ގއ. އަތޮޅާއި ގދ. އަތޮޅާއި ފުވައްމުލައް އަދި އައްޑޫ ވައިގެ މަގުން ގުޅާލައި މޯލްޑިިވިއަންގެ ކުދި މަތިންދާބޯޓްތަކުގެ ޝެޑިއުލް ދަތުރުތައް މިއަދު ފަށައިފި އެވެ.
ދެކުނުގެ އަތޮޅުތަކުގެ ދެމެދުގައި ކުރާ ޝެޑިއުލް ދަތުރުތަކަށް ގައުމީ އެއާލައިން މޯލްޑިވިއަން އިން ތައާރަފްކުރީ ރާއްޖޭގައި މިހާރު ވެސް ފުޅާ ދާއިރާއެއްގައި ދޭ ސީޕްލޭން ހިދުމަތުގައި ބޭނުންކުރާ "ޓްވިން އޮޓާ" މަރުކާގެ ކުޑަ މަތިންދާބޯޓެއްގައި ފުރޮޅު ހަރުކޮށް، އެއާޕޯޓްތަކަށް އޮޕަރޭޓްކުރެވޭ ގޮތަށް ބަދަލުކޮށްގެންނެވެ.
އެ ހިދުމަތް ރަސްމީކޮށް ފަށަން މިއަދު އައްޑޫ ގަމުގައި ބޭއްވި ރަސްމިއްޔާތުގައި އައިލެންޑް އޭވިއޭޝަން ސާވިސަސް (އައިއޭއެސް)ގެ މެނޭޖިން ޑިރެކްޓަރު އިބްރާހީމް އިޔާސް ވިދާޅުވީ ގަން އިންޓަނޭޝަނަލް އެއާޕޯޓަކީ ބޭސްއެއްގެ ގޮތުގައި ބަލައިގެން ކުރިއަށް ގެންދާ އެ ދަތުރުތައް ހަފުތާގެ ހުރިހާ ދުވަހެއްގައި ވެސް ކުރާނެ ކަމަށެވެ. އެ ދަތުރުތައް ކުރާނީ އޭނާ ވިދާޅުވި ގޮތުގައި ދަތުުރުކުރާ އެންމެނަށް ބޮޑު ލުޔެއް ލިބޭނެ ގޮތަކަށެވެ.
"މިދަތުރުތަކުގެ އަގުތައް ކަނޑައެޅުމުަގައި ސަރުކާރާ މިކުންފުނިން ގުޅިގެން އެންމެ ބޮޑު އިސްކަމެއް ދީފައި ވާނީ ރައްޔިތުންނަށް ލުއިފަސޭހަވާނެ ހެއު އަގުތަކެއް ކަނޑައެޅުމަށް،" އިޔާސް ވިދާޅުވި އެވެ.
ޓިކެޓް އަގުތައް
- ގަން- ފުވައްމުލައް، އެއްކޮޅު : 500ރ.
- ފުވައްމުލައް- ކާޑެއްދޫ، އެއްކޮޅު: 650ރ.
- ފުވައްމުލައް- ކޫއްޑޫ، އެއްކޮޅު: 650ރ.
- ގަން-ކާޑެއްދޫ، އެއްކޮޅު: 900ރ.
- ގަން-ކޫއްޑޫ، އެއްކޮޅު: 900ރ.
އިޔާސް ވިދާޅުވީ އެ އަގުތަކަކީ ދަތުރުކުރަން އެކަށޭނެ ލުއި އަގުތަކެއް ކަމަށް މޯލްޑިިވިއަނުން ގަބޫލުކުރާ ކަމަށާއި އެއީ މީހުންނަށް ދަތުރުކުރެވޭ ވަރުގެ އަގުތަކެއް ކަމަށް މޯލްޑިވިއަން އިން ގަބޫލުކުރާ ކަމަށެވެ.
"މި ދަތުރުތަކުގެ އެފްރެޖް ދިގުމިނަކީ ގަމާ ފުވައްމުލަކާ ދެމެދު 20 މިނެޓް އަދި ގަމާ ކާޑެއްދޫ ނޫނީ ކޫއްޑޫއާ ދެމެދު ގާތްގަނޑަކަށް 35 މިނެޓް،" އޭނާ ވިދާޅުވި އެވެ.
އިޔާސް ވިދާޅުވި ގޮތުގައި މޯލްޑިވިއަން އިން މިހާރު ވެސް ގަން-މާލެ އަދި ގަން-ފުވައްމުލައް-ގަން ދަތުރުތަކެއް ހަފުތާއަކު ދެދުވަހު ކުރެ އެވެ.
"އެހެން ނަމަވެސް މިއަދު މި އިފްތިތާހުކުރެވޭ އޮޕަރޭޝަންގެ ސަބަބުން ދެކުނުގެ ހުރިހާ އަތޮޅެއް އެއްކޮށް ގުޅާލެވިގެން ދާނެ. އަދި ކަނޑުމަގުން ކުރާ ދަތުރުތަކުގެ އިތުރަށް ވައިގެ މަގުން ދަތުރުކުރެވޭ ގޮތަށް މަގުފަހިވެގެން ދިއުމަކީ މިއަތޮޅުތަކުގެ ރައްޔިތުންނަށް ދަތުފަތުރުކުރުމުގައި ވަރަށް ބޮޑަށް ލުއިފަސޭހަވެގެން ދާނެ ކަމެއް،" އޭނާ ވިދާޅުވި އެވެ.
އެ ރަސްމިއްޔާތުގައި ޓްރާންސްޕޯޓް މިނިސްޓަރު މުހައްމަދު އަމީން ވިދާޅުވީ ދެކުނުގެ ހަތަރު އަތޮޅުގެ ދެމެދުގައި ސީޕްލޭން ބޭނުންކޮށްގެން ވައިގެ ދަތުރުތައް ކުރަން މީގެ ކުރިން ވެސް ދެފަހަރެއްގެ މަތިން މަސައްކަތްކޮށްފައިވާ ކަަމަަށެވެ. ނަމަވެސް ދެމެހެއްޓެނިވި ގޮތެއްގައި އެ ކަން ކުރިއަށް ނުދިއުމާ އެކު އެންމެ ރަނގަޅު އޮޕްޝަނަކީ "ލޭންޑް ބޭސްޑް ޝެޑިއުލްޑް ކަނެކްޓިވިޓީ"އަކުން ގުޅާލުން ކަމަށް ވެސް އޭނާ ވިދާޅުވި އެވެ.
"މިފަށާ އޮޕަރޭޝަންގެ ޑިމާންޑް ރަނގަޅުވެ، އަދި ހައި ކެޕޭސިޓީގެ އިތުރު މަތިންދާބޯޓް ބޭނުން ވަނީ ނަމަ، ޑިމާންޑަށް ބަލައި [މަތިންދާ]ބޯޓް ޝެޑިއުލް އަށް އިތުރު ބަަދަލުތައް ގެނައުމަށް ވަނީ ޕްލޭން ކުރެވިފައި،" އަމީން ވިދާޅުވި އެވެ.
އޭނާ ވިދާޅުވީ މިއަދު ތައާރަފްކުރި ހިދުމަތާ އެކު ގއ.އަތޮޅާއި ގދ. އަތޮޅު އަދި ފުވައްމުލަކާއި އައްޑޫގެ ޓޫރިޒަމްގެ އިތުރަށް ކުރިއެރުވޭނެ ކަމަށެވެ.