މީހެއްގެ ސޯޝަލް މީޑިއާ އެކައުންޓުތައް ހެކްކޮށްގެން، އަމިއްލަ ކުންފުންޏެއްގެ ބޭންކު އެކައުންޓުން ގިނަ އަދަދެއްގެ ފައިސާ ނެގި މައްސަލައެއްގައި އިތުރު ބަޔަކު ހައްޔަރުކޮށްފި އެވެ.
ފުލުހުން ބުނީ މީހެއްގެ ސޯޝަލް މީޑިއާ އެކައުންޓުތައް ކޮމްޕްރޮމައިޒްކޮށް، އޭނާގެ ހިއްސާ އޮންނަ ކުންފުނީގެ ބޭންކު އެކައުންޓުން 279،600 އަށްވުރެ ގިނަ ރުފިޔާ ނެގި މައްސަލައިގައި އެންމެ ފަހުން ހައްޔަރުކުރީ ތިން ޒުވާނުން ކަމަށެވެ. އެއީ؛
- ގދ. ގައްދޫ، އަތިރީއައްސޭރި، މުހައްމަދު ނާއިޝް ނަބީލް، 24
- ސ. ހިތަދޫ، ހާލަމް، ހަސަން ވިއާމް، 19
- ސ. ހުޅުދޫ، ނާދީ، މުނާޒު ޖައުފަރު، 24
މިދިޔަ އަންގާރަ ދުވަހުން ފެށިގެން ހިންގި އޮޕަރޭޝަނުގައި ގޭންގު ކްރައިމާއި ގދ. ތިނަދޫ ސިޓީ ޕޮލިސް އަދި އައްޑޫ ސިޓީ ހިތަދޫ ފުލުހުން ބައިވެރިވި އެވެ.
އެ މައްސަލައާ ގުޅިގެން މީގެ ކުރިން ވަނީ 10 މީހަކު ހައްޔަރުކޮށްފަ އެވެ. އެއާއެކު، ފައިސާ ނެގި މައްސަލައިގައި ފުލުހުންގެ ބަންދުގައި މި ވަގުތު ޖުމްލަ 13 މީހުން އެބަތިއްބެވެ.
ކުރިން ހައްޔަރުކުރި މީހުންނަކީ؛
- ހއ. ކެލާ، ޕެނަމާ، މުހައްމަދު ސިމާދު، 38
- ހދ. ވައިކަރަދޫ، ޕެރިމްރޯޒް، އަބްދުﷲ ނާފިޒު، 39
- ކ. ހިންމަފުށި، މެޑޯޒް، މުހައްމަދު އިބްރާހީމް، 49
- ލ. އިސްދޫ، ގުޑްލައިފް، މުހައްމަދު ހަސަން، 59
- ގއ. ކަނޑުހުޅުދޫ، ފޫހިވާގެ، މުހައްމަދު އަލީ، 42
- ގދ. ފިޔޯރީ، ހީނާމާގެ، އަލީ އިމްރާން، 38
- ގދ. ތިނަދޫ ގުލްބަކާގެ، އަބްދުﷲ އިސްރާގު، 19
- ސ. ހިތަދޫ، އުދަ، އަލީ އިރުފާނު އަހުމަދުދީދީ، 26
- ސ. ހިތަދޫ، ނަންރީތިގެ، އަލީ ޝިރާޒު، 38
- މ. މާލޭގެއާގެ، މުހައްމަދު ނުހާދު އަލީ، 30
މުނާޒުގެ ބަންދަށް 15 ދުވަސް، ވިއާމް 10 ދުވަހަށް އަދި ނާއިޝްގެ ބަންދާ މެދު ގޮތެއް ނިންމަން ކޯޓަށް ހާޒިރުކުރުމުން ބަންދަށް ހަތް ދުވަސް ވަނީ ދީފަ އެވެ.
ކުރިން ހައްޔަރުކޮށް، ބަންދަށް ހަތް ދުވަސް ޖެހި މުހައްމަދު އަލީގެ ބަންދާ މެދު ގޮތެއް ނިންމަން ދެ ވަނަ ފަހަރަށް ކޯޓަށް ހާޒިރުކުރުމުން 30 ދުވަހަށް ބަންދުކުރުމަށް ވަނީ އަމުރުކޮށްފަ އެވެ.