މާލޭ ހިޔާ އާއި ސިނަމާލޭ ފްލެޓުތަކުގައި ދިރިއުޅޭ މީހުން އެ ފްލެޓުތަކަށް ދައްކަން ޖެހޭ ޖޫރިމަނާ މާފުކޮށްދީ، އެ ތަންތަނުގެ ވެރިންނަށް ސަރުކާރުން ފައިސާ ދިނުމަކީ ރިޝްވަތުގެ އަމަލެއް ކަމަށް ގަބޫލުފުޅު ނުކުރައްވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
އެކި ސަބަބުތަކާ ހެދި މާލެހިޔާ/ސިނަމާލެ ފްލެޓުތަކުގެ ޖޫރިމަނާ ނުދެއްކޭ މީހުންގެ ޖޫރިމަނާ މާފުކޮށް، އެ މީހުންނަށް ފައިސާގެ އިނާޔަތެއް ދޭން ރައީސް މުއިއްޒު ނިންމެވީ މިދިޔަ ޖެނުއަރީ މަހުގެ ފަސް ވަނަ ދުވަހު އެވެ. އަދި އެކަން އެ ގޮތަށް ކުރަން މާލެ ސިޓީ ކައުންސިލަށް އެ މަނިކުފާނު އެންގެވީ އެ މަހުގެ ހަތްވަނަ ދުވަހު އެވެ.
ކުރިއަށް އޮތް ލޯކަލް ކައުންސިލު އިންތިހާބު ވެސް ބޯމަތިވެފައިވަނިކޮށް އެފަދަ އިނާޔަތެއް ދެއްވާފައިވާތީ އެއީ ރިޝްވަތު ކަމަށް ގަބޫލުކުރައްވަންތޯ، ރައީސް މުއިއްޒު މިއަދު ބޭއްވެވި މީޑިއާ ބްރީފިންގައި ނޫސްވެރިއަކު ސުވާލު ދެންނެވުމުން އެ މަނިކުފާނު ވިދާޅުވީ އެއީ އެއްވެސް ވަރަކަށް ރިޝްވަތު ނޫން ކަމަށެވެ.
އެކަމަކީ ރައީސްގެ ރިޔާސީ ވައުދުފުޅެއްކަން ފާހަގަކުރައްވަމުން އެ މަނިކުފާނު ވިދާޅުވީ، ވައުދުފުޅުތައް ހިމެނޭ ފޮތުގައި ވެސް އެކަން ހިމެނޭ ކަމަށެވެ.
"އެއްވެސް ވަރަކަށް ރިޝްވަތެއް ނޫން އެއީ. މީގެއިން މި ފާހަގަވަނީ ތިބޭފުޅުންގެ މައުލޫމާތު ނެތްވަރު،" މެންދުރުކުރިން ނޫސްވެރިންނާ ބައްދަލުކުރައްވާ ރައީސް ވިދާޅުވި އެވެ.
"އަޅުގަނޑުގެ މެނިފެސްޓޯގައި ވެސް އޮންނާނެ އެ ވާހަކަ. މެނިފެސްޓޯގައި ވެސް އަދި އެއާ ގުޅިގެން ރިޔާސީ އިންތިހާބުގެ އެކިއެކި ކެމްޕެއިންގެ ދުވަސްވަރު ވެސް ހުންނާނެ އެ ވާހަކަ ދައްކާފައި،"
ސިނަމާލޭ ފްލެޓުގެ 1، 2 އަދި ތިނަކާއި މާލޭ ހިޔާގެ 1 އަދި 2 ގެ އިތުރުން ވިލިމާލޭގައި ހުންނަ ސިނަމާލޭ 4 ފްލެޓުތަކުގެ މަރާމާތު މަސައްކަތް ނުކުރާ ކަމަށާއި އޭގެ ސަބަބުން އެތަން ހުރީ މީހުންގެ ބޯމައްޗަށް ވެއްޓޭ ހިސާބަށް ހަލާކުވެފައި ކަމަށް ރައީސް މުއިއްޒު ވިދާޅުވި އެވެ.
"ކުޑަކުޑަ ކަމެއް ނުކުރެއެކޭ ނޫން. އެކަމަކު މިތަންތަން ހުރީ މީހުންގެ ބޯމައްޗަށް ވެއްޓޭ ހިސާބުގައި. އެހެންވީމާ އަޅުގަނޑު ރިޔާސީ އިންތިހާބުގެ ތެރޭގައި އެ ވައުދުވީ. އެކިއެކި ޕޯޑިއަމްތަކުގައި ހުންނާނެ [ވާހަކަ ދައްކާފައި]،"
ރައީސް ވިދާޅުވި ގޮތުގައި އެ ފްލެޓުތަކުގައި އުޅޭ މީހުންނަށް ފައިސާގެ އިނާޔަތް ދިނުމަށް މިދިޔަ ޖެނުއަރީ މަހުގެ ތެރޭގައި ކެބިނެޓުން ނިންމުމުގެ ކުރިން ވެސް އެކަމާ ގުޅިގެން ކުރީގެ ބައްދަލުވުމެއްގައި ވެސް ކެބިނެޓުގައި މަޝްވަރާ ކުރައްވާފައިވެ އެވެ. އެކަމަކު އޭރު އެކަން ނުވީ ސިޓީ ކައުންސިލުގެ ތެރެއިން ލިބެންވާ އެއްބާރުލުން ނުލިބުމުން ކަމަށް ރައީސް ވިދާޅުވި އެވެ.
"އެތަންތަން މަރާމާތު ނުކޮށް ހުރުމުގެ ސަބަބުން ވަރަށް ހާލުގައި ހުރީ. ޝީޓުތައް ފަޅަފަޅައިގެން ގޮސް މީހުންގެ ބޮލަށް ޝީޓުން ތަންތަން ވެސް ވެއްޓެނީ. ފެން ވެސް ލީކުވަނީ. ފާހަނާތައް ވެސް ހަލާކުވެފައި. އެކަމަކު އިންސާނުން ދިރިއުޅޭ ތަންތަން،" ކަންބޮޑުވުމާ އެކު ރައީސް ވިދާޅުވި އެވެ.
އެ ތަނުގެ ޖޫރިމަނާތައް މާފުކުރުމާ ގުޅިގެން ރައީސް ވިދާޅުވީ މުޅި ރާއްޖޭގައި ހިމެނޭ ސޯޝަލް ހައުސިން ސްކީމުގެ ޖޫރިމަނާތައް މާފުކުރުމަކީ އެމަނިކުފާނު ވައުދުފުޅެއް ކަމަށާއި އޭގެ ދަށުށް ހުޅުމާލެ އާއި ރަށްރަށުގެ ފްލެޓުތަކުގެ ޖޫރިމަނާ ވެސް މާފުކޮށްފައިވާ ކަމަށެވެ.
ރައީސް ވިދާޅުވީ ސިނަމާލެ/ މާލެހިޔާ ފްލެޓުތަކުގައި މީހުން ދިރިއުޅެމުން ދަނީ ވަރަށް ހާލުގައި ކަމަށާއި އެކަމަކު އެއީ ބައެއް މީހުން އެއްކޮށް ފައިސާ ދައްކައި ހަލާސްކޮށް، މިލްކު ވެސް ކޮށްފައިވާ ތަންތަން ކަމަށެވެ.
އެހެންވެ، ކެބިނެޓުން ނިންމާފައި ވަނީ އެ ފްލެޓުތައް މަރާމާތުކުރުމުގައި، އެ ތަންތަނުގެ ވެރިންނަށް ސަރުކާރުން އެހީވުމަށް ކަމަށް ރައީސް މުއިއްޒު ވިދާޅުވި އެވެ. އެގޮތަށް ނިންމާފައި ވަނީ އާންމު ސޯޝަލް ހައުސިންގެ ސިޔާސަތުގެ ދަށުން ދިރިއުޅުމުގެ ހާލަތު ރަނގަޅުކުރުމަށް ފުރުސަތު ދިނުމަށް ކަމަށް ރައީސް ވިދާޅުވި އވެެ.