މެދުއިރުމަތީގައި ހިނގަމުންދާ ހަނގުރާމައާ ގުޅިގެން ރާއްޖެ އަށް ތެލާއި ކާބޯތަކެތި ލިބުމުގައި އެއްވެސް ދަތިކަމެއް ކުރިމަތިވާނެ ކަމަށް އަދި ނުބެލެވޭ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ރައީސް ވިދާޅުވީ، މެދުއިރުމަތީގެ ގައުމުތަކުގައި ދިރިއުޅޭ ދިވެހިންނާއި ދަރިވަރުން އަދި ދަތުރުކުރާ މީހުންގެ ހާލަތު ސަރުކާރުން ގާތުން ބަލަމުން އަންނަ ކަމަށާއި މިހާތަނަށް ކަންބޮޑުވާން ޖެހޭ އެއްވެސް ކަމެއް ކުރިމަތިވެފައި ނުވާ ކަމަށެވެ.
މި ހަނގުރާމައާ ގުޅިގެން ރާއްޖޭގެ އިގުތިސާދަށް ކުރާ އަސަރު ކުޑަކުރުމަށް ކަމާ ގުޅޭ ހުރިހާ އިދާރާއަކުން ގުޅިގެން މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ.
ރައީސް މުއިއްޒު ވިދާޅުވީ މެދުއިރުމަތީގެ ގައުމުތަކަކީ ރާއްޖެ އަށް އަންނަ ގިނަ އަދަދެއްގެ ޓޫރިސްޓުން ޓްރާންސިޓް ކުރާ އެއާޕޯޓުތައް ހުންނަ ގައުމުތަކަށް ވާތީ، ޓޫރިޒަމްގެ ސިނާއަތަށް މި ހަނގުރާމައިގެ ސަބަބުން ވަރަށް ބޮޑު އަސަރެއް ކުރާ ކަމަށެވެ. ނަމަވެސް، ރާއްޖެ އަށް ޓޫރިސްޓުންނަށް އާދެވޭނެ އެހެން ރޫޓުތައް ބަލައި، އެ އިންތިޒާމުތައް ހަމަޖެއްސުމަށް މި ދާއިރާގެ ފަރާތްތަކާ ގުޅިގެން މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ.
"ތެލަށް ބަލާއިރުގައި، ތެލަށް އެއްވެސް ކަހަލަ ކަންބޮޑުވުމެއް އަދި އަޅުގަނޑުމެންނަކަށް ދިމައެއް ނުވޭ. އަޅުގަނޑުމެންނަށް އިރާދަކުރެއްވިޔާ ހަމަ ވަރަށް ރަނގަޅަށް އެކަން އޮތީ ހަމަޖެހިފައި. އެއްވެސް ވަރަކަށް، ތެޔޮ، ކުރިއަށް އޮތް ދުވަސްތަކުގައި އަޅުގަނޑުމެންނަށް ނުލިބޭނެ ކަހަލަ ގޮތަކަށެއް، އަދި ނެތް އެއްވެސް ކަހަލަ ކަންބޮޑުވާން ޖެހޭ އެއްވެސް ކަމެއް،" ރައީސް ވިދާޅުވި އެވެ.
ތެލުގެ އިތުރު ޝިޕްމަންޓެއް ހޯދުމުގެ މަސައްކަތް ވަނީ ފަށައިފައި
ރައީސް ވިދާޅުވީ ތެލުގެ އާ ޝިޕްމަންޓެއް ހިފައިގެން އޮމާންގެ ބޯޓެއް ރާއްޖެ އައުމަށް މިދިޔަ ހޮނިހިރު ދުވަހު ދަތުރު ފަށާފައިވާ ކަމަށެވެ. އަދި އިތުރު ޝިޕްމަންޓެއް ހޯދުމުގެ މަސައްކަތް ރޭގައި ފަށާފައިވާ ކަމަށް ވެސް ރައީސް ވިދާޅުވި އެވެ.
"މިވަގުތު ވެސް [ތެޔޮ] އެބަހުރި މަހަކަށް ވާ ވަރަށް. ރާއްޖޭގައި ސްޓޮކް ކުރެވޭނެ އެންމެ މެކްސިމަމް ހުރީ ސްޓޮކް ކޮށްފައި،" ރައީސް ވިދާޅުވި އެވެ.
އޮމާންއަކީ ރާއްޖެއިން ތެޔޮ ހޯދައި މައިގަނޑު ގައުމު ކަމަށް ވާއިރު، މި ހަނގުރާމައިގައި އޮމާންއަށް ވެސް ހަމަލާދެމުން ދިޔަ ނަމަވެސް، ކަންބޮޑުވާން ޖެހޭ ކަމެއް އަދި ނެތް ކަމަށް ރައީސް ވިދާޅުވި އެވެ.
ރައީސް ވިދާޅުވީ އެއްވެސް ދަތިކަމެއް ނެތި ރާއްޖެ އަށް ކާބޯތަކެތި ވެސް ލިބޭނެ އިންތިޒާމު ހަމަޖެހިފައިވާ ކަމަށެވެ.
ރައީސް މިއަދު ނޫސްވެރިންނާ ބައްދަލުކުރަައްވާއިރު، މި މަހުން ފެށިގެން ކޮންމެ ހަފުތާއެއްގެ ހޯމަ ދުވަހު ނޫސްވެރިންނާ ބައްދަލުކުރައްވައި، ސުވާލުތަކަށް ޖަވާބު ދެއްވަން ރައީސް ވަނީ ނިންމަވައިފަ އެވެ.
އެމެރިކާ އާއި އިޒްރޭލުން އިސްވެ އިރާނަށް މިދިޔަ ހޮނިހިރު ދުވަހު ދިން ވަރުގަދަ ހަމަލާތަކުގެ ނަތީޖާއެއް ގޮތުން، މެދުއިރުމަތީގައި ފަށާފައިވާ ހަނގުރާމައާ ގުޅިގެން ގިނަ ގައުމުތަކެއްގެ ވައިގެ ސަރަހައްދު ވަނީ ބަންދުކޮށްފަ އެވެ. އޭގެ ސަބަބުން ރާއްޖެ އަށް ދަތުރުކުރާ ގިނަ އަދަދެއްގެ ފްލައިޓް ކެންސަލްވެ، ގިނަ އަދަދެއްގެ ޓޫރިސްޓުންނަށް ރާއްޖެ އިން ނުފުރި ވަނީ މިކޮޅުގައި ތާށިވެފަ އެވެ.
ހަނގުރާމައާ ގުޅިގެން، ދުނިޔޭގެ ދަތުރުފަތުރުގެ ނިޒާމަށް ބޮޑު ބުރުލެއް މިހާރު ވަނީ އަރައިފަ އެވެ. ރާއްޖެއަކީ ޓޫރިޒަމަށް ބިނާވެފައިވާ އިގްތިސާދެއް އޮތް ގައުމަކަށް ވާއިރު، ޔޫރަޕާއި އެމެރިކާގެ މަންޒިލްތަކުން ވެސް ދުބާއީ އާއި ދޯހާ ކަނެކްޝަން މަންޒިލެއްގެ ގޮތުގައި ބޭނުން ކުރެ އެވެ.
ރައީސް ވަނީ މި ހަނގުރާމައާ ގުޅިގެން ރާއްޖެއަށް ކުރާ އަސަރު ކުޑަކުރުމަށް ކެބިނެޓު މިނިސްޓަރުން ހިމެނޭ ހާއްސަ ކޮމިޓީއެއް އުފައްދަވައިފަ އެވެ.