އެމެރިކާ އާއި އިޒްރޭލުން އިސްވެ އީރާނަށް ދިން ވަރުގަދަ ހަމަލަތަކާ ގުޅިގެން، މެދުއިރުމަތިީގައި ފަށާފައިވާ ހަނގުރާމައާ ހެދި ފްލައިޓުތައް ކެންސަލްވެ، މި ރޯދަމަހުގެ ފަހު 10 އަށް ރާއްޖެ އިން އުމްރާ އަށް ދާން ބޭނުންވެފައި ތިބި މީހުންނަށް ކުރިމަތިވެފައިވާ ދަތިތައް ހައްލު ކުރަމުން އަންނަ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ރޭ ވިދާޅުވެއްޖެ އެވެ.
މިނިސްޓަރު މީޑިއާއާ ހިއްސާ ކުރެއްވި މެސެޖެއްގައިވާ ގޮތުން، މިއަދާ ހަމައަށް 150 ދިވެއްސަަކު އުމްރާގެ އަޅުކަމަށް ނުފުރި ތިބިކަން ފާހަގަވެ އެވެ.
އެ މީހުންނަށް ނުފުރި ތިބީ މިނިސްޓަރު ޝަހީމް ވިދާޅުވި ގޮތުގައި، ބައެއް ގައުމުތައް މެދުވެރިކޮށް ޓްރާންސިޓްކޮށް ފުރަން އުޅުނު ނމަަވެސް އެ ގައުމުތަކުގެ ފްލައިޓުތައް ކެންސަލްވުމުންނެވެ.
އެކަމަކު، އެ މީހުންނަށް އުމްރާގެ އަޅުކަމަށް ފުރޭނެ އިންތިޒާމު ހަމަޖައްސަން ރައީސް ޑރ. މުހައްމަދު މުއިއްޒު ދެއްވި އިރުޝާދާ ގުޅިގެން އިސްލާމިކް މިނިސްޓްރީ އާއި މޯލްޑިވްސް ހައްޖު ކޯޕަރޭޝަން އަދި މޯލްޑިވިއަން އެއާލައިން ގުޅިގެން ގޮތްކެއް ހޯދަމުން އަންނަ ކަމަށް ޝަހީމް ވިދާޅުވި އެވެ.
އޭނާ ވިދާޅުވީ، ފްލައިޓް ޗާޓަރު ކުރެވޭނެ ގޮތް ވެއްޖެ ނަމަ މިހާރު ނުފުރި ތިބި 150 މީހުންގެ އިތުރުން ވެސް ޖާގައެއް ހޯދަން ބޭނުންވާ މީހުންނަށް ޖާގަ ހުރި މިންވަރަކުން ދޭނެ ކަމަަށެވެ.
"ވަގުތު ކުޑަތަންވެފައި ވުމުން މިކަމުގައި ހުރި ދަތިތައް ހައްލުވޭތޯ މަސައްކަތްކުރަމުންދާ ވާހަކަ ދަންނަވަން. ދަތުރުގެ ހަރަދު ކުރާނީ އެހެންޏާ ވެސް އުމްރާ ދަތުރުގައި އޮންނަ އުސޫލުން އުމްރާވެރިންނެވެ،" މިނިސްޓަރު ވިދާޅުވި އެވެ.
އޭނާ ވަނީ ރައްޔިތުންނާ ގުޅުން ހުރި މިފަދަ ކަންކަމުގައި ރައީސް މުއިއްޒު ދެއްވާ އިސްކަމަށް ޝުކުރު އަދާކުރައްވައިފަ އެވެ.
މެދުއިރުމަތީައި މިހާރު ފަށާފައިވާ ހަނގުރާމައާ ގުޅިގެން، ރާއްްޖެ އަންނަ ގިނައިިން ފްލައިޓުތައް ޓްރާންސިޓް ކުރާ ގައުމުތަކުގެ ވައިގެ ސަރަހައްދު ބަންދުކުރުމުން ވައިގެ ދަތުރުތައް ވަނީ ހުއްޓިފަ އެވެ. ހާއްސަކޮށް ޔޫއޭއީގެ ދުބާއީ އަދި ގަތަރުގެ ދޯހާ އެއާޕޯޓަކީ ޓްރާންސިޓުގެ ހަބަކަށް ވާއިރު އެ ދެ ގައުމުގެ ވައިގެ ސަރަހައްދު މި ދުވަސްވަރު ބަންދު ކުރުމުން އެތައް ފަސިންޖަރުންނެއް ތިބީ ނުފުރި ތާށިވެފަ އެވެ.