މަޖީދިއްޔާ ސްކޫލުގެ އާ އިމާރާތް އަޅަން ނިންމާފައި ވަނީ ކުރީގެ ދަރުމަވަންތަ ސްކޫލު ހުރި ބިމާއި ރައްޔިތުންގެ މަޖިލިހުގެ އިދާރާގެ ކުރިމަތީގައި ކުރިން އޮތް ޕާކިން ޒޯނުގެ ބިމާ އެކު ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
މަޖީދިއްޔާ ސްކޫލްގެ އަހަރީ ދުވަހާ ގުޅިގެން 2024 ވަނަ އަހަރު ބޭއްވި ރަސްމިއްޔާތެއްގައި ރައީސް ޑރ. މުހައްމަދު މުއިއްޒު ވަނީ ކުރީގެ ދަރުމަވަންތަ ސްކޫލްގެ ބިން މަޖީދިއްޔާ ސްކޫލުގެ އާ އިމާރާތް އަޅަން ދެއްވާފައިވާކަން އިއުލާން ކުރައްވައިފަ އެވެ.
އެޑިއުކޭޝަން މިނިސްޓަރު އިސްމާއިލް "މިހާރު" އަށް ވިދާޅުވީ މަޖީދިއްޔާގެ އާ އިމާރާތް އަޅާއިރު، ކުރީގެ ދަރުމަވަންތަ ސްކޫލުގެ ބިމާ ޖެހިގެން އޮތް ބިމުގައި އޮތް ޕާކިން ޒޯނުން ބައެއް އަރާ ކަމަށެވެ.
އެހެންވެ، މަޖީދިއްޔާގެ އާ އިމާރާތް އެޅުމުގެ މަސައްކަތް ފެށުމުގެ ތައްޔާރީތައް ވަމުން އަންނާތީ، އެ ޕާކިން ޒޯނު މިހާރު ވަނީ ވަށައިގެން ޓިނު ޖަހައި ބަންދުކޮށްފަ އެވެ. އަދި ދަރުމަވަންތަ ސްކޫލު ހިންގި އިމާރާތް ހުސްކުރުމުގެ މަސައްކަތް މިހާރު އަންނަނީ ކުރަމުންނެވެ.
ރައީސް މުއިއްޒު ވިދާޅުވެފައި ވަނީ ރާއްޖޭގައި އެންމެ ދުވަސްވީ ސްކޫލު، މަޖީދިއްޔާގެ އާ އިމާރާތުގައި 40 ކްލާސް ރޫމް ހުންނާނެ ކަމަށެވެ. އޭގެ ތެރެއިން ބައެއް ކްލާސްރޫމްތަކަކީ ރާއްޖޭގެ ފުރަތަމަ ސްމާޓް ކްލާސް ރޫމްތަކަށް ވާނެ ކަމަށް ވެސް އެ މަނިކުފާނު ވިދާޅުވެފައި ވެ އެވެ.
މަޖީދިއްޔާ ސްކޫލްގެ ފަހުރު ކަމަށްވާ ދާރުލްއުލޫމް ނޭޝަނަލް އެޑިއުކޭޝަނަލް މިއުޒިއަމްއެއްގެ ގޮތުގައި ތަރައްގީ ކުރަން ނިންމާފައިވާ ކަމަށް ވެސް ރައީސް އޭރު ވަނީ އިއުލާން ކުރައްވައިފަ އެވެ.