ވަކި މުއްދަތެއް ކަނޑައަޅައި ސްޓޫޑެންޓް ލޯނަށް އެދެން ހުޅުވާލުމުން ބައެއް ދަރިވަރުންނަށް ފުރުސަތު ގެއްލޭ މައްސަލަ ހައްލުކުރަން މުޅި އަހަރު ތެރޭގައި ލޯނަށް ހުށަހެޅުމުގެ ފުރުސަތު ދޭން ހަޔާ އެޑިއުކޭޝަން މިނިސްޓްރީން ނިންމައިފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު ޑރ. އަލީ ހައިދަރު ވިދާޅުވީ ވަކި މުދަތެއްގެ ތެރޭގައި ސްޓޫޑެންޓް ލޯނަށް އެދުމުގެ ފުރުސަތު ހުޅުވާލުމުން ގިނަ ދަރިވަރުންނަށް ދަތިތަކާ ކުރިމަތިލާން ޖެހޭ ކަމަށެވެ.
ލޯނު ސްކީމަށް ހުޅުވާލާއިރު މުހިންމު ބަދަލުތަކެއް ގެނައުމަށް ނިންމާފައިވާކަން ފާހަގަކުރައްވައި މިނިސްޓަރު ވިދާޅުވީ ދެން ދަރިވަރުންނަށް ދޫކުރާނީ "ޝަރީއާ ކޮމްޕްލަޔަންޓް" ލޯނުތަކެއް ކަމަށެވެ.
"މިފަހަރު އަލަށް ލޯނަށް ހުޅުވާލާއިރު އެޕްލިކޭޝަން ޑެޑްލައިނެއް ނުބާއްވާ ލޯނަށް އެދުމުގެ ފުރުސަތު މުޅި އަހަރަށް ހުޅުވާލެވިފައި އޮންނާނެ. މިހާތަނަށް ދަރިވަރުން ލޯނު ހޯދަން އެދި ހުށަހަޅަން ވަކި މުއްދަތެއް ކަނޑައެޅިފައި އޮތުމުން، އެ މުއްދަތުގައި ލޯނަށް އެދި ހުށަހެޅުން ބައެއް ދަރިވަރުންނަށް ދަތިވޭ. އަދި ލޯނަށް އެދުމުގެ ފުރުސަތު ގެއްލޭ ގޮތް ދިމާވެފައިވާކަން ވެސް ފާހަގަކުރެވޭ،" މިނިސްޓަރު ވިދާޅުވި އެވެ.
އެ ބަދަލާ އެކު:
- ލޯނަށް އެދުމަށް ފަސޭހަވެގެން ދާނެ
- ހުށަހަޅަންޖެހޭ ލިޔެކިޔުންތައް ތަފާތުވާނެ
- މުޅި އަހަރަށް ހުޅުވާލާފައި އޮތުމުން، ލޯނަށް އެދެންވާނީ ހުރިހާ ލިޔުންތަކެއް ހަމަކޮށްގެން (އެމްކިޔުއޭގެ ލިޔުމާއި ހުއްދަދޭ ޕްރޮގްރާމެއްކަން އަންގައިދޭ ލިޔުން)
- ލޯނަށް އެދި ހުށަހަޅާއިރު ފީ ސްޓްރަކްޗާއެއް ތައްޔާރުކޮށްފައި އޮންނަންޖެހޭނެ
މިނިސްޓަރު ވިދާޅުވީ މި އަހަރުގެ ލޯނު ސްކީމަށް ހުޅުވާލާނީ ރޯދަމަހުގެ ފަހު 10ގެ ޗުއްޓީއަށް ފަހު ދެން ސަރުކާރު ހުޅުވޭ ހަފުތާގައި ކަމަށެވެ. އެ ޗުއްޓީއަށް ފަހު ސަރުކާރު ދެން ހުޅުވޭނީ މާޗް 22 ގަ އެވެ.