިރު ހުޅުމާލޭގައި ޕްރޮޖެކްޓް ނުހިންގެނީ ކީއްވެތޯ ސުވާލު އުފައްދައިފަ އެވެ.
"ޖަވާބަކީ މަސައްކަތް ހަވާލުކުރި ފަރާތް ޣައިރު ޒިންމާދާރުވުމެވެ." އޭނާ ވިދާޅުވި އެވެ.
ޝިހާދު ވިދާޅުވީ މިސްކިތް ބިނާކުރުމަށް ހެދި އެއްބަސްވުން ބާތިލުވެފައި ވިޔަސް އެ ކުންފުނިން މަސައްކަތްކުރަނީ މިސްކިތުގެ ކުރެހުމުން މަދުވާ ކުރެހުންތައް އަމިއްލައަށް ކުރަހައި މިނިސްޓްރީއަށް ހުށަހެޅުމަށް ކަމަށެވެެ. އެކަމަކު މިނިސްޓްރީން އެޕްރޫވަލް ލިބެންދެން މަސައްކަތް މަޑުޖައްސާނުލައި މިހާރު ކުރަމުން އަންނަ ކަމަށާއި މިނިސްޓްރީއަށް ބަރޯސާނުވެ މަސައްކަތްކުރާތީ ސައިޓުން އޭގެ ހެޔޮ ނަތީޖާތަކެއް ވެސް ފެންނަ ކަމަށެެވެ.
މިނިސްޓަރަށް ފޮނުވި އެ ސިޓީގައި ވަނީ އެ ކުންފުނިން "ކާލައިފި" ކަމަށް މިނިސްޓަރު ވިދާޅުވާ ފައިސާ އެ ކުންފުނީގެ ހިއްސާދާރުން ކެއިގޮތެއް ސާފުކޮށް ދިނުމަށާއި އެއްބަސްވުމުގެ ދަށުން މިނިސްޓްރީން އަދާކުރަންޖެހޭ ޒިންމާތައް އަދާކުރެވިފައިވާ މިންވަރު އަންގައިދީ އެ ޕްރޮޖެކްޓާއި ގުޅޭ ޓައިމްލައިނާއި 2025 ވަނަ އަހަރު ޖޫން، އޮކްޓޯބަރު އަދި ޑިސެމްބަރުގައި ބޭއްވި ބައްދަލުވުންތަކުގެ ޔައުމިއްޔާ ލިބޭނެ ގޮތެއް ހަދައިދިނުމަށް ވެސް މިނިސްޓަރުގެ އަރިހުގައި އެދިފަ އެވެ.
ހިޔާ ފްލެޓުތައް ކައިރިން ސަލާހުއްދީން ސްކޫލާ އިންވެގެން އޮންނަ ބިމުގައި އެ މިސްކިތް އިމާރާތްކުރަން އިސްލާމިކް މިނިސްޓްރީ އާއި އެސްޖޭ ކޮންސްޓްރަކްޝަން ކުންފުންޏާ ދެމެދު ސޮއިކުރީ ޖެނުއަރީ 2022 ގަ އެވެ. އޭރު އެއްބަސްވެފައި އޮތީ މަސައްކަތް ފަށާތާ 420 ދުވަހުގެ ތެރޭގައި ނުވަތަ އެއް އަހަރާއި ތިން މަހެއްހާ ދުވަހުގެ ތެރޭގައި މަސައްކަތް ނިންމާ ގޮތަށެވެ.
އެސްޖޭ އިން އިމާރާތް ކުރަމުން އަންނަ މިސްކިތުގެ މަސަައްކަތް ވަރަށް ބޮޑަށް ދިގުލައިގެން ދިއުމުގެ ސަބަބުން އާންމުންގެ ނުރުހުން ވެސް ދަނީ އަމާޒުވަމުންނެވެ.
އެ މިސްކިތް އިމާރާތްކުރަން ބޭރުން ގެންނަ މުދަލުން ޑިއުޓީ ނުނަގާތީ އެސްޖޭ އިން އޭގެ ފައިދާ ނަގައި، އެހެން މަސައްކަތްތައް ކުރަމުންދާ ކަމުގެ ތުހުމަތު ކުރާއިރު އެކަން ދޮގުކޮށް އިސްލާމިކް މިނިސްޓަރު ޝަހީމް ކުރިން ވިދާޅުވީ، އެއްވެސް މުދަލަކުން ޑިއުޓީ މާފުކޮށްފައި ނުވާނެ ކަމަށެވެ.
އެސްޖޭ ކުންފުންޏަށް އަމާޒުވާ ތުހުމަތުތައް ދޮގުކުރައްވައި، ޝަހީމް މިދިޔަ އަހަރުގެ ޖެނުއަރީ މަހު ވިދާޅުވެފައި ވަނީ މިސްކިތުގެ މަސައްކަތް ވަރަށް ގިނަ ދުވަސްތަކެއް ވަންދެން ހުއްޓިފައި އޮތުމަށް ފަހު، އަލުން ފެށީ މި ސަރުކާރު އައި ފަހުން ކަމަށެވެ.
ޑިޒައިންގައިވާ ގޮތުން އެއީ 1،400 މީހުންގެ ޖާގައިގެ މިސްކިތެކެވެ. ކޯޓްޔާޑާ އެކު، 3،000 މީހުންގެ ޖާގަ އެ މިސްކިތުން ލިބޭނެ އެވެ.
ހުޅުމާލެ 2 ގައި އެ މިސްކިތް ހަދަނީ އެސްޖޭ ކޮންސްޓްރަކްޝަނާއި އިސްލާމިކް މިނިސްޓްރީއާ ދެމެދު ވެފައިވާ ސެޓްލްމަންޓް އެގްރިމެންޓެއްގެ ދަށުންނެވެ. އެ އެއްބަސްވުން ހެދީ މާލޭގެ ޒިކުރާ މިސްކިތް ހެދުމަށް އެސްޖޭ ކުންފުންޏާ އެކު ހެދި އެއްބަސްވުން ބާތިލް ކުރުމުން، އޭގެ ބަދަލުގެ ގޮތުގައި 141 މިލިއަން ރުފިޔާ ހޯދަން އެ ކުންފުނިން ހުށަހެޅުމުންނެވެ.
މިސްކިތް ނިމޭނެ ކަމަށް ބުނި ދުވަސް ފަހަނައަޅައި ހިނގައްޖެ
މައްސަލަ ބޮޑުވެފައިވާ އެސްޖޭގެ މިސްކިތް މިދިޔަ އަހަރުގެ ޑިސެމްބަރު މަހު ނިމޭނެ ކަމަށް މިނިސްޓަރު ޝަހީމް އެ އަހަރުގެ ކުރީކޮޅު ވިދާޅުވެފައި ވެ އެވެ.
ހިޔާ ފްލެޓުތައް ކައިރިން ސަލާހުއްދީން ސްކޫލާ އިންވެގެން އޮންނަ ބިމުގައި އެ މިސްކިތް އިމާރާތްކުރުން ލަސްވާ މައްސަލާގައި މިދިޔަ އަހަރުގެ ޑިސެމްބަރު މަހު "މިހާރު" އިން ސުވާލު ކުރުމުން ވެސް މިނިސްޓްރީން އެއްވެސް ޖަވާބެއް ނުދިނެވެ.