އެމެރިކާ އާއި އިޒްރޭލުން ދިން ހަމަލާތަކުގައި އީރާނުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުން ކުރީގެ ރައީސް މައުމޫން އަބްދުއްގައްޔޫމް ރޭ ކުށްވެރިކުރައްވައިފި އެވެ.
މައުމޫން އެކްސްގައި ކުރެއްވި ޕޯސްޓެއްގައި ވިދާޅުވީ ތެދުވެރި މުސްލިމެއްގެ ހައިސިއްޔަތުން ޚާމަނާއީ އަވަހާރަކޮށްލުން އެ މަނިކުފާނު ކުށްވެރިކުރައްވާ ކަމަށެވެ.
މި ހިތާމައިގައި ޚާމަނާއީގެ އާއިލާ އަށް ތައުޒިޔާ ފޮނުއްވާ ކަމަށާއި އަދި އީރާނުގެ ރައްޔިތުންނަށް ހިތްވަރު ދެއްވުމަށް ދުއާ ކުރައްވާ ކަމަށް ވެސް މައުމޫން ވިދާޅުވި އެވެ.
ޚާމަނާއީ އަވަހާރަކޮށްލުން ކުރީގެ ރައީސް މައުމޫން ކުށްވެރިކުރެއްވިއިރު، މިހާތަނަށް ސަރުކާރުން އެކަމާ ގުޅިގެން އެއްޗެއް ނުބުނެ އެވެ. އަދި ރާއްޖޭގެ އެހެން އިސް ލީޑަރެއް ވެސް ޚާމަނާއީ އަވަހާރަކޮށްލުން ކުށްވެރި ކުރައްވާފައެއް ނުވެ އެވެ.
ޚާމަނާއީ އަވަހާރަކޮށްލުމާ ގުޅިގެން ރާއްޖޭން ރަސްމީކޮށް ތައުޒިޔާ ފޮނުވާފައިނުވާފައެއް ނުވެ އެވެ. އަދި، މީގެކުރިން އީރާނުގެ އިސް ލީޑަރުން އަވަހާރަވުމުން ވެސް ގައުމީ ދިދަ ބައި ދަނޑިއަށް ތިރިކުރި ނަމަވެސް، މިފަހަރު އެ އުސޫލަށް އަމަލެއް ނުކުރެ އެވެ.
އެކަމާ ގުޅިގެން ނޫސްވެރިން އިއްޔެ ރައީސް ޑރ. މުހައްމަދު މުއިއްޒާ ސުވާލުކުރުމުން އެ މަނިކުފާނު ވިދާޅުވީ، ހަނގުރާމާގައި ކޮންމެ މުސްލިމަކު މަރުވިޔަސް އެއީ ހިތާމައެއް ކަމަށެވެ.
ޚާމަނާއާ އަވަހާރަވުމާ މެދު ސީދާ ގޮތުން އެއްޗެއް ވިދާޅުނުވެ، ރައީސް ވިދާޅުވީ އެކަމުގައި ރާއްޖެ އޮންނާނީ އަރަބި އިސްލާމިކް ގައުމުތަކާ އެއް ސްޓޭންޑެއްގައި ކަމަށެވެ. ރައީސް މުއިއްޒު ވިދާޅުވީ އެމެރިކާ އާއި އިޒްރޭލު އަދި އީރާނުން ދެމުންދާ ހަމަލާތައް އެ މަނިކުފާނު ކުށްވެރިކުރާ ކަމަށެވެ.
ރައީސް ވިދާޅުވީ މެދުއިރުމަތީގައި ފަށާފައިވާ ހަނގުރާމައާ ގުޅިގެން ރާއްޖޭގެ ތާއީދު އޮތީ އަރަބި ގައުމުތަކާ އެކުގައިކަން ހާމަކުރަން އެ ގައުމުތަކުގެ ވެރިންނާ ވާހަކަފުޅު ދައްކަވަމުން ގެންދަވާ ކަމަށެވެ.
އީރާނަށް އެމެރިކާ އާއި އިޒްރޭލުން ދިން ވަރުގަދަ ހަމަލާތަކުގެ ރައްދެއްގެ ގޮތުން އީރާނުން ގެންދަނީ އަވަށްޓެރި އަރަބި ގައުމުތަކުގައިވާ އެމެރިކާގެ އަސްކަރީ މަރުކަޒުތަކަށް ވަރުގަދަ މިސައިލް ހަމަލާތައް ދެމުންނެވެ.
އެގޮތުން ޔޫއޭއީ، ބަހްރުއިން، ސައުދި އަރަބިއްޔާ، ގަތަރު އަދި އޮމާންއަށް އީރާނުގެ ހަމަލާތައް އަމާޒުވެ ގެއްލުންތައްވެފައިވެ އެވެ. ހަމަލާތަކާ ގުޅިގެން އެ ގައުމުތަކުން ވައިގެ ބޮޑު ސަރަހައްދެއް ވެސް ވަނީ ބަންދުކޮށްފަ އެވެ.