ރާއްޖެ އާއި އޮމާނާ ދެމެދު އިގްތިސާދާއި ވިޔަފާރީގެ ރޮނގުން ގުޅުން އިތުރަށް ފުޅާކުރަން މަޝްވަރާކޮށްފި އެވެ.
ފިނޭންސް މިނިސްޓަރު މޫސާ ޒަމީރު މިއަދު ވަނީ އޮމާންގެ ފިނޭންސް މިނިސްޓަރު ސުލްތާން ބިން ސާލިމް ބިން ސާއިދު އަލް ހަބްސީ އާ ބައްދަލުކުރައްވައި، ފުޅާ ދާއިރާއެއްގައި މަޝްވަރާތައް ކުރައްވައިފަ އެވެ.
މިނިސްޓަރު ޒަމީރު އެކްސްގައި ކުރެއްވި ޕޯސްޓެއްގައި ވިދާޅުވީ، ދެ ގައުމުގެ ދެމެދު އިގްތިސާދާއި ވިޔަފާރީގެ ގުޅުން ފުޅާކުރުމަށް މަޝްވަރާކުރެއްވި ދާއިރާތަކުގެ ތެރޭގައި މެރިޓައިމް، ފިޝަރީޒް އަދި ހަކަތަ ހިމެނޭ ކަމަށެވެ.
މީގެ އިތުރުން ވެސް ދެ ގައުމަށް ވެސް މުހިންމު އިތުރު ދާއިރާތަކުން ގުޅުންތައް ބިނާކުރަން އެ ބައްދަލުވުމުގައި އިސްކަމެއް ދީގެން މަޝްވަރާ ކުރެއްވި ކަމަށް ޒަމީރު ވިދާޅުވި އެވެ.
އޮމާންގެ ފިނޭންސް މިނިސްޓަރުު ސުލްތާން ބިން ސާލިމް ބިން ސާއިދު އަލް ހަބްސީއާ އެކު މިނިސްޓަރު ޒަމީރު ބޭއްވި ބައްދަލުވުމުގައި އެސްޓީއޯގެ މެނޭޖިން ޑިރެކްޓަރު ޝިމާދު އިބްރާހިމް ވެސް ބައިވެރިވެވަޑައިގަތެވެ.
އޮމާނާ އެކު، ރާއްޖޭން ހާރިޖީ ގުޅުން ގާއިމުކޮށްފައިވަނީ 1981 ވަނަ އަހަރުގެ ތެރޭގަ އެވެ.
އިސްލާމީ ގައުމުތަކާ އެކު އޮންނަ ގުޅުން ބަދަހިކުރަން ހާއްސަ އިސްކަމެއް ދީގެން މަސައްކަތް ކުރަމުން އަންނަ ކަމަށް ސަރުކާރުން ބުނެފައިވާއިރު، ފޮރިން މިނިސްޓަރު ޑރ. އަބްދުﷲ ހަލީލް ވެސް ވަނީ 2024 ވަނަ އަހަރުގެ ފަހުކޮޅު، އޮމާނަށް ރަސްމީ ދަތުރެއް ކުރައްވައިފަ އެވެ.
އަދި ރައީސް ޑރ. މުހައްމަދު މުއިއްޒު ވަނީ 2024 ވަނަ އަހަރު ބޭއްވި އދ.ގެ އާންމު މަޖިލީހުގެ 79 ވަނަ ބައްދަލުވުމުގެ ހަވާސާގައި ސައުދީގެ ފޮރިން މިނިސްޓަރު ޕްރިންސް ފައިސަލް ބިން ފަރްހާދް އަލް-ސައޫދްއާ ބައްދަލުކުރައްވައިފަ އެވެ.