އައްޑޫގައި ޑެންގީ އިތުރުވަނީ، އެންމެ ގިނައީ ފޭދޫގައި

އައްޑޫގައި ޑެންގީ ހުން ފެތުރެމުންދާތީ ރައްކާތެރިވާން އައްޑޫ އިކުއެޓޯރިއަލް ހޮސްޕިޓަލުން އެދިއްޖެ އެވެ.

އައްޑޫ ހޮސްޕިޓަލްގެ ސީއީއޯ ޑރ. އިބްރާހިމް ޔާސިރު އަހުމަދު "މިހާރު" އަށް ވިދާޅުވީ މި މަހު އައްޑޫން ރިޕޯޓުކުރި ޑެންގީ ކޭސްތައް އިތުރުވެފައިވާ ކަމަށެވެ.

އެގޮތުން ޖެނުއަރީ މަހު 51 ކޭސް ރިޕޯޓުކޮށްފައި ވާއިރު މި މަހު މިހާތަނަށް 48 ކޭސް ރިޕޯޓުކޮށްފައިވާ ކަމަށް ވެސް އޭނާ ވިދާޅުވި އެވެ.

މިވަގުތު އެންމެ ގިނައިން ޑެންގީ ކޭސްތައް ފެންނަނީ ހިތަދު އާއި ފޭދޫން ކަމަށާއި ފޭދޫގައި ޑެންގީ ޖެހޭ މީހުންގެ އަދަދު އިތުރުވަމުން އަންނަ ކަމަށް ވެސް އޭނާ ވިދާޅުވި އެވެ.

ހެލްތު ޕްރޮޓެކްޝަން އެޖެންސީ(އެޗްޕީއޭ)ގެ އޮފިޝަލަކު "މިހާރު" އަށް ވިދާޅުވީ މި ދުވަސްވަރު ރާއްޖޭގެ ގިނަ ސަރަހައްދުތަކުގައި ޑެންގީ ފެތުރޭ މިންވަރު އިތުރު ވެފައިވާ ކަމަށެވެ. ވިއްސާރަ ދުވަސްވަރަށް ފަހު ދެން އަންނަ ދުވަސްތަކުގައި ޑެންގީ ފެތުރޭ މިންވަރު އަބަދުވެސް ވަރަށް ބޮޑަށް އިތުރުވާ ކަމަށް އޭނާ ވިދާޅުވި އެވެ.

އެޗްޕީއޭއިން މި މަހު 10ވަނަ ދުވަހު އާންމުކުރި މައުލޫމާތުން އެނގޭ ގޮތުގައި މި އަހަރުގެ ފުރަތަމަ މަހު ޑެންގީ ހުމާއި އަރިދަފުސް ރޯގާ އަދި ބޭރަށް ހިންގުން ޖެހިގެން ރިޕޯޓްކުރި މީހުންގެ އަދަދު ވަނީ ވަރަށް ބޮޑަށް އިތުރުވެފަ އެވެ.

އެ މުއްދަތުގައި ޑެންގީ ހުން ޖެހިގެން 359 ކޭސް ރިޕޯޓްކޮށްފައިވާ ކަމަށް ވެސް އެޗްޕީއޭއިން ބުންޏެވެ.